الملكـي جـر القوافـي مــن الـجـاش=وجاتك جيوش الحرف جيش(ن) ورى جيش
سلم على راس(ن) على المرجلـه شـاش=يحيـا علـى الطـالات ويمـوت ويعيـش
مـا ذلله طـرد المـراجـل ولا انـحـاش=يوم اعتـز(ن) بـه ناقضـات العكاريـش
الطيب في قلبـي لـه عـروق واعـراش=نـابـت بقلـبـي ماينـوشـه مناقـيـش
مادانـي الخملـه ولا اخــاوي الــلاش=وارفـع مقامـي عـن دروب المخاريـش
لا عاش مـن يستصغـر الـذل لا عـاش=يمشـي بدربـه ويتعـاطـى البخاشـيـش
الحـر مايسكـن جواخـيـر وعـشـاش=يرقى على المرقـاب ثـم ينفـض الريـش
وإلا الردي راحـت حياتـه علـى مـاش=بيمـوت مـابـل الكـبـود المعاطـيـش