** الشعر الجزيل **

[سعد النفج]

يامدور الشعر الجزيل الليله الشعر الجزيل=ناقف مواقيف الرجال اللي تعكف اشنابها
والشعر لو قالو حمل ماهو على متني ثقيل=يخف لو زاد الحمل والمسأله ماهابها
علوم المراجل درعي وشعري هو السيف الصقيل=لياجت مواقيف القصيد و جمّعت كتابها
اخيل مع ناس ٍ رقت مرقاب الاشعار و تخيل=القى مكان بزحمة العالم على مرقابها
صيد السمين ان فاتني قفيت ادور له بديل=خله يروح و كل صيده حظ منهو جابها
ناس اتزاحم عند باب الطيب و العلم الجليل=وناس ٍ على باب الردا ياشين مشي اكعابها
ناس ٍ تقدر خوة الرجال و ترد الجميل=وناس ٍ جحوده ما تقدر ناسها و اصحابها
اشكال و الوان و تعدد بالفصيله و الفصيل=لو ضحكو لك القلوب اللي خلقها ادرابها
والناس قبل العام كانت تحمل الشي القلبل=واليوم يا كثر الطغا في لبسها و ركابها
واللي يدور من ورا عروض البشر ماله حصيل=والجلسه اللي ما تشد الراس وش يبغا بها
ومن قال شي و لاتحرا للحقايق و الدليل=مثل من هدّ البيوت النابيه با طنابها
والحظ حبل من السما يختار للناس و يميل=حبال ترفع ناس والمقرود ما يرقا بها
والله يعين اللي بغا له شي من عند البخيل=مثل من يطلب صناديق ٍ مقفل بابها
واللي يفرق مجتمع للناس و يشب الفتيل=إقصر عنه فنجال من دلتك يا صبابها
والدنيا هذي فانيه والناس يقفاها الرحيل=يالله عسانا ما نبديها و لا نشقا بها

اخوكم / سعد شايش النفج

[طلال الايداء]

صح الله لساانكــ

اخوي سعد

وكفوووو يالجزل ونص جزل يستحق الوقوف عنده

ويشرفني اني اول من يرد عاى هالنص

تقبل مرور اخوك طلال الايدااااء

[الجوكر]

ومن قال شي و لاتحرا للحقايق والدليل
مثل من هدّ البيوت النابيه با طنابهـا

القدير

سعد النفج

هنا كان للأحرف قيمه..


هنا كان للكلمه معنى..


هنا كونت قصيده احتوى مضمونها الفكري والحسي

على اجل وارقى الصفات لدى الأنسان كأنسان



حضرت فقط


لأسجل اعجابي

دمت للأبداع

[نايف الشبيعان]

الأخ العزيزسعد شايش النفج

إسم القصيدة طابق القصيدة بكل المعايير

قلّ مانجد الجزالة في هذه الأيام التي تكثر فيها القصائد

إلا من سعد النفج ومنهم بمستواه الشعري


صح لسانك وبنانك على هالرائعه التي مهما قلنا بها نعتبر مقصرين


تقبّل مروري وإعجابي

[سالم صالح]

الشاعر


سعد النفج


دائما وانت مبدع ولكن ابداعك يشع نورا من الحكمة والتجارب


لله درك وتقبل تقديري واحترامي

[هندي المقبل]

الرائع سعد النفج

دائما مبدع بكل حالاتك

صح الله لسانك وسلمت بنانك على هذه القصيده التي لا يجيد حبك معانيها الا سعد

عسى ايامك كلها سعد

[البدر]

قصيده تحمل جزل المعاني من شاعر تعودنا منه الجزل


سعد صح لسانك