<<< الأسهم >>>

[حمد الضوّي]

أعزائي الكل يعلم بإن أغلبية الشعب السعودي تذوق مرارة الأسهم إلا من رحم ربي
لقد سمعنا ان هناك من باع منزله أو باع سيارته وحصل ماحصل , الله يعوض المسلمين خير
وحبيت أنني أضع بين أيديكم هذه القصيده متمنياً أن تنال شئ من إعجابكم


>>>>>> الأســــهـــــم <<<<<<

في عامنا الماضي بداية محرمْ=أنا وبعض من زملاي إجتمعنا
وقمنا نتناقش في مواضيع الاسهمْ=والكل منا قال عنها سمعنا
قالوا بها مكسب ولافيه تحلمْ=وحكوا لنا بالمغريات وطمعنا
البعض منا قال ولشوركم تمْ=والبعض الآخر قال روّح ودعنا
وصرنا مع اللي خموا السالفه خمْ=نمشي بلاتفكير في ماصنعنا
يعني على ماقيل ناس ٍ غشمشمْ=وبكل قوّه للهلاك إندفعنا
ومن يوم بكره للبنوك نتقدّمْ=باوراقنا ومايطلب البنك معنا
كل ٍ معه تعريف جاهز مختمْ=ماندري إنا بالمحابل وقعنا
وعلى مدير الفرع قمنا نتزاحمْ=قال بطلبكم للإداره رفعنا
ومن بعدها كل ٍ لقرضه تسلّمْ=وبداء التداول وإشترينا وبعنا
نضرب بها مانعرف الكيف والكمْ=تهنا الطريق ولاعرفنا سنعنا
لو إنتظرنا شوي حتى نتعلّمْ=أفضل لنا لكن لها ماربعنا
قمنا نضارب والدراهم تليّمْ=ولياحصل مكسب بالأكثر طمعنا
إذا كسبنا ننبسط ونتبسّمْ=والعكس لامنا خسرنا جزعنا
نتعب ونجمع والهوامير تلهمْ=حسبي عليهم ضيعوا ماجمعنا
ليامن قلنا ننتعش ونتقدّمْ=طحنا بهامور ٍ كبيرٍ بلعنا
ولتوصياته نتبع ونتعالمْ=أثره يوصي والخبيث يخدعنا
وطاح المؤشر والخساير تفاقمْ=وبدري لصالات التداول فزعنا
قلنا علام السوق قالوا تضخمْ=بين المؤشر والهوامير ضعنا
واصبح علينا الوضع صعب وتأزمْ=والمشكله لحلولها ماستطعنا
أنصحك ياناوي على السوق تِقدِمْ=طعنا إبتعد عن دوخة السوق طعنا
خذ الخبر مني وغيرك معلّمْ=قبلك ترانا من غثاها شبعنا
الكل منا صار للبنك ملزمْ=ياما دفعنا أقصاد ياما دفعنا
وصل التقاعد والمعاشات تحسمْ=والبنك عشر سنين فيها لطعنا
وديوننا صارت تزيد وتراكمْ=وبالمختصر خالين الايدي طلعنا

""" وسلامة الجميع """

[بنت الكحيلا]

صح لسانك اخوي حمد الضوي

والله يعطيك العافية على القصيدة الرائعه

ابدعت بما كتبت بارك الله فيك

لك شكري وتقديري

[سليمان مفضي العنزي]

صح لسانك

كلام في الصميم وشعر جزل

تقبل اعجابي

[محمد بن موسى]

درع عنزة / حمد الضوّي

لا فظ فوك لافظ فوك لافظ فوك

صح السانك واعتلا شانك على هذا النص الرائع

والذي يعبر عن ماعاناة الشعب السعودي من مآسي الاسهم ونكباتها

لله درك اخي على هذة الجزاله وتذليل القوافي

ونص ياحمد يشفع لك غيابك الفترة الماضيه

فشاعر بقامة حمد الضوّي نتلهف لكل مايقدمه من نصوص

فلا تحرمنا جديدك

تقبل فائق الود والاعجاب

[مشهور الرشدان]

((درع عنزه ))

صح لسانك وعتلا شانك قصيده جزله ولا نستغرب الجزاله من شاعر بحجم حمد الضوي
لله درك ولاتحرمنا جديدك
محبك ابو حفص

[حمد الضوّي]

المشاركة الأصلية كتبت بواسطة بنت الكحيلا

صح لسانك اخوي حمد الضوي

والله يعطيك العافية على القصيدة الرائعه

ابدعت بما كتبت بارك الله فيك

لك شكري وتقديري

بنت الكحيلا


صح بدنك والف شكر على المرور الذي أنار متصفحي




أجل التحايا

[حمد الضوّي]

المشاركة الأصلية كتبت بواسطة سليمان مفضي العنزي

صح لسانك

كلام في الصميم وشعر جزل

تقبل اعجابي

سليمان مفضي العنزي



صح بدنك و الف شكر على مرورك العاطر







تحايا