البارحه بالقلب هم(ن)يعانيه=هم يزود لوعتي واختناقي
لو كان ما ودك على الناس تبديه=يفوح من تحت الضلوع الدقاقي
وشيٍ قبل تبديه ينعاف تاليه=وشيا يسوقك للطنا والفراقي
وامر(ن) يكدر خاطر اللي حكى فيه= ومر(ن) يضيم الروح والفكر شاقي
والشعر حبك وسبك ودراك راعيه=يبنيه ما تصعب عليه المراقي
واليوم غناني وانا جيت اغنيه=لو كان ما بالقاف جبر(ن) لساقي
بعض العرب ما نلحقه بالمشاريه=باقي عن علوم الرجاجيل باقي
وبعض العرب لو يطلب الروح نفديه= واحط له صدري عن الرمح واقي
وكم واحد(ن) يقبل وانا امشي واخليه=من خوف لا يصبح قرين بصداقي
وكم واحد(ن) يقفي ولا عاد نرجيه=ولا نتلاقى غير يوم التلاقي
ورجل(ن) غيابه ما تسده بنيخيه=ماهو ردى لكن به الطيب فاقي
الماء يفيض وترتوي من سواقيه=والعين يا جفت تجف السواقي
والبيت لا من ضيقه صدر راعيه=الارض ما ضاقت لو الصدر ضاقي
اسج مع روض(ن) تعله مناشيه=مطوقن فيه الخضار الزراقي
لو حاول الرسام يرسم مباديه=تلقى خيار الادمي شي راقي
لكن عقول الناس ما تقبل التيه=ولا تحب النمنمه والنفاقي
يا قلها لكن عليها المشاريه=ياطير العبرود روس الطواقي
لشاعر الأبداع والجزاله
الشاعر /الحميدي مونس العنزي