زمان راح يالافي
لا تجيب ذكرى زمان راح يا لافي = خله على طية النسيان لا تجيبه
اخاف يطري عليه زين الاوصافي = اذكر زمان الغضي واذكر تعاجيبه
مريت دار سكنها ما بها اشوافي = مدهال زين الوصايف عاوي ذيبه
دور نبيه وتعدى معطي قافي = علمي بوقت الوناسة يوم علمي به
يوم ان عمك هكالايام غريافي = مستانس كل مرقاب يغني به
ماكدر الوقت باله خاطره صافي = بأول شبابه غليم ما ظهر شيبه
وانا عليه بشيت خل رفرافي = والمرعز اللي هدبها زاهي جيبه
قضى الهجيني ونطة كل مشرافي = من يوم راح الهوى واخلت مراقيبه
هذا القليب اللي وردناه ياحمود
هذا القليب اللي وردناه يا حمود=وهذاك منزلنا ومنزل عربنا
وهذا السماد و ماقد النار موجود=وهذاك منزل بيتنا يوم يبنى
قدام بيض أيامنا تنقلب سود=قبل خبيثات السنين تحربنا
يا مسندي ما ينفع اللوم يا حمود=على السنين الماضية لو عتبنا
والله يا لولا هلة الدمع منقود=لاشكي زمانٍ طيب وقته عقـــبنـــا
وقت تخبره يوم أنا وأنت يا حمود=يا ما ضحكنا به ويا ما طربنا
يوم الغنم تسرح بها نوف وعنود=مستانســـين مع طوارف عربنا
مكيفين بونسة ما لها حدود=لايام تالي وقتنا ما حسبـــنا
كم جادل يوم العرب صدر وورود=تشـــر لنا يم الوعد و تهزبنا
وياما وردنا صبح الأمطار يا حمود=وياما ملينا من الخباري قربنا
بالصيف مع صفقات عمري ومحمود=نشره نجيب الكسب لو ما كســـبـنــــا
واليوم ما يسرح لهم ناعم العود=وش عاد لو نرقى الرجوم وتعــبـنــا
رعيانهم صاروا بكستان وهنود=قلب علــينــا وقتنا وانقلـــبــنــا
الشيب ما يحتاج تثبيت وشهود =يا حمود عقب شبة العمر شـبــنــا
(من كمل الستين لا يرجي الزود=غير السجود , وقول يا رب تبــنــا )
مدري متى لشيوخنا تطلع الشمس
ولي ديار جيتها مالها جنس=زادت على كل الديار بغلاها
مقيظها طيب ... ومسكانها ونس=ليا نسنس الغربي وذعذع هواها
لذة طربها يوم فواز واورنس=معهم نهج طيب الديار وحلاها
بس المنازل خالية ما لهم رمس=ولا عد اخو فوزة برجله وطاها
والشيخ ابن مرشد ترك ديرته حمس=وديار مصوت بالعشا من ولاها
تبدلت ما هي سوالف نهار امس=قعد لهم حكم الدول وعملاها
شفت المنازل و انعمس خاطري عمس=والعين هلت دمعها من عناها
مدري متى لشيوخنا تطلع الشمس=ويجلي ظلام الليل عنهم ضحاها
ويشرق عليها نورها مثل قبل امس=ويسكن قديم الدار حي بناها
ونرجع على الشنبل بجموعنا الخمس=وعنها نزيل ظلال غيم غشاها
نظم القوافي صميم القلب هيضهن
نظم القوافي صميم القلب هــــيـــضهن = من راس تل تهايف صوب ريـعاني
وطلعت قورن سراب القيض ينهضهن = من دونهن يوم يزمي تقل غـدراني
جاوبت ذيبٍ اصـــواته ما يريــــضهن = عوى على عقلتٍ من بين جيـــلاني
ذيـبٍ رقــا بالعـــوالي ثـم فــيــضهـن = اقبل عليه المسا ما شاف زيـــلاني
راحت علينا اسنين من تــعــــوضهن = لو جا عقب وقتهن سيلٍ ورجعاني
ماغير ذكرى هكاالايام حافظــــــهن = ذكرى زمانٍ عـزيتـه يــوم خــلاني
والبيض الي شـبنا من غــمايــــضهن = صارنٍ عجايز وحنا اليوم شيبــاني