من وين ماوجهت وجــــهك ويمتك = ايمين والا يســـــــار والا على طول
تبغى السوالف مــــــابه الا سلامتك = كلن بالاسهم قدمـــــك يصول ويجول
وان كان تبغى تقيس قدرك وقيمتك = سولف بالاسهم والخطــــا منك مقبول
وبالذات هالموضوع كــــــثر لقافتك = لاتقول ويش احكي مــع الناس واقول
اهم حاجه لاتبين غشــــــــــــــامتك = واليا انشدو عن مصدرك قول مجهول
سولف وحلل لين تــــــــكبر مكانتك= والي تعلق جب له افــــــــــكار وحلول
قله تبي تكسب وتنســــى خسارتك= عطه الأمل والله به الخـــــــــير مأمول
واحذر لاترجف ثــــــم تفقد معزتك = وتصير مهــــــبولٍ ولو ما انت مهبول
والكل يضحك مـــنك ويزيد يشمتك= والسالفه لو هـــــي قصيره تبى تطول
ياسوق الاسهم من دخل في مغبتك = غصبٍ عليه ايصـــــير ياسوق مذهول
دخلت كل الناس فـــي وسط جعبتك = حتى هل البل والغـــــــــــنم فيك ياحول
ومن ذاق حلوك ماسلم من مرارتك = بعد انتكــــــــــاسك ياعسى ايامه تزول
خذلتـــــــــــــهم لابارك الله بساعتك = وسويت فيـــــــهم شي ماهو بمعقول
انهرت والعــــــــــالم توفت بسبتك = والحـــــــين به ناسٍ من اسبابك خبول
ذليتهم وادبتهـــــــــــم في طريقتك = وخلـــــــــــيتهم مابين مفلس ومعلول
هذا هو الواقـــــــع وهذي حقيقتك = وانا ان ســـــــــكت اوقلت ماني بمسؤل
لكنْ عــــــــاصرتك ودشيت صالتك = واخذت قـــــــرض وغيره ديون للحول
ابغى الفوايد مــنك وانت وشهامتك = وضحيت فــــــي ومنك هالحين مذهول
يعني مثل غـــــيري تلقيت صدمتك = مثل البحر كـــــــم زاغ من شانك عقول
كثرو هوامــــيرك وزدت بقساوتك = كنك جبان وعـــــــــندهم سيف مسلول
اينزلونك ليــــــــــن تنشاف قاعتك = ويطلعونك لين تشبــــــــــع من الطول
ويرجعونك مره اخـــــــرى لحالتك =وحنا نتفرج مالـــــــــــــــنا قوه وحول
الله يكافي شر ياســـــــــوق نكبتك = انت وهواميرٍ لهـــــــــــم ماضي فعول