ديوان الشاعر::: تركي صالح:::

[تركي صالح]

(حب واخلاص وسلام )

الموقف الليلة فخر ما هو بموقف والسلام=يا لله وفقني وأنا طالبك طيب أعمالها
ليلة شرف ليلة فرح ليلة هتافات ويئام=كلاً تمنى يظفر ويبدع بحسن أقبالها
تكـفى تجمل يا قصيدي واختر حروفك تمام=أبي الجزيل من المعاني تصدح بموالها
فرايداً تكتب ويبقى بينهن كل انسجام=يعني أبي كل المعاني تفتخر بجزالها
للشعر طابع يا قصيدي يختلف عن كل عام=يعني تجهز والجزايل واجبً نعنالها
أحمدك أنا يا لله نلت من الشرف أغلا وسام=عزا لله أني نلته الليله وأنا من نالها
نلت الفخر نلت المعزه والله أني ما أولام=لا قلت أنا روس المعالي كاسبً منزالها
هلا هلا يا لفيصلي نسل الملوك ابن العظام=هلا هلا بنبع الكرم ساس العطاء ووصالها
فيصل يشرفنا وحنا نفتخر باغلا مقام=أنشهد اليوم ذكرى تفرح برجالها
بقلوبنا يا أمير والله حب واخلاص وسلام=هنا نحفظه بالوفاء ألا الوفاء يحلالها
مرحوم يا صقر الجزيرة باني المجد الإمام=صقراً بنا تاريخ أمه تفتخر بفعالها
هنا هنا أربع ملوك الله يرحمهم دوام=مشوا على نهج المؤسس ورفعوا منزالها
وهنا هنا خادم بيوت الله طيبه والحرام=والله ما ننسى ابد كلماته اللي قالها
ابواً حنون وقائد محنك إذا اشتد الزحام=المعضله بأمر الولي حلالها حلالها
وعضيده الأيمن مفيض الخير سلطان الهمام=ولي عهد المملكه قائد دفاع أبطالها
وهنا هنا آل السعود بدمنا والحق دام=نحيابهم لا والله ألا لجلهم نحيالها
يا سيدي فيصل سلام الله عليك أنقى سلام=من شاعراً جزل المعاني والجمل يسعالها
يا سيدي فيصل وقفت بكل حبً واحترام=من فرحتي بمواجهك نفسي تغرد حالها
يا سيدي فيصل تشرفت بوقوفي بالامام= واكبر شرف لمصافحي يمنى تعز رجالها

( يا الشاعر المفتون )

يا الشاعر المفتون للشعر وقفات = للشعر اساس وعارفينًٍ اساسه
متميزٍ منذ العصور القديمات = ولليوم باقي في توهج حماسه
باقي على ذيك القيم والسيادات = مار البلا بالشاعر اشلون ساسه
شاعر يجيب ابيات شعرٍ جزيلات = وشاعر قصيده بالتفاهات حاسه
وشاعر جزيل ابداع ماله نهايات = وشاعر على الابداع جاب انتكاسه
وشاعر ثقيل ولا يحب التفاهات = وشاعر تفاهاته ملت كل راسه
وشاعر تفنن بالبيوت الفريدات = وشاعر ابيوته أمتلت بالتعاسه
وشاعر نثر من فيض شعره مقالات = وشاعر قصيده ما تعدى مداسه
وشاعر عطى للشعر قيمه وغايات = وشاعر عطاه الشعر مركز رئاسه
بالمختصر ما عاد للشعر لذات = من بعد ما قسم فصول ودراسه
تغيير جذري بالقيم والعبارات = وكلاً على ما قيل يحصد غراسه
شعار واجد والجزايل قليلات = واكثر قصيد اليوم ضحك وناسه
ولظلم ظميري فيه بالشعر باشات = قصيدهم جزل ويفوق الحماسه
أرفع لهم يمناي قدر وتحيات = شاعر ولي بالشعر نظرت فراسه
ويالشاعر المفتون للشعر وقفات = وكلاً على ما قيل يعرف مقاسه
أن كان لك بالشعر عدت طرقات = ابشرك شعري قويً أساسه

( اربع اخوان )

أربع اخوان ان قلت لك اربع اخوان=كان سوى كانوا مثال الاخوه
ما فيهم اللي خانه الوقت وانهان=من صغر عاشوا في تكاتف وقوه
مضرب مثل للناس في كل الاحيان =في طبعهم في طيبهم والمروه
عاشوا سعادة عمرهم دون نقصان=في بيت واحد واستباحوا هدوه
(فجاءه ) تغير حالهم بعد ما كان=بالقمه اصبح في نهاية دنوه
وتبدلت كل السعاده بالاحزان=والوضع زاد وبينهم شب ضوه
ومن بعد ما كانوا سوى قلب ولسان=تفرقوا والحال زاد بغلوه
ومن بعد ما كانت لهم هيبه وشان=اضعف رجل اصبح عليهم فتوه
ومن بعد ما كانوا مثل عند الاعيان=صار الاخو لخوه حسبة عدوه
باسباب حرمه عاشت بروح شيطان =جتهم وخلت من معه عقل توه
عوبى خبيثت قلب مسمومة لسان=باسبابها قلب الاخوه تأوه
مر الزمن والحال وضعه الى الان=مزري ولا به حال يشبه غدوه
مر الشهر مرة سنه مرة أزمان=ولابه حياة لكل معنى الاخوه
ياهيه صحصح ميز الامر بتقان=ولا تمشي بدربً طريقه يتوه
أخوك لامن شان وقتك ولا زان=لجلك يجي من فوح دم الابوه
أخوك من غيره إذا كنت مرضان=يهتم في حالك ويحتاس جوه
أخوك عزك ذخرك يديك لاشان=وقتك، وضاقت قام بعلا سموه
والحرمه اللي سمها بالحشى بان=أضلم سماها وكل ما به تشوه
ومن قبل ما نهي هالقصيده يالاخوان=بيتً ودي عن معانيه أنوه
إذا تفرقتوا عن العز نقصان=وإذا تكاتفتوا على العز قوه

( الدار )

يا كثر ما تنشر أحاديث واخبار= ويا كثر ما نقراء سطور المقاله
ويا كثر ما نسمع عسى خير وش صار= ترديد حكي ولا تفيد العجاله
الدار موحش وينكم ياهل الدار=من يوم ما رحتوا ردى الحظ ناله
تهالكت جدرانه وطاح ونهار= واعلن بعد ما كان يوم أرتحاله
يالدار مخلص منت يالدار غدار= أوفيت لهلك في زمان البطاله
وحنا بشر لا كن كثيرين الاعذار = يا قل ما نوفي وننسى الجماله
ما عاد فينا غير حاقد ومكار =ويا قلهم أهل الوفاء والعداله
الطّيب اللي حافظًً حرمت الجار =ومبعد عن دروب الخطاء والجهاله
والسالفه ما هي بخاشيش واسرار=نلعب على المكشوف في كل حاله
هناك ناسً صاروا اليوم تجار=ورجال ظاعوا في زمان العطاله
شف كم قناةً دونت عبر الاقمار=ما بين رقص وبين لعب وحثاله
ويا نجم ياللي فايز بسوبر ستار=ما صرت نجمً ساطعً في مجاله
النجم والله راعي الطيب والكار=اللي فعوله ساقها للجزاله
من ساس حر وماكر صقور واحرار=متمسكاً في طبع عمه وخاله
والمهره اللي من أصيلات الامهار=كم فارسً هدت هقاوي رحاله
صعبت عساف ولا تبي غير مغوار=يا طى على الموت الحمر ويهناله
جيت وطيت بجيتي كل الاخطار =لعيونها لاطى الخطر واعناله
أم انت ياللي ناويً نموت الغار =أشره علي أن كان نمت بظلاله
تبي البراد وقلبك أسود من القار=شرهان يا معمي عيون الغزاله
ما تدري أني بشلعك فوق الاقمار=وأمحاك عن كل الوجود ومجاله
وارجع واحوسك لين تصغر وتنهار=ختى تكون العبره لكل عاله
وبالمختصر من دون ترديد واكثار=كلاً فعل يمناه طاب وهناله

( كحلتها واعميتها)

بعض البشر تفخر إذا معهم مشيت = وبعض البشر عيبً إذا ما شيتها
قد قيل يُعرفُ الفتى مِن أي بيت = إذ خوته بالطيب عالي صيتها
ويا صاحب الفكر المحنك لا رميت = رميت فهيمً للهدف ما خطيتها
أعرفك زينً لافهمت ولا غديت = وأعرف خطاك أن شمتها وسريتها
والسلعه اللي بعت فيها واشتريت = أعرف مصادرها إذا شريتها
والصفحه اللي منها يا ما قريت = عيبً إذا كلماتها ما امليتها
ويا قاريء أبيات القصيده بيت بيت = أعرف معانيها إذا قريتها
وما للرجاء في واقع الليأس المميت = ألا انتحاره كل ما ناجيتها
والمشكله لاقلت لك بنت السبيت = وانت ولا كنك هنا لطريتها
بنتً لها بين العرب ذيعً وصيت = حبتني بصدقً وانا حبيتها
أسفتني بكاس الهناء حتى رويت = واسقيتها كاس الوفاء وارويتها
ودونتها في صفحة العز وسميت = وحفظتها ولحنتها وغنيتها
وكتبتها قصة غرامي وارتميت = بين السطور الذابله واسقيتها
ويا سامع ابيات القصيده لاشديت = لا تحسب اني للغزل عديتها
يمكن سبحت بحرها ولا اكتفيت = ويمكن شقيت برها واشقيتها
المشكله آمر وادها لاحكيت = ولا جيت اكحلها وثم اعميتها

[تركي صالح]

مغـبـره

ما يكدر صاحب الفكر اللبيب = ألا رجلاً لاحكى ماعبره
وان حدرها من شعيب الى شعيب = ممحله ومشهبه ومغبره
يا رجل بعض الحكي نقصً وعيب = من ضحك بالناس ضحكه ثبره
والبلا من ضحك رجالاً عطيب = ناسيً عيبه ولا من شبره
منعمي منغر ما عمره يصيب = غره اللي بالمجالس كبره
العبوا به يحسبً الثور ذيب = يالله انك من غباه تصبره
ما يميز وش يصيب وش يخيب = وابسط امراً لا لزم ما دبره
وانت ياللي كاسبً للطيب طيب = الردى إذا اعترض لك قبره
واترك اللي ما مشى الدرب الرحيب = وللامور المعضله لا تسبره
ويا قصيدي وصل العلم المصيب = له وقله مايفيد وخبره
ان تعلم ولا جعله ما يثيب = لا نكسر ما احداً معاه يجبره

( الحلم )

صغت الشعر والقيته على مسمع كثير حظور = ورسمت احلا خيالاً فيه صورته وخطيته
أحاسيس ومشاعر في سماها تكشف المستور = من اعماق الزمان اللي تناساني وتناسيته
وبنيت بداخلي حلمً مكون من ثمان قصور = وعشت الحلم من نسج الخيال الين حبيته
قصر حب وقصر طيب وقصر فيه الكرم مغمور = وقصر عز وقصر حكم وقصر ألماس حطيته
وقصر حراس بيبانه أسودً كاسره ونمور = وقصر عشت اللويئام بداخله حتى تغذيته
ابحلم وابني امالي على حلمً يغوص بحور = واعيش بداخله واسعد واقفل بابه وبيته
ابحلم ليه ما احلم ما دامني معه مسرور = مجرد حلم أبحربي وسلاني وسليته
مجرد حلم حبيته مفبرك غامض ومنثور = عطاني جو واعطيته مثل جوي او نميته
واثار الحلم هي لحظه تعيش بعالمه ويدور = ويتلاشى بعد هذا ماكنك يوم خاويته

( الحاتمية )

اشتقت لك يا ديار حائل او حنيت = شوق الصحاري ويبس العود للما
وكتبت فيك احلا القصايد او غنيت = حفظً بقلبي ووسط الفكر رسما
يا ديار حائل كل ما رحت وقفيت = الفكر يحزن ووسط القلب يدما
يا ديار حائل يفرح القلب لا جيت = وترفرف طيور السعادة أو تسما
يا ديار حائل والله أبداً فلا اغليت = ولاحداً مكانك يسكن القلب حتما
يالحاتمية لك غلا القلب أعطيت = حبً اكنه داخل القلب ينما
ذيك الفيافي يا حلاها على الصيت = جبال أجا بالزين وجبال سلمى
ون شفتها قدام عيني تهنيت = ارما على شوفت حلاها انا ارما
ارض الكرم والطيب والعز سميت = ما حداً يجيك وقالوا الناس يظما
في كل حي او كل بيتً ضوا الليت = الطيب يزما ثم يزما أو يزما
منسى أنا حائل ولا ما تناسيت = حائل لها بالقلب حبً او وسما
ويا لايمي في حب حائل ترى اخطيت = أحبها غصبً على كل خشما
ون ما مسكت الارض وشوي هديت = اصبحت انا شوكً بحلقك وعظما
ويلان ربعي وبالسناعيس حييت = ما بينهم فرقً عزازاً وحشما
ما هم من اللي طيبهم به تشاتيت = وفعولهم سرقً وكذبً وظلما
اسمع قصيدي وحفظة بيتً بيت = علمً وصلك أو زود العلم علما

( ماجد )

يا بيوت الشعر هبي للنداء ميه بميه = وأتقني صوغ القصيده لين معناها يلآلي
وعزفي لحن الكلام ودقي طبوله سويه = وجزلي معناه حتى يرتسم فيه بعدالي
يا سلام الله سلامً مني لجزل العطيه = الخوي اللي كلامه وافيً في كل حالي
من صميم الفكر يرسل جاهز لواف الحميه = ماجد الغانم ونعمً وكثر من النعم غالي
أسمً مسمى وأسمه بالمكارم هو سميه = جامعً طيب الصفات وطبع في شخصه مثالي
خوته ترفع خويه فوق ما تخذل خويه = ومن يعرفه والله أنه رافعً للراس عالي
طيبً من ساس طيب ما يعرف العنجهيه = من رجالاً فعلهم معروف ما فيها جدالي
هم هل الطولات والوقفات بعزوماً قويه = يعني أصغر سن فيهم يا قف بكل أرتجالي
عيال عم وعزهم من عزنا والنار حيه = ودوم حنا مع بعظنا يوم صعبات الليالي
والمعاني كان ما هي في قصيدي له وفيه = برجع أصيغ المعاني لين تافي بكتمالي

[تركي صالح]

( ياعيال وايل )

يا هجوسي لانخيتك اعرفك عند اللزوم= تكرب اعنان القصيده والحروف تشدها
فارسً لامن حظرت وقائداً بالعرف قوم= الله الله بالفريده والجزيله بدها
عند ربعي موقفي اكبر فخر ليه يدوم= تاج راسي قوتي من حدها لي حدها
جيتكم ماسك لواء العز والطيب محتوم= شاعر ولا قلت كلمه والله اني قدها
اعشق العليا واحب مجالس رجالاً قروم= وامشي بدرب المعزه نظرتي ما ردها
واحمد الله جاء مقامي عندكم فوق النجوم= وانتم معزتكم هنا بالقلب حافظ ودها
يا عيال وايل والسلام ازفه لكل العموم= سلام من شاعر يمينه للنشامى مدها
هلا هلا يا مرحبا والطيب بالعليا يزوم= يبني مفاخر جدنا وايل ولا يسدها
تاريخ مجد يحير العالم بتصنيف العلوم= امجادكم لاجاء يصنفها بلش في عدها
وتوصيفكم يحتار فيه الشاعر الفذ العزوم= وده يوفي حقكم وابيات شعره ودها
ما هو تعالي بالفخر يوم امدح بربعي واقوم= قبلي كتب شعار تمدح في فعايل جدها
كل القبايل والنعم والطيب ما هو بمحكوم= كلن خذا حقه على مر السنين ومدها
يا عيال وايل جيتكم حسب التأخي والسلوم= ببيوت شعراً لجلكم مثل الحرار أهدها
ياعيال وايل ياهلا والطيب بامر الله يدوم= وقلوبنا تعانقت ما احداً قدر يصدها
ياعيال وايل والمعزه والتكاتف دوم دوم= النفس فاضت بالمشاعر لين بيح سدها
افراحاها بانت وانا لزوم اترجمها لزوم= باروع قصيده عنكم يا لابتي أعدها
جعفريً من ضنا سليمان والعز محسوم = في حظوره بينكم زاد الشرف لا شدها

( قحطان )

شبيت بحروف القصيده واجمل الكلمات نار= واشعلت في جزل المعاني وستوى مضمونها
والفكر من صادق أحاسيس المشاعر أستثار= لعيون زينات القصايد صغتها لعيونها
قصيدةً مالي بها غير المعزه والوقار= وابي إذا عرضت عليكم بالفخر تقرونها
قصيدةً مشيتها للطيب في أحلا مسار= سارت وانا كرست جهدي في جمال فنونها
واعطيتها من رائعات المفردات بلا حصار= حتى تكون أجزل قصيده بالقصائد دونها
الليله الليله فرح ما صار لا مثله ما صار= هذي حقيقه والحقيقه واجبً تروونها
ما كنها ألا فرحة الفارس بوقت الانتصار= بالمعركه يومً رحاها أختلط بجنونها
وانا جنون الشعر لامني نخيته ما ستدار= يثور ثورت مقتدر للطيبه ويصونها
هنا حظرت الليله وكلي معزه وافتخار= بمواجه رجالاً محبتهم سمت بمزونها
قحطان قحطان العريبه والشعر لاثار ثار= يكتب على صفحات تاج المجد عن مضمونها
قحطان قحطان العريبه دار لاكن أي دار= داراً شرب صغيرها بالعز واصبح عونها
قحطان قحطان العريبه للكرم بيت وقرار= ويديهم البيضاء على فعل الصخاء يحيونها
قحطان قحطان العريبه للشيم تاج وشعار= قبيلةً ترقى سنام المجد بزهى لونها
قلته وانا من لابةً ترث حراراً من حرار= العاليه من طيبهم لو أعتلت يرقونها
ويلان ويلان الكريمه طيب دار وستر جار= عزيزةً تعز من هو يحتمي بضعونها
الليله الليله فرح ما صار لا مثله ما صار= هذي حقيقه والحقيقه واجبً تروونها

[تركي صالح]

( ورود الحي )

يا ورود الحي فيكن وردةً غير الورود = تملك الزين العجيب أو زود فيها جاذبية
يا ورود الحي وش هي ليا صنفً هي تعود= يا ورود الحي وش هي فلةً أو نرجسية
شكلها عنكن غريب ولونها ماله وجود = وتحدى كان فيكن من حلاها لو شوية
النسايم من حلاها عانقتها في ركود = و هي تهادى في غنجها عذبة نفسً برية
تجذب القلب المتيم في وصايفها بزود = ما لكن معها نصيب و ما لها معكن شدية
الخدود الله عطاها وردتين من الخدود = والثنايا من حلاهن كنهن لون ابردية
والخصر ناحل و مبرم كنها مركوز عود = ولا تثنت او تهادت تذبح قلوبً شقية
والعيون عيون حراً شامخً بعلا الوجود = والشعر سواد ليلاً أو كما كحل بدوية
ولا مشت تمشي وكن الارض تدراها بجود = خطوتً تتبع لخطوة في ركود وشاعرية
ولعت في وسط قلبي من هواها كالوقود = كيف قدرت الله اعلم ساحرة وايضاً نقية
بس والله من نظرها غصبً ايجيله ردود = لخبطة بنت الحلال عقول وزنتها قوية
غصب عني يوم اوصف شاعر وقلبه ودود = شاف زينن الله اكبر ما نظر مثله او زية

( مخلوط سكر )

غرواً سحرني باهي الزين رعبوب=ما شفت أنا مثله مع كل الاعراب
مخلوط سكر والحلا فيه مسكوب=ومدموج من ورداً وفلاً وعناب
مميز وطيب ورائع وحبوب=وخلوق وحنين وفتنه وجذاب
ورويان ونحيف ورزه ودبدوب=ومزيون ومحطم وفلته ونهاب
أليا هرج في هرجته سحر وسلوب=وعليه مبسم خالطً سلم ورهاب
يغار ردفه من خصر قد مسلوب=وعينه تعاند سلهمت رمش وهداب
والخد مبيضً وخمري وملهوب=مخلوط مع زين الاعراب زين بنجاب
كله على بعضه حزازات وحروب=وله سلطةً تفرض على كل الاحزاب
يذوب اللي ما بعد فكر يذوب=ويلخبط اللي دارسً علم الاعصاب
يا لعن ابو حيه مشا بي مع دروب=والله مدري وش نهاية ها لاعجاب
ان قلت حبوبً فهو حيل حبوب = وان قلت له سيد فهو سيد الاحباب
كله حلا ما فيه أيات عذروب=وعلى الصبايا حاز زينات الالقاب

(ارحمي)

أرحمي قلبً معذب في هواك= وبادليه بحب صادق يا هلا
وبينيله نظرتً تثبت غلاك = وبينيله زود حبك والغلا
وكلميه بكلمةً تنطق شفاك= من سمعها خاطره فز وسلا
وبادليه أحساس حبً من حشاك= مثل ما حبك بقلبه أعتلا
أنت اللي ما رأت عيني حلاك = ولا به أحداً يشبهك يحلا حلا
لانظرت له الملا هذا وذاك = ما به أحداً يشبهك بين الملا
ودي أجلس لحظةً مره معاك = عل همً وسط قلبي ينجلا
أرحمي يابنت من حبه عطاك = يرحمك رب السموات العلا

[تركي صالح]

( نواره )

لا جيت ا بكتب عن غلا نواره=في وصفها احتار ويش ابكتب
ما دري وش اللي بالوصوف اختاره=متميزه بنت الترف والمنسب
تاخذ على الزينات ختم إماره=و لاهي غريبة تستحق المنصب
حتى القمر تسدل عليه ستاره=هذي حقيقه والحقيقه تصعب
والشايب اللي لا بسً نظاره=لا شافها طش العصى ما حسب
عنقا طويل مكحله سحاره=سحر الجمال الفاتن المتهذب
هدوءها يدعوا الى الإثاره=وسلوبها الراقي حلا مترتب
كأن بحة صوتها القيثاره=لا قامت تجاوب جنون المطرب
وما كنها ألا لولو بمحاره=في بيت عوداً لا عطى ما يطلب
ما هي من اهل النيه المكاره=ولا هي من اللي بالمواقف تشجب
ولا هي لعوب ولا هي بثرثاره=ولا هي بغير أشعار تركي تطرب
ومدامها تطرب لسمع اشعاره=ما للقصائد عن غلاها مهرب
هي ملهمة قلبً يحفظ اسراره=وهي ذائقة نفسً بلاها تتعب
وهي روح عقلاً هايمً بفكاره=وهي نبع احساس الغلا المتأهب
وهي مستوى التفكير واستشعاره=تقرب وانا اللي من غلاها اقرب
جتني على عهد الوفاء واصراره=جتني على وضح النقاء المتأدب
جتني تقول بدنيتي محتاره=تكفى ترى تكفي تهد المنكب
خذني غلا وحفظ معك مقداره=خذني مشاعر صادقه ما تكذب
خذني وفاء تسمع صدى أخباره=خذني أحاسيس العطاء المترتب
خذني وان لا قلت خذني تاره=التاره الأخرى عليك أتأهب
قلت اسمعي لِهذه العباره=عبارةً تبقى لنفسي الأقرب
انتي وانا وقلوبنا المحتاره=يا بنت من دم المحبه نشرب

[تركي صالح]

( شد برحالك)

يا صاحبي قلي وش اللي جرالك=مني ولا ني خابراً شي زعلك
فجاءه بدون اسباب علماً طرالك=جافيت اني من دون لا اخطي ولا اهملك
ما تدري انك وسط قلبي لحالك=وعلى كفوفي بالغلا دوم شايلك
اسوق خطواتي غلا لجل انالك=واسرج حروفي بالغلا لين تاصلك
باقي معك في عالمك وبمجالك=وافي ولاني ناكراً واتجاهلك
هو كيف تنسى من ضميره صفالك=حتى أحس انه بالاشواق بادلك
بس اتضح انك تمن بوصالك=ولا هو بحقي منك تخلف تعاملك
أن كان تبغى وصال شفني قبالك=وان كان تبغى فراق ما ني بمشغلك
يا ما علشانك وطيت المهالك=ويا ما زرعت ورود من حول منزلك
ويا ما مشيت برغبتك واعنالك=دايم وانا في كل موقف مجملك
ما دري غرورك في محاسن جمالك=أو هو عذولاً دار فكرك وميلك
صار السبب في جفوتك ونشغالك=عني وانا اللي ما بعمري أزعلك
وبالمختصر أرجوك /// شد برحالك=واما ابتبعد ولا تراني برحلك
لقيت من قدر غلايه بدالك=من يوم ما شفته عن البال كنسلك
وانا شموخي فوق رجوى دلالك=قلت الذي يرضي ضميري ويقتلك

شمس القصيد

دخلت في عالم هوى عشق العذارى المترفات = اللي دلعهن يفتح لقلب القسى شهيته
وعشت الخيال الواقعي من بعد ما كنت بسبات = لآهي ولا لي بالدلع وام الولع ووخيته
ولا كنت احسب اني اصير الهايم بحب البنات = ألا بعد ما القلب صفاء للبنيه نيته
ولاهي بنيه والسلام ألا ملاك الانسات = وشلون ما دري لينت قلبً حفظ وصيته
راح الثقل بسبابها راح التأني والثبات = يا لعن ابو ذاك الجمال المدمج بعفويته
هو كيف قدرت تملك أحساسً نبع من صدق ذات = والله ما دري يا هلي قلبي فقد ما هيته
لعيونها صغت القوافي والجمل المفردات = والشعر يحيي لجلها أروع حروف امسيته
احيان افكر وارسم بعالم خيال الامنيات = واحيان ابني واقعً يملي علي حريته
واحيان أغفاء بالعيون الواسعات الناعسات = واحيان اعيش بجوها واخذ صفاوت ميته
واحيان اسامر ليلتي مع النجوم الساهرات = واحيان احب الصبح وهدوء المساء وليليته
هذا وانا ما هزني احلا جمال الفاتنات = لاكنها هزت أحاسيس الشعور الميته
حتى ارتوا من شهدها عرق المحبه بالحياة= وصارت طقوس الشاعر وشمس القصيد وفيته