ياجيل ياللي داخلك نار تشتب
مماتعاني صرت كلك شبايب
نار يجاذبها هوى البحر لاهب
ويلوفها من برد شمله هبايب
يالمغرم الهايم ويالعاشق الصب
فيما تسمى ناسعات الذوايب
بعد اذنك اسمع يامراهق وياشب
ويالشايب الي تزعل ان قلت شايب
الحب نسبي والحسن يسحر اللب
والعشق جمرك والمعاصي ضرايب
محبتن في غير مايرضي الرب
احفرلها واركز عليها النصايب
وان قلت رابع مستحيل اصدق الحب
اصدق حبيب الثامن من العجايب
وانا رميت العشق في قاعة الجب
واتهمت فيه الذيب والذيب غايب
ابراهيم الشيخي