الحمام اللي على الزيتون جر لحونه=جاوبه خفاق صدري باللحون وغنا
وجاوبته بهزة اغصان الطرب زيتونه= كنها تقوله يالورق وش تتمنا
كني اسمع صوته ايقول العرب مغبونه= نص منهم صار هيل ونص منهم بنا
والرياح اصواتها ترعب تقل مجنونه= كان جت منا تجيهم يا محمد منا
والبنيه غطرفت من فرحها المزيونه= كفها من دمنا يا خوك صار محنا
والجبل صلف الهوى ما هز كل ركونه = ثابتٍ بالارض دايم ما اختلف له ضنا
ما انفتنا مع خلايق بالفتن مفتونه=وما لتفتنا لرمح من كف العدا يطعنا
شعب واحد والعهد حنا ابد ما نخونه=ما ثنينا ايديننا يوم اليدين تثنا
كل يوم نجدد البيعة وفا مضمونه =لابو متعب خادم البيتين عهدٍ منا