[عبدالرحمن الجابري الحربي]

السلام عليكم ورحمة الله وبركاته

اسعد الله جميع أوقاتكم أحبتي


جديدي المتواضع أضعه بين أيديكم لعله يرتقي لذائقتكم

لا تحسبني غير عن باقي الناس=لا والذي سواك ضمن المخاليق
يعني تراي انسان لي قلب واحساس=اضحك اسولف بعض الاحيان بي ضيق
ماني جبل يتحمل لضربة الفاس=وانت طعونك كلها بالمعاليق
يا هيه صبرك لا متى اقول لا باس=مليت وانا اسامحك دون تدقيق
بتقول حبي وين يا طيّب الساس=هو عاد باقي شيء مع نشفة الريق
بنك المحبة صابه إعسار وافلاس=من عقب ماهو في خفوقي طوابيق
مات الغلا وانهدت قصور الالماس=والعرش مزقته من الصد تمزيق
خليتني اضرب لك اخماس باسداس=عذرك يليق احيان واحيان ما يليق
اذكر هوانا كل ما هبّ نسناس=واسلّي الخاطر بجرّ الطواريق
اوّل ليا شفتك يزولنّ الاتعاس=واليوم عندي زي ضرب الصواعيق
لو جاك مني شيء من فعل الادناس=قلي عسى قلبي من اسبابك يفيق
وان كان تسمع بي سواليف جلاس=ما همني من لفّق الهرج تلفيق
بحر المراجل دايم ( ن )فيه غطاس=وافعالي اللي توثق القول توثيق
الحمد للي ما يجي عينه نعاس=الصيت شامخ كالجبال الشواهيق
تاخذني الافكار مع كل وسواس=والعقل تايه بين كذب (ن ) وتصديق
تدري وش اللي زود الياس بالياس =خلاني اكتم ضيقتي بالصناديق
خوفي أذوق المرّ من نفس ذا الكاس=ان طال عمري بالليال اللواحيق
لكنْ على الله بشتكي ضيق الانفاس=الواحد اللي يفرج الهم والضيق
دام القدر مكتوب راضي ولا باس=مالله كتب ما بين الاثنين توفيق

جــل تقديــري لكل من مــرّ هنـــا

شاعر عظيم المشاعر