يالله يامرسل مع الليل صيب = مدفاق هملول الثقال السحايب
على شعيبا لون عشبه شهيب = عقب المحل تقطر غصونه رطايب
الحزن لو يبعد بقلبي قريب = عليك ياللي غيبتك المغايب
والموت ينزل بالفتى من سبيب = ونوب المنايا تاتي بلا سبايب
ياعلي لو خلد على الارض طيب = والله ماتردم عليك النصايب
صميل قيض وبالنوايب مهيب = واكرم من رياح الشمال العذايب
كم من غريبا وسط بيتك تعيب = ارتاح واجملته حساب القرايب
وكم من عجوز وكم ضعيف ن شويب = تجلب لهم من حر مالك طبايب
اذكرك لاشفت الهلال الحديب = وارقب نجوم الليل والقلب ذايب
ياعلي كيف اسلا ووجهك مغيب = تحت الثرى ما يطرقنه هبايب
لو لي ذلولا من نجايب غريب = لانحر على قبرك كرام الركايب
عليك دمع العين يجري صبيب = وعليك زفرات الحنايا لهايب
عسى جزاك الحور بكرا وثيب = في جنةن يجري نهرها صبايب