قم سوّ ما يصبغ على الصين يا عيد=دلال مثـل البـطـوط الهـدافـي
احمس وزينها على كيـف ماريـد=بدلال ما عنهن سنا النـار طافـي
ودق النجر حسه يجيـب الملابيـد=يجلي نواد اللي من النـوم غافـي
تأتيـك دكـلات القـروم الاواليـد=ويكثـر علينـا قوكـم والعوافـي
ادغث لها حفنه من الهيـل لاتزيـد=والزعفـران وروكـه يالسنـافـي
وسقها لذربين الرجـال الاجاويـد=وصبه للي يثني خـلاف المقافـي
اللـي يـروي حربتـه بالمطاريـد=لعيون من قرنه على المتن ضافي
بنت الشيـوخ مخضبيـن البواليـد=حريبهـم لـو هـو بعيـد يخافـي
واثنه على اللي وأن لفوه المسانيد=لا يا بعد خطـو الكـذوب الهلافـي
وحنا الى صرقع ضبيـح البواريـد=وصار المقامع دون حم الشعافـي
وإن لبس المركب بريش الهداهيـد=عدوّنـا نـودع عظامـه سوافـي
ناخذ على جمع المعـادي ملاكيـد=ونمشي على وضح النقا بالكشافي
وأن درهم الصابور ما من تصاديـد=كم فارس صارت اعظامـه تلافـي
مركاضنا يشبع به الضبـع وايعيـد=والنسر اللي بطنه من الجوع هافي