خذ راحتك ماني بجابرك تاتي=ولاني بلك يا اغلا المخاليق طلاب
وقت التشره والمطاليب فاتي=اربع شهور لجيتك احسب احساب
من لهفتي كن الدقايق اعداتي=وكن الثواني بيني وبينها انشاب
حتى الليالي مايمرن عصاتي=ياثقلهن يمشن بطيئات ورتاب
لجيتك اعد وارجي واحاتي=ولشوفتك مشتاق والشوق غلاب
اتخيلك حتى وانا في سباتي=واشوف زولك يالغلا وافتح الباب
وسايدك عطرتها يا مناتي=وزينت لك حتى عبرات اعذاب
بستقبلك فيها قبل لاتباتي=ياعطر هالدنيا ويا اعز الاحباب
خذ راحتك وقت المعاذير فاتي=ولاني بشرهانه ولاعندي اعتاب