واليكم هذه
مساجلة بين الشاعر محمد الاحمد الهزاني والشاعرالكبير عبدالله بن عبار
قال : محمد الاحمد الهزاني
......................يالله يامنشـي المـزون الثقايـل
ياعالم ٍ بالغيب محصـي بشرهـا
.......................تفرج لمن كثرت عليـه الدوايـل
يمشي وكنّه غارق ٍ فـي بحرهـا
......................أشوف بالدنيـا عظيـم الهوايـل
ولا عاد أميز جدها مـن هذرهـا
....................ترفع لها أنذال وتهفـي حمايـل
والحر الأشقر يشتكي من كدرهـا
......................والحمـد لله جعـل فيهـا بدايـل
نفوس ٍ على المعروف ربي فطرها
....................ملزوم نذكر من يـدور الجمايـل
اللي بعلوم الطيب نفسه شهرهـا
....................ملزوم نذكر من علومـه جلايـل
اللي صعيبـات المعالـي قدرهـا
..................مثل القطامي مايصيـد الهزايـل
الحر جزلات المراجـل حصرهـا
.................ترفع له البيضاء بروس الطوايـل
والمسك والعنبر وأشذى زهرهـا
.................عبد الله العبار من نسـل وايـل
من لابة ٍ يخشى المعادي خطرهـا
...............فدعان في الغدراء نجوم ٍ دلايـل
إلى هاجت الهيجاء وعتّم قمرهـا
.................أولاد وايل مـن عـزاز القبايــل
وتاريخهم كتب السجلة سطرهـا
...............وإن جاء نهار ٍ فيه صايل وجايل
تضرب على الكايد وتنصى خطرها
..................عناز تـروي مرهفـات السلايـل
وعدوهم عينه شكت من سهرهـا
..............بني وايل أهل الفعـول الجزايـل
وأن أظلمت بالكون تراهم سفرها
.............وأن عبتهم ياسعود حب الأصايل
وأن حلت العليا تراهـم فخرهـا
.............يا سعود ذا قولي بصدق ودلايـل
قول ٍ على فعل ٍ يصـدّق خبرهـا
فرد عبدالله بن عبار العنزي قائلا :
...................بديت في منشي حقـوق المخايـل
يضفي على القاع المحيله مطرهـا
.....................ينبت زماليـق الزهـر بالخمايـل
ويخضر شتيل أوراقها مع شجرهـا
....................سبحان من يخرج دريـر المشايـل
رحمن والرحمـة بخلقـه نشرهـا
......................نطلب حنانه يـوم نشـر الفوايـل
يوم الخلايق موقفـه بامحشرهـا
...................ومن بعد ذكر الله بديـت المثايـل
رديت للي جابتـه مـا أخصرهـا
....................محمد عريب الساس جزل الفعايـل
ابن أحمد شعوره بشعـره جهرهـا
......................ابن سعد مـن خاطـره رد قايـل
قيفان من غاية ضميـره صخرهـا
......................جرّب وشاهد مـن زمانـه هوايـل
يشكي من الدنيـا وكايـد خطرهـا
...................يا ابن حسن دنياك ما من صمايـل
لو شفت كل الناس تركض باثرهـا
.......................يامسنـدي نعيـم دنيـاك زايــل
لو هرفت لـك مايـدوم أمعشرهـا
.....................يا القرم صيـور الجدايـد سمايـل
والرابح اللـي شيمتـه ماخسرهـا
....................وأشكر جنابـك ياعزيـز النزايـل
يامن علومي بالمجالـس شكرهـا
..................يشكر بذل جهدي على أولاد وايـل
شاف السطور اللي زميله نشرهـا
.....................حاولـت أعـد بدودهـا والعوايـل
وحاولت حصر أقسامها مع أسرها
.....................ولا همّني يالقـرم سـود الدغايـل
اللي على الصاحب يقبقب سحرهـا
..................راعي الحسد يشمت ولا نال طايـل
لو كان شاهد زلتـي مـا غفرهـا
..................ومن قصر شبحه ما يحوش النفايل
وأهل الحسد رب الخلايق عثرهـا
.....................واللـي يبـون يفتقـون الخلايـل
ربي دعا بخذلانهـا مـا نصرهـا
...............وصلّوا على اللي حاش كل الفضايل
نوه بنعمـة خالقـه مـا كفرهـا