مناسبة القصيدة :
في حفل تكريم الدكتور بدر عبدالله العردان الشمري بعد حصوله على المركز الأول في
مزاين شمر ( فئة الوضح )
تغني يا هجوسي و انظمي عنقودك الفتان=ابفخر باول النظمه و باوسطها و تاليها
تعالي حثي ركاب الغلا من فكري المليان=و على دار الجزاله يا هجوس الشعر سريها
مدام اني حضرت وموقفي باللازمه قد حان =بيوت الشعر من قوّ المعاني لازم ابنيها
اعديها على روس الجبال و شامخ البنيان=و انوخها مثل ما ينوخ القعدان راعيها
بَعَدْها يا سلام الله على اهل المعرفه والشان=حسب سلم العرب و سلومنا لا ما نخليها
تحيه صافيه من قلب صافي تلفت الاذهان=تحيه للرجال اللي كريمه في مباديها
رجالٍ شانهم شان و بهم يا ماحلا القيفان=البسها من ثياب الفخر و ارجع و انقيها
انقيها من التلفيق و التزوير و البهتان=و اعديها على روس المعالي وافتخر فيها
ازينها و ارصعها هنا باللول و المرجان=و اعطرها بريح العود و اصخر معانيها
واذا قالوا بيوتك قلت هذي دلة الرسلان=افوحها على نار الغلا في صدر مركيها
واسوق من الفناجيل الي تنومس حفلة السلمان=على رجالٍ لهم قدر و معزه عند داعيها
و اخص المسعد رجال الثناء والجود والاحسان=شغاميم الرجال اللي تشرف في مساعيها
جِزوا راع الوفاء و الطيب بالتقدير و العرفان=يا حي السمعه اللي ما يموت اللي مسويها
ابو فارس كريمٍ من رجالٍ تكرم الضيفان=ورث طيب المكارم و المكارم ما يخليها
ورث طبع الوفاء و المعرفه و العز من جدان=لهم سيرة طويله بالمراجل ما نوفيها
و ابو فارس طلع من بعدهم و مثبت العنوان=فعوله ترفع الراس و تنومس في طواريها
رفيع الذات محمود السجايا باللزوم يبان=على شيل الحمول الكايده كفه مضريها
اقول الحق و اسأل عن بدر عبدالله العردان=يجيك العلم و علوم المراجل ما نخبيها
تبي تلقى ما هو برهان لا والله كذا برهان=تشدك سيرته و ايضاً يشدك صوت راويها
يروم العاليه و العاليه بعيونه النيشان=يجيب الاوله و اتلا المراتب ما يدانيها
وتميّز يوم ساق الوضح ثم داحم بها الميدان=و رفع راية بني عمه و لا خيب هقاويها
كسب مجدٍ جديد و لا تردا ممثل السلمان=شمخ بالاوله و الوضح من يقدر يباريها
ابارك له و ابو فارس على اللي قدمه لا هان =من ايام الصبا رجله على العليا معنيها
ولد عودٍ معقب له رجالٍ مدو الذرعان=ومثل ماقالوا رجالٍ فعايلها تقديها
وانا من جتني الدعوه تخايرت الحضور و زان=وقوفي عند ربعٍ بالكرم يا طيب اياديها
اقدم ما طرا للي لهم بين الحنايا شان=و اقلط دلتي و آقف على المنبر و اقهويها
اقهويها من بيوتي وانا شاعر طليق لسان=عروقه من غلا شمّر مشبعها و مسقيها
وانا لو ينكشف صدري تشوفون الغلا ميزان=كفوفه بين شمر و عنزه مبطي مساويها
اخاوي واحدن منهم و احس انه من الويلان=واحس اني من عيال الطنايا كل ما اجيها
تخاشرنا المكارم و النسب من ماضي الازمان=و تحاشمنا على عسر الظروف و لا نداريها
و ختاماً يا سلام الله على اهل المعرفه و الشان=حسب سلم العرب و سلومنا لا ما نخليها
و سلامتكم