وهاهو رد الشاعر الكبير (خالد بن سعود الكبير) على ياسر التويجري......
شف (ما تراه وخـل عنك)العيـاره
واسمع كلام اللي يشـاورك ويشيـر
ياسر..ترى القلب الخضر له صقاره
ما حازهـا إلا نادريـن الصقاقيـر
القلب طيـر وضاريـن بالجسـاره
يتـوق يـم مشوعـات المناعـيـر
جـود سبوقـه وانتبـه لــه وداره
لي حال دون الجول شعف ومعاصير
اصبر لعـل الجـو يركـد غبـاره
والعين يصفى شوفها والصبر خيـر
واللي يـروح يـروح جعلـه وداره
مثلـك يشـوم ولايـلـد لمدابـيـر
خل الطموح تهف ما هـي خسـاره
لا لا تحسـف والحبـارى مزابيـر
((الوايلي))طبعـه برأسـه سطـاره
يشرب قـراح ولا يحـب الغثابيـر
حتيش لو في الكبد بعـض المـراره
من صد خله واحذف رشـاه بالبيـر
الصيد واجد وأنـت نمـر المغـاره
(شاعر) ولا ينقصك بخص وتدبيـر
كم عيطموس تهتـوي منـك شـاره
لا قمت تسخر عذب الابيات تسخير
وأنـا عوينـك كـان ودك بغـاره
نكسب لك البكره ومعهـا مظاهيـر
حنا هل الطـولات وأهـل النـزاره
حنا السبـاع الضاريـه والهزابيـر
عاداتنـا بالكسـب نأخـذ خـيـاره
بالطيـب ولا بالسيـوف البواتـيـر