عبدالله المشعان
حاولت أنسخ البيت اللي يشدني وبقوة
وأعلق على معانيه
فوجدت نفسي انسخ الآتي :
الله يغنيني عن القال والقيل ***وعن شوفة اللي ماتنومس فعوله
والله يبعدني عن الشك والميل*** والله يقربني لدرب الزحوله
العين ورتنا ضعوف وحلاحيل *** والقلب ميز في نتاج الرجوله
وانا عشقت الطيب والبن والهيل ***وراس الرجل يبني معالم ميوله
والله لااعيل ان شفت انا العائل يعيل *** واشوم عن درباً يجي به ثعوله
والراس مايخضع تحت حكمة الذيل ***والنفس محسوبه عن اللي تقوله
والوضع مزري لو يجي فيه تبديل *** دامه يطبل والعرب صفقوله
وماكبر بعيني زحول الرجاجيل *** الا قساة الوقت يوم ارتكوله
افرح ليا ذكروا رجالاً مشاكيل *** لن الدهر نسى عيال الحموله
ماينسي الماضي ياكود المهابيل *** ومن ينسي سلومه يامبعد وصوله
البال في وسطه تسابق هل الخيل *** واودع معاه القاف صوله وجوله
اهل الوفاء والطيب ذباحة الحيل *** اللي تحمل في ثقال الحموله
ياجيل انا همي سبايبك ياجيل *** جيلك ترى ياجيل ماله عموله
والوقت لو يجمع رموز التماثيل *** ما كان هذا الوقت صعباً قبوله
هذا الزمن يبغى له ادوار تمثيل *** اضحك وجامل لاتعيش البطوله
اكتب عن المجمل وخل التفاصيل *** وان قيل قوله ..قول والله لقوله
العبد لو يعطى على الكيف ويشيل *** اول ماينسف اقرب الناس حوله
وخلك على الدنياء صبوراً وحلحيل *** لاتصير عسر ولاتعيش بسهوله
لاشك جيب الكيف وجيب المعاميل *** بسوي فنجالي واكب الحثوله
كل مانشدته قال روح بتبتيل *** وكل ماسكت شوي نوخ ذلوله
احداً على الطيبه سهر لااخر الليل *** واحداً يدينه ماتعدى رجوله
الله يستر بالليال المقــــــــــابيل *** والا لعل الطيب يكثر هطوله
ياناس انا ماشره على شاطي النيل *** اشره على دار الكرم والرجوله
[color=00008B]قصيدة رائعة واضحة المعاني
تحاكي جميع جوانب الواقع الذي نعيشه
قصيدة كل ما قلت عليها جزله جزله
الله يعطيك العافية
وصح لسانك يالغالي
ابو ريناااااد[/color]