انت الذهب وانت الفرح وانت الالماس
ــــــــــــــــــــــ وانت الوحيد اللي بقلبه صفالي
اشتاق لك مع كل نسمه ونسناس
ـــــــــــــــ وأتووق لك لاحن غصن ومـــالي
وأتلهفك لاجيت بالقلب عساس
ــــــــــــ وأزدان عشبك بالضلووع الخوالي
من قبل احبك وانت طيبه ونوماس
ــــــــــــ واليوم كلك : صرت لي راس مالي
حبي لكم ماله معايير وقيــــــاس
ـــــــــــــــ وغديركم عندي : قـــــراح زلالي
ماهو بحب أقلام تكتب بقرطاس
ـــــــــــــــــــ ولاحب قدره مرتبط بالريالي
حبً : بنيته ياحبيبي على ساس
ـــــــــــــــ يحيط بك : لاهب برد الشمالي
مالك بهالدنيا مماثيل واجناس
ــــــــــــــ ولالك على قلبي شريك بحلالي
ياغايتي : والشوق بي مثل الامواس
ـــــــــــــ يقدبي بين الرجاء والوصــــــالي