دام العريفي بدع قيفان = على الطروق الهجينية
غنى على مشية الريضان = بارض الحدود الشمالية
اجاوبه يوم انا ولهان = والنفس فاضت وهي حية
العام في ديرة الويلان = اولاد جعفر خصوصية
في تلعة ن من ورا عرنان = قلنا نبي ننزل شوية
نبي نروقب على الضلعان = ونظبط لنا قرص جمرية
سحابة ن ساقه الرحمن = جتنا من الشرق ديمية
يوم اكتمت كنها دخان = تقادحت تقل نارية
صوت الرعد فزع العربان = والبرق يكشف سنا ضية
قمنا نتراكض على المزبان = يوم خبطتنا الركامية
وصبح المطر سالت الوديان = وقامت تطارخ خبارية
وصوت ام سالم تجيب الحان = غنت على بارد المية
وانا احمد الواحد المنان = يوم اكثر الارض مروية
مامرمثله هاك الازمان = قبل الثمانين هجرية
سوالف قالها الشيبان = يوم اذكروا حالة البية
وركد حطبنا سليل حصان = سلطان ماشفت انا زيه
على القهاوي تقل سكران = لياحط بالصفر برية
مكملا عزبته ذيبان = عزي لمن ماكسب زيه
لو خوته تنشرى باثمان = يفداه مال السعودية
يوم البدو شافوا الضيان = جونا مع الليل دورية
سلاحهم بندق الالمان = وكلا تحيزم بشبرية
ويوم عرفونا من العربان = قالوا هلا مرحبا حية
واللي نشدنا عن العمان = وتعازمونا السنافية
والعذر للاجودي عجلان = بنا على الطيب ماوية
والصبح غرنا على القطعان = غارة رخى ماهي حربية
لنياق من يشبع الجيعان = يوم المصاريف ملوية
في رفته مجمع الضيفان = أجناب والا بني خيه
وانشهد ان الكريم معان = يجيه رزقه على النية
وافطن ترا واحد الرعيان = يطيب من طيب راعية
أما صبوحا ملا القدحان = والا عزيمة عريضية
واللي هويته من الخلان = اللي كوى وانجض الكية
هي حلفت لي ثلاث ايمان = تقول انا لك وانا حية
عزي للي يصدق النسوان = وعودهن دوم منسية
عاشرتهن يوم انا طربان = يوم الزمن ضاحكن ليه
ولقيتهن طير ابن برمان = فوده على صاحبه حية
جتك التماثيل بالقيفان = على الطروق الهجينية
يوم اذكروا حالة البية هي البيئة عند البدو
02/11/10, (09:13 PM)
خباري عرنان ... مجاراة نديم المجرة
العرض العادي
