السلام عليكم ورحمة الله وبركاته
حروف رماح في وجه من يعيب اهل الطيب
فيه وجه اهل الغيبه والنميمه ضعاف النفوس في زمن الرويبضه
وهو الشخص التافه يتكلم في أمر العامة
ياعايب اهل الطيب عالج معـايبك=ذنبك تـعـدى المبتلى فـي ذنوبه
لاشفت طيب الناس ثارت لهايبك=على الذي دربـك قـصر عـن دروبه
لا مانعٍ عـن عرض غـيـرك كتايبك=ولا سرت مثله مع هل الطيب نوبه
هذي ركاب القوم فاقت ركايبك=وثوبك قـصـيـرٍ عـن تفاصيل ثوبه
دام الجـرب يجدع طوارف حلايبك=عالج بحالك لين تبرى جنوبه
وعـز الله انه ماربح راس شايبك=دامك من اللي بالقوافي حروبه
اترك مصايبنا وعالج مصايـبك=واكرب خـبوبك قـبل تكرب خبوبه
رح للمحاكم لاجـل تـنهي طلايـبك=والا علاجك عارفيـنٍ حبوبه
ياعايب اهل الطيب عالج معـايبك=ذنبك تعدى المبتلى في ذنوبه
لا رافعٍ صيتك ولا صيت شايبك=وراع الجرب يقعد يهارش جنوبه