ديوان الشاعر ::: محمد لطيف :::

[محمد لطيف]

( قبيلة عنزه تغزو البحر)

يابحر جـــــده ياعذاب المحبـــيـــن = يامـــــدعي طبـــع الهوى والسعاده
بيني وبينك حلف حسب القوانيــــن = والغــدر ياهــــدار يعلن فســــــاده
بعشره ثلاثـه عــــام ستـــه والفيــن = رقم ثلاثـــــه جيم تقسيم صــــــاده
تحت اسم صلح البحــــر والبلادين = وقعت انـا ويـــاك عـقــد وافــــاده
فحواه كــله يندرج تحت بــنــديـــن = اعــيــدها لك كــــان تبغى اعـــاده
البنــــد الاول واضـــح بالعــناويـن = حسب الشروط المرفقه بالشهـــاده
من يوم عشره لين سته وعشريـــن = هدنه وكـــلــن عايش في بـــــراده
والبند الاخر نخفي الزين والشــيـن = وكل على ماقــــيــل ياخذ مـــراده
وباركت لي يابحر بين الصلاتــيـن = وصافحتني واعـلنت نـيــة ســداده
وطلبت لـــي شـــي يبـــل الشرايين = وطلبت لك فنجــــان سكــــرزياده
واليوم اشوفك تحترق بين ناريــــن = تقفي وتقبل لي علــى غير عــــاده
من وين رايح وين رايح على ويـن = تعــال عـــنـــدي ياضعيف الأراده
ماني مسيحي من جــنـــوب الفلبين = ولانــــي بحكمتيـــار شهـيـــد زاده
ولاني من البشمر ولاني من الصين = ولاني كمال حسين حمدي حمــاده
اسمي محمد وايلي من هـــل الدين = وكل حسب حريــتــه واعــتـقـــاده
انا من الشملي شمـــال الجــبـلـيـن = داري وكل يـفــتـخـــر فـي بـــلاده
ديرة بني وايـــل كرام وعزيــزين = اهـــل الكرم واهل الفخر والريـاده
يومنها بالسيـــف والـــرمح ذربين = عـــدوهم يعـــاف لــــــذ الوســـاده
ربعي وليا نخيتهم جـوك عجـلـيـن = كلن يكاهـــز فــوق صهــوة جواده
ناس على شقر الاصايل سلاطيـن = مثل العقاب الصيرمي في هــــداده
على ظهور الخيل مثل المجانــيـن= ولا حولــو رمز الوفـاء والـــرفاده
منهم عقاب الخيـل ذعر المعاديــن = والشيــخ ساجــر يستحــق الاشـاده
والشيخ بن هـــذال راع الدواويــن = شيخ الشيوخ الصيرمي في طـراده
ومنهم مريبد من زحول العداويـن = عـقـيـد ربعــه يـــوم هي بالـنـكــاده
ومنهم خضير اللي رجح بالموازين = مــن رد بسهوم العباريد صــــــاده
ومنهم مصوت بالعشا والشعاليــن = المـــوت عــنــد وجيهم واهــجــاده
ومنهم غدير الموت والناس دارين = كــــم راس شيخ بالمياديـــن بـــاده
اعطيك نــبــذه والمعاني نـيــاشين = من كــثــرهم عجــزت لوفي عداده
لاشفت فوق الورك اليمـن هلالين = تراه سيف المـــوت يعني حــصاده
نيرانهم تاتيك مــثـل الــبــراكــيـن = لاشذ سلـطان الهــدى عـــن رشاده
ركبوا على قب ســـواة الشياهـيـن = وعــقـيــدهم علــــق وســــام القياده
الـــنــادرين القاطعــيــن الميامـيـن = مال للعـــدو في وجـه الابطال راده
طشوه بوجبه الذياب الســـراحـيـن= واركوا على ارقاب المعادي حداده
سربة هل البلــهـــا تدك المياديــن = يهتز منها اللــــي قـــــــوي فـــواده
الخاشـــعين التايبين المــصــــلين = يرجون مد اللـــي كــــريم مــــداده
للسيف غمد وللبطـوله عناويــــــن = وحنا عناوين الفخــــــر واعتمـــاده
وان كان عندك يازرق الموج قولين = يغنيك عن شعــــر المعنى وكــــاده
فلا تهددني مـــن اللحــين للحــــين = بالـموج واسرار المحيط وعــتـــاده
ولا تحـــــداني بـيـالـيـــل ياعــيــن = الليل ليلك مــــــوحش في ســـــواده
ابوك انا شاعـــــر وعندي براهـين = اكتبك في سطرين واعــــلن جهــاده
طيار بحري واعرفك يابحر زيــن = عندي علـــى علمك ختوم وشهــــاده
السيــــل شعري والقصايد مياديــن = والقاف فـــكـــــري والمعاني زنــاده
لشرشحــــك من حد جــــده لبكــين = وعــلـمـك وشلـــــون معنى القــراده
لرســمك رسمة راسميــن الكراتين = واعلنك رمـــــز المـــهزله والـبلاده
والله لاضحــــك عليك الوراعيـــن = حتى اللذي تـــــــوه حــــديث الولاده
ويسفهـــك حتى لابسات الفســـاتين = وتصير بعيــــون الغـنـــاديـــــر داده
حتى العجايز تحقرك باللواويـــــن = وماللك مــــع الشيبان غيـــــر النقاده
مابك حلا مر تعل المصــــــــارين = طعمك هماج يقطــــع القلــــب ساده
من ودني يبشر بطلــــق الحجاجين = ومن لابغاني نــــور عيني بعــــــاده
ياهيه انا مانـــــي ضعيف ومسكين = عــنــدي مـــع الايـــام صبر وجـلاده
ماجيتك اشكي مــن عذاب المزايين = حــصه وســلطانه وليـــلى وغـــــاده
ولاجيتك اشكي لك من الفقر والدين = الحـــمــد للمعبـــود رزقي هـــــواده
تشــــوف هالدنيا بـــــلاد وحــياوين = عــنــد الولي ولا تســـــاوي جــراده
اعـــــوذ به من وسوسات الشياطين = والــــوذ به عن حــــر يوم الابــــاده
والرابـــح اللـي لاغـــدى الليل ليلين = يسجد ويدعــــي بالدجـــى بانــفراده
وهاذي نصيحه حطها بين قوســيـن = تغنيك عن كــثر الكـــلام وســـــداده
الغـــــدر يحــــرق يانعـات البساتين = والصـــدق ياهـــدار نصف العــبـاده
وان ما عجبك الهرج لاتشكي البـيـن = يامـــــوج رح راجع طبيب العـيـاده
وختامهــــــا صلوا صــلاة المصلين = على النبي الهــاشــــمي في مهــــاده

( مرثيه )

الا يـالله لاتغــضـب عــــلــيـــه = وصبرني عـلى هـــول البـلـيـه
انا عبدك وابي عطفك ولطفــك = مصابي جل ودموعي عصيـه
رحل شيخ المكــارم والسجــايا = عن الدنيا تحت رحمة ولــيـــه
رحل وكتاب ربه فــــي يمينــــه = على القــــران وافــتــه المنيــه
رحل لوهو رحل بالطيب حاضر = فعوله في قـــلـــوب الناس حيه
شهود الله بارضه يـــذكرونــــه = بخير وسيــرته بين البـــريــــه
تراحيب المطر في طلق وجهـه = وعلى نـــاره تــفــوح الشاذليه
يجيه اللي طواه الهــم ضايـــــق = ويقفي دالـــه مــن غــيـر سيه
عزيز النفس بايــــام الشـــــدايد = يصيد ويعطي الصيده خــويه
عزيز الجـــار صياد الجمايـــل = عصامي عــلى ســنــة نــبــيـه
عزيز الجاه جاهـــه يعــــرفونه = رجال هـــونو مــعــه القضيـه
عزيز الدار من جـــده وخــــاله = من اسمه لين راس الـــوايليــه
اديب يعجب الــنـقـــاد طـــرحه = تزين به حـــروف الابــجـديـه
لبيب فــــاهم عــــــدل معـــــلم = يحــــل المشكله لو هي عصيه
غريب في زمن جلب المصالح = يطيب ولا يبــي رد الجــــزيه
حبيب كــــل خـــلق الله تــحبـه = عســــاه بجنة الخـــلــد العــليـه
مكانه مايســـده غــيــــر مــثـله = عـــسانا نقتدي بــــه بالهــويــه
فــقـيــدة ربعنا عـــز الـقــرايب = بــني وايــل عــزيزين السميـه
حفظ تاريخ وامجاد القــبــيـلــه = نجــــوم في سماء الدنيا مضيه
دموع الناس في لحظة رحـيـله = تهامــــل طية من فـوق طـيــه
تــحـرى طــلــتـه كــل الامـاكن = تحن لصاحب النفس الرضيـه
كأنــي بالـجـبـال اللي رقــــاها = تــنـــوح وكنها بـــارض وطيه
تلج مــــوزره واللــي وراهـــا = وتجاوبها مــن الحــزن الحنيـه
وكاني بالمبـــاني اللي سكنهــا = تحــلحــل من زاواياها العتيــه
وكاني بالغصون اللي غرسهـا = تشكى للــــرياح الــمــوسـميــه
وكاني بالسهول اللي وطاهــــا = تضيق ولابــقى منهـــا بــقــيـه
وانا من عقب ابويه كن حــالي = نهشها مع غروب الشمس حيـه
اليامني نسيت الحزن ساعـــــه = ذكرته بالصبـــاح وبالـمـســيــه
وليامني ذكرت اني فقـــدتـــــه = فزعـــــت وضاقت الدنيا عـليه
لانه محزمي هو تــاج راســي = دلـيلي عن ظـــــلام الجاهـلــيـه
لانه شمعــــة ضوة طـــريقي = تنور لي لـــيال خـــرمـســيـــه
لانه فــــــرحتي باول حياتـي = اراقب بس طــلـــتــه الـبــهــيـه
لانه قدوتي لاحــار فـــــكري = مقامه حـــد وعـــزومه قــــويه
وانا ياحمود راضي بالمــقــدر = صبـــرت وهـــذي الدنيا دنــيه
عساه بجنة الفردوس خــالــــد = وعســـى قــبــره مسافـــات مديه

( ما مات من عقب صناديد ما مات )

يالله يامحيي الجذوع الهشيمات = ياعالم ما بالخفاء والسريره
يا سامك سبع الشداد السماوات = يارب تلطف بالعيون السهيره
يالله سترك يوم الابصار فلات = ويارب تجعل لي من الامر خيره
البارحه يوم اكهف النجم بسكات = جتني جماهير المعاني مغيره
ماكني الا واقف في عرفات = او كن من حولي جموع غفيره
قمت اتخير بالجمل والعبارات = الكم هايل والمشاعر وفيره
والشعر مثل الماء حدود ومسافات = شعر بحر والشعر الاخر بحيره
سبحان من يجمع بحور ومحيطات = داخل مغاليق الصدور الصغيره
من غاص غبات البحر جاب دانات = ومن غاص في زيره تعلق بزيره
والقافيه مثل الوطن والجماعات = تبكي على فرقى الاهل والعشيره
شاعر يسوس من الخيول العريبات = وشاعر ورى العربان يطرد حميره
والا المعاني واضحه بالفروقات = كاس عسل والكاس الاخر مريره
وان ما لفتك بيوت شعري جنيهات = ياعلني ماكتب من الشعر غيره
هات القلم ياراعي الاوله هات = واترك علي بدع البيوت الشهيره
ماهي بيوت مروجين التفاهات = اللي على عمي البصر والبصيره
لرسملهم من جيد الشعرلوحات = تشوفها حتى العيون الضريره
ياغافل الدنيا سراب ومتاهات = نمشي وراها مع حلول الظهيره
الحي داله والخبر عند الاموات = ان الحياه اللي نعيشه قصيره
وانا سؤالي للعقول الفهيمات = العبد بعد الموت وشو مصيره
شتان بين المشئمه والمسرات = جنه هنا وهناك نار سعيره
يانفس توبي قبل يوم الملمات = طول الامل عوق النفوس الحسيره
هيهات يرجع ماضي العمر هيهات = الوقت يمضي والليالي تديره
مامات من عقب صناديد مامات = على مساره تستمر المسيره
متكاتفين في جميع المهمات = على النقا مثل السيوف الشطيره
واللي يمن الطيب من عقب مافات = ماعاد يبغى كل شره وخيره
خله يولي للقصور الحقيرات = مامن ورى راع الحسايف بريره
عند الكبار اعتى الجمايل صغيرات = وعلى الصغار ادنى الجمايل كبيره
واللي يروج للفتن والضلالات = لابد ماتجري عليه الجريره
له يوم خزي وعار والام واهات = يندم ولا يلقى صديق يجيره
يالفهلوي يابو فلوس ومحطات = احذر تلاعب بالامور الخطيره
ان طعتني رح للفلل واالعمارات = البورصه تبغى عقول خبيره
والنجم لاخالف مسار المجرات = يضيع بغبار النجوم المثيره
ماتنفعك كثر الحيل والمهارات = للسيف غمد وللبطولات سيره
والمرجله والمنزله والبطولات = عليك ياراع السوالف عسيره
الله اكبر يازمان لنا فات = قبل المجالس والبيوت الوثيره
يوم الرجال يقدرون القرابات = وايضا يصونون الخوي والقصيره
عصر لبس تاج الفخر والمروات = طيب وشهامه واستقامه وجيره
يرجون مد اللي يدير المدارات = اليوم في ديره وبكره بديره
وزمانا هذا زمان العلاقات = على المصالح تستمر الوتيره
ان جات يم المصلحه والوساطات = كل حسب علاقته مع مديره
اما تجي له حاجته بالثمنيات = ولا تجي كل المساعي كسيره
حنا بلينا في جميع المجالات = تشوف بعيون الرجاجيل حيره
نرفع شعارات ونطمس شعارات = من وين ماهب الهوى نستجيره
مع العجاجه طايرين جماعات = مافيه من ميز بفكره مطيره
سادت حضارات وبادت حضارات = وحنا نذم الاوله والاخيره
الفلسفه والمهزله والاشاعات = لامن تلاقو في قناة الجزيره
جونا بوسط بيوتنا بالمطمات = احد مع الشيطان واحد خشيره
لو غيرو شكل النصايح ولاصوات = الداب تعرف شجرته من صفيره
الغيظ بحلوق العدو له علامات = ماغير تسمع بالمنابر زفيره
خاضو نفاصيل الملل والديانات = والدين واحد مانبي دين غيره
ياربعنا لازم نعيد الحسابات = ونميز السلك الردي من حريره
مافيه داعي للزعل والحزازات = كل على مجناه ياسم بعيره
العلم ماهو بالصور والشهادات = العلم بصدور الرجال لبصيره
ويسعد جميع اوقاتكم بالمسرات = صلوا على بشرى العباد ونذيره

[محمد لطيف]

( الكبيسي ويوسف القرضاوي )

من دار أبن جمجوم واللنجاوي =والكنـدره وغليـل والشامـيـه
جاني جـواب متيـم ومهـاوي =عليه من وسم الهـوى ماريـه
يجر صوته بأعـذب الغنـاوي =لاجا الصبـاح وحـزة العصريـه
وجاوبت صوته صادقٍ شفـاوي =النـار حيـه والمشاعـر حيـه
أكتب له أبيوت الشعر رهـاوي =وأتعب على الاسلوب والنوعيـه
وأضيف حبكٍ للجمل متسـاوي =أيضاح في قالب مـن الرمزيـه
وأرسم لها خطه وفكري هاوي =على غـرار الخطـه الخمسيـه
ياصاحبي .. دامك كذا نخـاوي =القصد واضـح والحجـج متليـه
خل الكبيسي ويوسف القرضاوي =وأسمع فتاوى الشيخ أبن تيميـه
كم واحد قلبـه مـع المنـاوي =عاف السنين وحاجتـه منسيـه
وكم واحد قاسى من البـلاوي=عمره مديـد وحاجتـه مقضيـه
وكم واحـد غرنـه الهقـاوي =غتره ديلوكس وساعه وطاقيـه
وكم واحد فأهل الهوى فـداوي=عانى مـن الاحبـاط والنفسيـه
الحـب داء فالقلـوب يخـاوي =ذوي النفـوس السـذج المبليـه
ويثر على الرجال لين يـراوي =ويدخل عوالـم غيـه السحريـه
أنا من أسبابـه وطرقـه داوي =أمشي شمال وحاجتـي شرقيـه
واليوم عن درب الهوى جلاوي =جريت دلوي ثم طويـت أرشيـه
وأختامها طيبٍ ومسك وجـاوي =وهيل ومسمـار علـى البريـه

( شراب الموت )

الله من هم علـى القـلب ماشيــف = مخفيـه عن شوف الوجيه الرديه
ياكن مـن بيـن المحاني خواطيـف = لاتـلـها الاول تحـرى خويـه
تقطع ظماها قطعت الراس بالسـيف = وتـلمها لم العـرب للـرعـيـه
الزور والبهتـان والظـلم والزيـف = والسالـفه يين المعـاليـق نيـه
والجمره اللي ولعت باشقر الليــف = طاحت بكفي وامرحت في يديـه
ياحيف وان طاحت عل القاع ياحيف = لو احرقتـني بالخفـى ماعلـيـه
وتلعب على حبل الهوى والتصاريف = فراشة طاحت على النـار حيـه
مافـكرت بالهـم والكـم والكيـف = تحسب تباشير الفرح وسط ضيـه
ماتدري ان النار تشوي الغضاريف = لين اصبحت بين الحطب والشظيه
وياشارب الفنجال لو كنـت حريـف = كبه تـرى في داخـله سم حيـه
اللي تولف لعـبـة المـوت تولـيف = صبـت شراب الموت بالشاذليـه
ماينفع المسمـوم طـب وتواصيـف = ولـو عالجوه بكيـة فوق كـيـه
والوادي اللي فيـه عج وعواصيـف = لاتنزله يغرقـك من فـيض ميـه
لاشفت براق الـمطـر له رفاريـف= شد الشداد ومس حبـل المـطيـه
يالله تكفيـنـا شـرور الصواديـف= ويالله تجير اهـل الوجيـه النديـه
ويالله تجـنـبـنـا دروب الملاقيـف = وتجنب الاجـواد عن كـل سيـه
اهل الكرم والجود والـبن والكيـف = اهل الشرف والعز واهـل الحميه
نسل الرجال اللي تطول المشاريـف = اللـي لهم بالطيـب روحه وجيـه
قـصـيـرهم يرغبهم دون تكلـيف = وعـدوهم وروه حـوض المنـيـه
اقوالهـم تنـفـيـذ ماهي سواليف = وافعالـهـم واقوالهـم وايـليـه

( عسى مرسول بقعاء يلشه )

البارحه فـكري تـــــوارد طـــــواريه = قامت عواصيف المعاني تهشه
شـــي يبـــرق به وشـــــي يخــلـــيــه = وشي يحــــول به وشي يـــدشه
ماني على الدنـــياكـــثير المشاريــــه = ماجابته ســـود الليالي تقــشــه
الله عـــــرض لادم خــلاصة ذراريه = مــن خلقته حتى نهايــة منشـــه
احد مثل طير السعــــد في مـــواريـه = واحد عسى مرسول بقعاء يلشه
واحد يعيش مـع عـــياله عـــــــوانيه = واحد يعيش وعيشته وسط عشه
واحد مــــراسه وسط راسـه مـكفــيه = واحد سواليف العجايز تـــــوشه
واحـد مـــن النعــمه كبـار عــــلابيه = ودك اليا مـــنــه تعشـــاء تفشــه
عــــلى رفيقه طايـــرات نـــــواصيه = لاكـــن على فرخ القطاء ماتهشه
واحد تطشــــه بالــــبلاوي مباديــــه = واحد جبل ماكـــــل شي يطــشه
واحد وسيم وخالق الكـــــون معطيه = واحد عــطاه الله بـــراطم وخشه
واحد على النعمه جدوده تــــــــربيه = واحـــــد فتافيت الدسم ماينشــه
واحد اليا شافك يســــــوق المشاريه = واليا نخيته ماتحــــليت وشــــــه
واحد بوجهك مبتسم من تمــــــدريه = ولقفيت باطراف العراقيب حشه
واحد على الخبرا تخــونه مـــواطيه = واحد اليا شاف البحر هاج دشـه
واحد عطــــــاه الله هنــوف ترضيه = واحد بــــلاه الله بعوبا وكشـــــه
واحد تــمشــه لاتـــردى عزاويه = واحد فلـــــوسه لاتــــردى تمشه
واحد طروش الفقــر بالفقـــر ترميه = واحــــد دنانير الـــــدراهم ترشه
واحد على الحيلـــه كبار هقاويـــــه = واحـــــد غشيم وكـــل حي يغشه
واحد تنومس به وتفــرح بطــــاريه = واحد عن وجيـه الاجــانب تخشه
وانا من اللي قلت وان قلت لي ليــه = ماصــــــوب الحصاد الا محشه

( باشة الغيد )

جعل السحاب اللي سقى صحصح البيد= يروي قلوب من عناها خرابه
عقب الحسد والحقد والزور والكيد= ينبت بها عرق الغلا والحبابه
ياما بها الدنيا هدوس ونماريد= تلعب على متن اللعين الربابه
تعازمو على حلال الاجاويد= تكالبو على حقوق الغلابه
تفرعنوا صبو غضبهم عناقيد= كانو كلاب وثم صارو ذيابه
يجيك واحدهم معه رمح ابو زيد= يطعن وهو وقت المراجل زلابه
عربيد واطي ينطح الفين صنديد= وما دام في هذا الزمن لاغرابه
حتى القرايب بين كره ومناقيد= من عقب ماكانو ربوع وقرابه
ياشيخة الخفرات يابا شة الغيد= ياشمعة كلك شموخ ومهابه
يابسمة الاطفال يافرحة العيد= مالك ومال المشكله والطلابه
الستر زين وما يبي زود تمجيد= وبعض البشر ما يسترنه ثيابه
خوذي مثل عندك نجاح اال.....؟= تصدح بصوت مثل صوت السحابه
يسمع لها وسط المجالس تناهيد= صفق لها الجمهور عطف ونجابه
بس الحقيقه غير من غير تحديد= ان الحيا نعمه وزين وذرابه
ولا تعجبين بشعر بعض القواصيد= اللي لهم وسط المحافل خطابه
بعض الشعر خلطة حروف وتفاريد= اول قصيد وثم عود قلابه
بعض قصيد الجيل طق وزغاريد= شي يقال وشي ما ينحكى به
الشعر سلطان الشيم والتقاليد= الشعر ميزان الفخر والرحابه