حضور طاغي .. والذهب من اجود انواع الحلـي
وانتم سـلام الله عليكـم يالرجـال الحاضريـن
يانايف الدعوه مجابه .. جيـت والمخـرج ملـي
والله لو اني وقتها فـي دار ( زيـن العابديـن )
لـ( أكنسل ).. اشغالي واجيك اسوق للطِيب جملي
كـذا تعلّمـت الشهامـه تحـت ظـل الوالديـن
ابوي في ليله ندهني .. قلت : سَـمْ .. ولدّلـي..
قال : ( الخوي لو يطلبك عينك تمـد الإثنتيـن )
قلت : انت تآمر .. بعدها وشلـون ارد الوايلـي
يانايف المقبـل تفضلنـي علـى يـدك اليميـن
وان كان جاب الاصمعي ( صوت صفير البلبلـي )
فأنـا بجيـب العنكبوتيـات لـ( المتفلسفـيـن)
قدّام عينك شفـت كيـف الشعـر قـام ومدّلـي
بطاقة الترشيح بـ(إنموذج ).. لبعض المعجبيـن
كني بشعري يرتكبني علم فـي عـرض جهلـي
ياااااا طول وجه الفكر والتفكير بيـن النقطتيـن!!
وانا ادري اني لو بغيـب سنيـن عنكـم ياهلـي
ماني بناسيكـم ولاانتـم عـن فراقـي دالهيـن
سكنت ( تيما ) لي ثمان سنين تبغون الـ( رلي )
ماكانت الغربه سوى مكسب على مَـر السنيـن
كسبت شرواكم / وشرواكـم مقلّـط لـي طلـي
جيته على فنجال مـرْ .. وقـدّم الطيّـب سميـن
أَبـراي لله وانتـم الويـلان .. والويـلان لــي
واحدهم اكثر من اخو / وان ضاقت الدنيا عويـن
اهل هلا .. ورصاصاهم على عداهـم يصطلـي
قبيلـةٍ مـن فعلهـا تشيـب حجـان الجنـيـن
بالطيـب والله ماتحصّـل مثـل طيـب الوايلـي
يعطي ولايرجي مقابل ..( حلو فعل الطيبيـن )!!
وانـا علـى سنّـة محمـد والكتـاب المنزلـي
مؤمن بمـن ارسـل محمـد رحمـةٍ للعالميـن
عـن الجهالـه كـرّم الله وجـه سيدنـا علـي
والله يلعن من غلا فـي حـب سيدنـا الحسيـن
وانا لاني ( عنكبوت الشعر ).. والاصل ( سهلي )
قصايدي تجـي خرافـه رغـم كيـد الحاسديـن
فكري طبيب / وذائقـة شعـري مثابـة صيدلـي
وقصيدتـي آخـر دوى يمكـن يفيـد العاشقيـن
وانا ادري اكثركم يبي يسمع من الشعـر غزلـي
واكبر دليل اللي طلب قصيدة: ( العقد الثميـن!! )
الحـب لـك فـي داخلـي ياصاحـب الموبايلـي
جاااااري على الهزاز ومسوّي بـلاوي بالرنيـن
فارقتني والدمع في عينـي َ مـن العـام يغلـي
شـف حالتـي الله حسيبـك ماتسـرّ الناظريـن
ضيّعتنـي وانـا حريـص .. ارتّـب َ لمستقبلـي
لقيتنـي لـك آخـر الفرصـه مـع المتقدميـن
وسجلتني لك شيء واقـع بيـن جـدي وهزلـي
وخليتني لـك عبـرة اللحظـة مابيـن الغافليـن
وتركتني لك فـي رضـاي اول مفاتيـح زعلـي
وعلمتني لك وين كذب الشعر حط الصادقيـن !!
لاواهني من هو من ذنوبـه ياابـو مقبـل خلـي
لاواهني اللي كتبـه الله مـن اصحـاب اليميـن
قريـت بالمسنـد روايـه ؛ للإمـام الحنبـلـي
( يقـول ان الله يفـرح بالعـبـاد التائبـيـن )
يالله وانا في رحمتـك ضيّعـت نفسـي بعملـي
استغفـرك يـارب تكتبنـي مـن المستغفريـن
للشاعر صالح السهلي