بسم الله الرحمن الرحيم
ابيات ارى انها مناسبة هالايام ومعذرة ع الانقطاع الطويل
الفوز ماهو بفوز النصر والا الهلال = ياللي تعدون هذا الفوز عن كل فوز
الفوز لاقالوا المسلم عزيز المنال = يمشي بكل النواحي ماترده حجوز
يامر وينهى جنوب الارض والا شمال = وان قال دايم كلامه للمسامع يجوز
كل ٍ يقارن شموخه مع شموخ الجبال = هيبة وسطوة تهدي كل راس ٍ ينوز
كنه ملك هيبته للناس مضرب مثال = مايمكن انه يراز وقادر انه يروز
عشان يحكم بعدل وكل ميله تزال = والخير يشمل وكل ٍ للسعادة يحوز
لأن دايم ترى المسلم يحب العدال = والعدل يخرج على العالم جميع الكنوز
لكن ولكن هي السبة ورى الانخذال = نقول : (نبغى نسوي والتغير يعوز
لازم نخلي لذايذنا ودرب الضلال = حياتنا عودت والله مثل اللغوز )
- كلام دايم نهذري به على كل حال = والوضع يزداد سوءً والصلاح محجوز
ندري بأن الحياة اشبه بطيف الخيال = لكن يصير الضمير {ان قيل بعها} مهزوز
نقول بكرة يزين الحال يابن الحلال = نبغى نتمتع ولاتكثر علينا الرموز
حتى انجرفنا مع الدنيا وهي للزوال = واصبح هوانا لها بين الضلوع مغروز
يعني نشوف الجثث والقتل والاحتلال = مانعلق بحرف لا ساكن ولا بـ مهموز
نقعد نقارن قنوات الفشل هملال = هذي تخفي !! وهذي تستحق البروز
واكبر مصيبة بعَد نشبع مشاهد قتال = نروح لاكشن ندور فلم تومي كروز!!
يالله طالبك تصلح ياعزيز الجلال = ابرم لنا أمر رشد يعيدنا للحروز
وحقق لنا فوز ماهو فوز نصر وهلال = فوز ٍ حقيقي نعده فوز عن كل فوز
سلامة الجعفري