حكاية طيف
ناس(ن) تسافر من هنيا الي جنيف=وناس(ن) تعيش الضيق وسط الحفاير
يالعنبو هالدور بالقهر والزيف=حتى قليل الاصل يملك عماير
لاتسالون النفس هو ليه اوكيف ؟=من حرت(ن) ياناس باقصى الضماير
ملعون يادورًا به الكذب ياحيف=مثل المرض جريه مع الدم ساير
عايش على الدنيا اشوف التحاسيف=عايش وقهري من زماني تباير
ماكني الا اصرف الهم تصريف=والهم يجمع من شتات الحساير
بالله وين الغيبه اليوم ياطيف=من هو يجيب العلم باحلى البشاير
وقفاتها تذكر مثل بارق السيف=بنت الشيوخ اللي به العز ناير
دايم عليه ترسل الشعر وتضيف=تضيف دمعاً شوق حبه عباير
اجي لها غرقان مالي مجاديف=ماغير انا في بحرها شوق زاير
قلبي لها يكتب من الحب تعريف=والقلب نبضاته تهز الزراير
ياطيف هذا الحال مامن تكاليف=عقب الدلع واللبس باحلى الحراير
تبدلت ياطيف راحت تخاريف=ضاعت على ماقيل بين الدواير
جاك الجواب وباقي العلم لوشيف=ابكتمه والضيق ساكن وجاير
ناس(ن) تغادر كل عطله مع الصيف=كل(ن) على فلوسه مع الجو طاير
يعني خلاصة شي ينقال ياطيف=اقولها من قلب ضايق وفاير
خلوني بديره بعيده عن جنيف=نعيش في قريه تسمى..... الحفاير؟