قصيدة موجز الانباء الادبيه والتاريخيه
والرد على فايز البدراني
ابدى بذكر الواحـد المناني=اللي كفوفه بالندى ممليه
واعوذ به من همزة الشيطاني=اللي تخوض عروقنا الروحيه
وخلاف ذا ياناشد الغسلاني=هاك العلوم بلوحة شعريه
خذها بريشة شـاعـر فـنــاني=معها ضمان النوع والكيفيه
عن هاجس بين العباد اشقاني=وامسى على فكري تقل دوريه
من يوم غابت عـنـدل الغزلاني=ريم الفلاة الناعس الشاميه
اللي زهاها الثوب والفستاني=وزاد الحلا بخدودها الورديه
اللي عـوى من دونـها السرحـاني=وشهب الفجوج وقاعها الرمليه
ولازم يجيها بالغثى ماجاني=والظلم مثل الوعدة البنكيه
وحبيت اناقش فايز البدراني=دكتور علم وحوزته محميه
ومدري علامه يضرب الطيراني=يوم ارتفع بالجامعه كرسيه
ومااقول ماله بالمراجـل شاني=بس العـداله للـبشر مرضيه
يرفـع بلوته عن ورق كنكاني=قبل ارصعه كبوت واربع ميه
وترى الخطا العفوي مع النسياني=تاطاه حتى الفرقة الماسيه
لاشك فايز قلد البستاني=يجمع على الغلطات خبث النيه
بالسوق له خمسة عـشـر ديواني=تشكي جـفاف امطارها الوسميه
شاد العماره واهمل السيساني=وصارت بصبغ العجرفه مطليه
خلا الفحل يبرك على القعداني=واشعل لهايب جمرة مطفيه
ادخل حدود الشام مع جـيزاني=حـتى تسيل بروقـه الصـيفـيه
وخلا الغنم تطرد ظنى الويلاني=خافوا معه بارود جرثوميه
عنزين وقرونه تقل ديباني=وجاب الله المرياع بالبوفيه
وشلون لو معهن ربايط ضاني=كان اكثره عدت ورى تركيه
وطاح الجنازه وارتجى الفرساني=تحت العقيد اللي ربط جوتيه
قال النجاة وذمة الرحماني=للتايه اللي ساقته رجليه
وساقوا عتيبه قفو ابن شبناني=يرمون برقاها على روقيه
هذي سواليفٍ تسم ابداني=ولازم نسجل بالنقى مرثيه
وشريدة الفرسان والشيخاني=قبلي وقبلك حاجته مقضيه
ونعمٍ بأخو حسناء ربيع العاني=ولا هو بحاجة كذبة رمزيه
ترثة شيوخ صيتها رناني =صوارم ما تقبل العانيه
وثورة سند يوم اعلن العصياني=من شاف نار الظلم يزعل زيه
واخاف تبدأ ثورة البركاني=ماهي جهود بالعرب فرديه
والكلمة اللي فعلها ماباني=قبل الدلايل صحته منفيه
ياابن العرب لاتستهيض اشجاني=خرطك يجيب العيد والعيديه
هذي صوارم نجد ياعزياني=وانته تظنه هبرة مشويه
تسعين سيف كفها شاماني=ماهي دفاع السربة الحوثيه
وصدق العرب مايزعل الشجعاني=وكل القبايل له رحيل وجيه
ولا يحسب ان جموعنا خبلاني=واللي يقوله حاجة حتميه
شفنا وثايق نجد بالبلداني=بالغرب لين حدودها الشرقيه
وشفناه فعلا تثبت اللي كاني=لو كان فايز يغلي الصدقيه
ياخذ جراب ولا يجي كنزاني =ويفرق نصوص الوجه والخلفيه
يجيب سطر ولا يجيب الثاني=حسب الهوى والطبع والنفسيه
وهذا البلادي يشهد انه جاني=ماثار عند الكذب لا بناخيه
حيثه صدوق ويكره الكذباني=لو نختلف في فقرة جزئيه
وقول البلادي ينذر الفهماني=ان النقول اللي تجي ملويه
وشفت الكثير بمكتبة اسواني=واصبح بلى الدكتور بالقرنيه
والضحك بعقول العرب يافلاني=مشروع كشفه حاجة وقتيه
ولو جيت اقدم للـغـلط برهاني=هادف ولا هي كلمةٍ كيديه
قبل افرق الصاحي عن الجرباني=يرفض رئيس اللجنة الرسميه
وجتنا علومه مثل حاني ماني=وخلا البحوث بشنطته منسيه
واعذارهم تسري عليك ألواني=وفيها على رفض الطلب ماريه
قالوا درس بالمعهد الساساني=واكمل جميع فـنـونه العلميه
احضر شهادة صدق من ميلاني=بس الخـتـوم الثابته هـنديـه
والـثـانـيـه من مـعـهدٍ اليوناني=واربع من اللي صـورتـه فـوريه
قلت الملوك وقـادة الـبلداني=عند العرب تحكم بلا كليه
والشافعي بالعلم والصنعاني=ومالك مع ابن الـقـيم الجوزيه
ابحاثهم غـطت على الاوطاني=ولا سـافـروا للـبقعة القطبيه
وهذي شهادات تجيك اطناني=من عين شمس وكلها شكليه
دكاتر ترطن بكل لساني=للي يسوق اقساطها نقديه
وسمسارها المبروك مدحت خاني=للي يريد حروفها زيتيه
قالوا كلى المكبوس والبرياني=يوم انت تاكل خبزة جمريه
قلت الفلافل توجع المصراني=ومنها جميع الحكة الجـلديه
قالوا نسيبه قايد الاركاني=وابوه قاد نسورنا الجويه
قلت النسور الصدق مع سلماني=واجداده اللي شادوا الدرعـيـه
هـاتوا جـوابٍ واضح عـقـلاني=يكشف مدار فروقنا الوهميه
ماهي على فرعـون ياهـاماني=والصدق واضح للقلوب الحيه
أدم وحواء للبشر عنواني=ولا ني ولد جـنـي ولا جـنـيـه
ولايختلف عدنان عن قحطاني=ومسكاننا بالكورة الارضيه
وحملي وحمله بالعدد سياني=ونولد بلا ثوب وبلا كحفيه
اول بداية عمرنا وغداني=وعنده وعندي دورة هضميه
وعدة شرايينه مثل شرياني=وكلٍ معاه جـيـوبه الانفيه
وحتى الـمـمـات ولبسة الاكفاني=والدفن تحت الـتـربـة الطـيـنيه
وبالحشر يحشر حـافـيٍ عرياني=ماهو بلكسز ناقلٍ ببسيه
وان كان هي بالهوش ماني واني=نقلط وكل ناقل عوكيه
ونبي الحكم من حروة البلقاني=عن فـزعـة ابن الخال لابناخيه
إما وطيت الذيب او ياطاني=لاجل اقتنع بفروقنا الجسميه
والا فلا ارضى بالعرب حقراني=وش يفرق الخنجر عن الجنبيه
الفـسح للكــذبان والعلماني=ويمنع دعـاة الـفـكـر والقوميه
وارزاقنا ساقه لنا الرحماني=اللي كفل رزق الخلايق شيه
واشبع طـيـورٍ تلـفـح الجنحاني=ودابٍ عمى في ظلمةٍ صخريه
ولو رزق خـلق الله على الديواني=ماعـاش غـيـر البـيـه والبيهيه
وحطوا هميل الغيث في خـزاني=وصارت فـواتير الـمطر شهريـه
وادرج بنود الطرد والحرماني=ان مانـفـع بالخصم والحسميه
وصك يقول ان الفتى جـيعاني=ولازم يحـط الـنـوع والكمـيه
ومن قال جايع يشتكي ندماني=يقـطـع عليه الفول والطعميه
وداحوا ضعاف الحال بالعصياني=والجلد بكتوفه وفي رجليه
ورزق الضعيف يسـاق للشبعاني=ولقمة حسن تصرف على حسنيه
والسجن حق اللي فـتح دكاني=والا دخل عامين بالكيسيه
قالوا مواضيعك عن البدواني=وتجهل فنـون أحـداثنا العصريه
قلت العلوم الـيـوم ماتخـفـاني=وسوسن هي اللي عـنـدنا نشميه
ولاعب فرنسا والعرب زيداني=ماهو شريك بمذهب الزيديه
وشفنا الوثايق والجبل ماواني =وظلم وسواد الامة الصربيه
بس الحقايق قـالـهـا الالباني=وقالوا كبير وفاقد العـقـليه
وان جاز نوم الليل في دسماني=وش حـرم المقيال بالسيليه
واللي يبي نبذه عن الغسلاني=غير الحلا والبشرة الحنطيه
انا ولدت بنكسة العرباني=وهزيمـتـه بالضـفـة الغربيه
بالسبع والستين جت كرعاني=والقصف مثل المزة الهنديه
ليلة ذهـاب حسين للعدواني=لمائير ينذر غارة جويه
من آل بيت المصطفي العدناني=ويريد كسب الاجر بالحجيه
في ثلث ساعه حــاسهم دياني=واعدم جـميع البنية التحتيه
ومن عقب وقف الحرب والنيراني=ظهر الخـمـيس بخـطة سريـه
في نصف ذاك الليل للحـلـمـاني=سار الـيـهـود بهجـمةٍ ليله
وشالوا بها سيـنـاء مع الجولاني=لو قيل هذي حـرب تكـتيكيه
وغارات سيف الدولة الحمداني=ما كل قايد جيش يفعل زيــه
أثر الـزعيم المـحـترم سهراني=حتى الصباح بسـهرة فنيه
ورده تغـنـي للـعرب مجاني=وبليغ صاغ انـغـامه السحريه
ولادتي تجبر حشى الزعلاني=تعويض جرح النكبة الحزبيه
ومتوسط التدريس في شعباني=عقب اجتياز الفترة السنيه
أنور يـبـيـع الـقـدس للعدواني=وديفد وكمبه يضبط الوزنيه
بيجن خذى السادات بالاحضاني=والبيت الابيض شبـته عصريه
ثمان والسبـعـيـن علمه جـاني=وباعوا صكوك ديارنا القدسيه
وهذا سبب قتله من البطراني=خـالـد وراع الطـلـقـة الناريه
والجامعه جـيـته وانا حيراني=بقسم الاصول الخمسة الدينيه
وصدام يستسلم بحرب ايراني=وفيها شربنا النكبة البعثيه
جاء للجزاير واعلن الخسراني=وجيشه سرى للجـارة الشرقيه
من مقطع الفلم الخسيس الداني=عاف الحـلول الخمسة السلميه
وأثر السبايب والعطب يافلاني=جيش العرب للحالة السلميه
وسلاحهم للدار والجيراني=وقمع الشعوب بهجمة وحشيه
تالي سلاح العسكر الالماني=عقب اندحار الثورة النازيه
مصنوعةٍ في عهد ابوسفياني=واكثر نقوش الصنع فرعونيه
ماتقتل الجربوع والجرذاني=لو تنسدح عنده على زوليه
دبابةٍ منظارها عطلاني=ووسط البلد مايشتغل بوريه
بس المسجل صافي الشرطاني=وكل الاغاني فيه رومنسيه
وغـمـارته تبكي على النعساني=كـن المراتب بدلةٍ مكويه
ماتلحق العميان والعرجاني=وتظهر عشوش الطير في شاصيه
وسواقـها تحت اللهب عرقاني=وزيته قعد يقطر على رجليه
والله يلو جيناه بالعصياني=نترك صـعـاريره تقل لوميه
هذي وصوف سلاحنا الميداني=ووسط البنوك اموالها الفعليه
واخبارنا كان الرحيم احياني=من قرن لين وقوتنا الحاليه
افرق دخول الصوم عن شعباني=واضبط حساب الدورة الكونيه
ودخول نجـم الوسم والميزاني=وتحديد وقت اعيادنا الدينيه
لو ماقعدت ارجي حسن كراني=معه العصى بالنـشـرة الجويه
والموتر الوارد من الياباني=بالسعر فوق الخردة الصينيه
واللي يهاجـمـني مع الجنحـاني=اخطر من اللي هجمته راسيه
والشوت الاقشر بالفريق الغاني=اما هدف او ركلةٍ ركنيه
والموت في مرتدة الطـلـياني=دايـم دفاع وهجـمته ناريه
واذا بغيت الدوري الاسباني=الـبـارشا وريال هـم دربـيـه
وسلة مريكا نجمها جورداني=وفريق شيكاغوا خذى الفوقيه
لو ماسـمعنا خـالـد الحرباني=يزعـج علينا نـغـمـة صوتيه
ورحال ما شاله حـمد شناني=هذي لعيسى في مجالس غيه
والراجحي غطى على الـفـرداني=والعام مثل اليوم ميه الميه
للي عيونـه تضبط النيشاني=ويقوى يصيد الظبي بالسنكيه
والفرق كله خـطة السلطاني=سمى حـميس الكرش كمونيه
وخطط يهد الروس بالافغاني=من شان هدم الجبهة الروسيه
وعقبه يريد الفاو من طهراني=ويزحف يريد الثروة النفطيه
والا قنابل مصنع السوداني=كله لكـتـم التـهـمـة الجنسيه
ونهج السلف والمنهج الاخواني=وتحرير حق الامة الكرديه
ولاتقترب للقدس يالغسلاني=والا تصير معادي الساميه
واترك كتايب عون في لبناني=وتهديد أمن الدولة العبريه
والا نداء حرية النسواني=ودفع الوسام لـقادة الحريه
أو دعوته في ملتقى الادياني=ولافرق في سنه ولاشيعيه
ودعم الهـنود لغيظ باكستاني=وفكرة صواريخ الردى الكوبيه
واشعال نار الحرب بالغلباني=لاجل السلاح وسوقها الشريه
شاف المصانـع مخزنه ملياني=ويخشى هبوط النسبة الربحيه
ولايختلف به بوش عن ريجاني=نفس الغيار بقـطـعة اصليه
وهـجمات سبتمر كلام ثاني=وصفعة خشوم ابراجها العاجيه
امسى يهدد من يصير الجاني=ويمكن تجي له قـنـبله الذريه
سعر الـمـريكي دوم ماينهاني=وذبحه حرام وحرمته دوليه
دامه سلايل راعي الثيراني=اللي اباد الامة الهنديه
ودم العرب قيمة ذبيحة ضاني=لو مات بالعبارة المصريه
وبرج التجاره طايح العمداني=زلزل عـروش الـقـادة الصوريه
وكلٍ يخاف انه طلع خواني =وإنه صنع بارود جـرثـوميه
وكل العرب ساروا على المزباني=وشالوا تبرع دم بالطبليه
وبيوت غــزه كلها دماني=وياويل من يهديه بطانيه
ولاجل البراءه عـزوا اليتماني=ودرزن شهود ختومها شرعيه
وعزوا ضحاياهم بقلبٍ حاني=عن هول قصف الغارة الوهميه
الا زعيم بات ليله هاني=يسكن شمـال الديرة الكوريه
هذا وتصنـيـفه مع العدواني=ماراح والا كز له جاهيه
وماجاه بوش يقـرقـع البيـباني=ويطرق نوافذ بيته الخلـفيه
هادي ولاينشد عـن اللي كاني=ويقدر يحشر اللي بــه الجنيه
صمم سلاحٍ يكتم الفسـقاني=وياصل على تكساس بالفجريه
فـيها اللهايـب تدفي البرداني=ومن الودك وقرونها مدحيه
غز السلاح الصبح بالميداني=ورادار عبر الطاقة الشمسيه
ونايم بظل الـورد بالبستاني=وتسعين صـاروخٍ مهي شكليه
تشبه صروم النسر والعقـباني=وبالعيد تصلح للعدى عيديه
محدن يحارش نايم الديـبـاني=وشره على العصفور والسحليه
يبي الـمعزه لو رقــد جيعاني=ولايرتضي هونه سوى السوقيه
وحنا نشيد بفعل ماجـلاني=وهو حاس كل شطوطنا البحريه
وقصة رجوع الشرك والاوثاني=رغم اخـتلاف الصيغة الجـينيه
وغزوة حسن في يام من نجراني=وهو مامعه بارود كـيـمـاويه
ومقتل حجيج البيت من همداني=كيف استوى بأحكامـنا الفـقهيه
نـبـذه توضـح للـعـرب ماكاني=وتكشف جميع اسرارنا البيئيه
اما الدراسه معهدي برزاني=ونغمة مسار الصوت بقعاويه
ورفضت اسير بمنهج الكذباني=أو مـنـهـج التطبيل والرمزيه
وجبال حايل بالفخر مسكاني=اللي سكنها حـاتـم وماويه
والمدرسه في مجلس الشيباني=وتخصصي بديارنا النجديه
وعلمي مهو معروض بالدكاني=وممنوع كود بوصفة طبيه
عليه خـتــم المنع كالدخاني=ولازم يصير بخلوة شرعيه
لو هو حلال بمذهب الشوكاني=وجايز بقول الشيخ ابن تيميه
جبته من السفرات للبلداني=وحبي لجـمـع اشعاره المنسيه
من روس شيبان ورى الظلعاني =ومن الشمال لدورنا القبليه
مابين قاف بديوي الوقداني=وفيصل عقيد اللابة المريه
والا قصيد الفغم والهبداني=والا جموع بطوننا الطائيه
والا الغزل مع محسن الهزاني=والا قصيد الحكمة اللاميه
اتعبت فيها ناقتي وحصاني=من قبل اعرف الشاشة الفضيه
يوم القـصـيد الجزل بالشرطاني=قبل العقود وقيمة الدفعيه
افهم قصيد الحـضـر والبدواني=ولي بالـقـوافي بصمة شعريه
وكان السبب بالمنع صدق لساني=ولبس العقال ولبسة الطاقيه
ماترهم البدله على سيقاني=ولا اجيد لبس البدلة الملويه
ضبطت زولي تقل جنتلماني=بس السوالف غصب صحراويه
وكان السبايب جيبي الطفراني=ليتي مكنت الطفرة الماليه
كان العرب تدعين باغسلاني=والصيف في قرطاج واشبيليه
عن لاهبٍ كنك تحت شكماني=خلان كني شنــةٍ مطويه
واذا منعت الفسح عن ديواني=ماراح تبقى قـيـمـته مخـفيه
يكفـين قافي مع بيان لساني=وشعرن وصل للديرة القبطيه
فيها لباقي جيلنا تبـياني=مثل الزهــر بالواحة ريفيه
وتصلح لتاريخ الـعرب عـنواني=عـبر الـقـرون الخـمسة الهجـريه
لو ماشـهـد لي بالـعـرب غساني=اللي بـرع باللجـنــة الـفـنـيه
واللي منعني خـوضة الـميداني=كون القصايد عندنا حربيه
وصارت حـروب للعرب واكواني=وتالي نـتـايـج حكـمها جـبريه
خــلا مسار الشعـر والقيـفاني=واقـفـى بسوق الـمـال والربحيه
لو ناتج التصويـت للـعريـاني=افضل ويكتب فـوقــها جمعيه
شيٍ يشـوفـه ضـايـع العـمياني=ومن يستمع لاخـبـارها اليومـيه
ومااقـول في حكامها نقصاني=بس القصايد حـاجة شخصيه
اشرح بها اللي داج في وجـداني=واذكر عـلاج امراضنا الكبديه
قالوا خلاصة هرجنا يافلاني=بحثك خلاف نهوجنا الرسميه
وحنا ضـعـاف الحال والعظماني=ونخاف قطع الرزق والخرجيه
قلت اقبلوا شكري مع العرفاني=وهذا دليل الجهل والرجعيه
وقبل انتهي من موجز الطفشاني=جيت العجوز وعمتي فوزيه
قالت تراك اخطيت ياذيباني=وحرمت سبع الغاب من حصنيه
ذبح العرب في غارة النصراني=ولا ذبحهم بسجوننا السريه
قلت اشهد انك صبتي النيشاني=وهذي ختام ابياتنا النونيه