القهوة

[عبدالله المعيوف الدهمشي]

بسم الله الرحمن الرحيم
بداية أعتذر عن الغياب ولعل هذه القصيدة تشفع للغياب
..
منذ بدايتي في كتابة الشعر لطالما استهوتني قصائد الحكمة ووصف القهوة .. وكان لي أن ترجمت عشقي لهذين الغرضين بهذه القصيدة ..
أتمنى تعجبكم ..
..
... بسم الله ..
..

الله على أوَّل ،، ليتني وقتها عَود=يسقيك ربي يا عصور الاوايل
القهوة اللي شربها يعدل المود=اليوم محد ٍ عنَّها مير سايل
أول بــ دلة في يد القرم مسعود=واليوم تنقلها لنا ام الجدايل
يا سعود جيتك من غثا الوقت مهدود=أبيك تعدل لي مزاج ٍ تمايل
وانت تخبرني كانها سهود ومهود=أبدع لك الجزله تغيض الجزايل
أدن الدلال وزين البن يا سعود=أبيه لا رايب ولا هوب سايل
أبيه مثل خضاب ابو قرن مفرود=له ريحة ٍ تشبه زهور الشتايل
كبه على المحماس واحمسه بركود=تسمع وحي حرثه رشاش المخايل
ثم دقه بنجر ٍ على الصوت مشهود=خله ينادي لك عطيب الفعايل
واليا غدت تشبه لحمرا ً من الذود=صلَّه وركَّه فوق نار ٍ تهايل
الماء على ربعين له قدر معدود=في قمقم ٍ حدره سواد الفتايل
والبن فنجالين ينقص ولا يزود=والهيل ربع الكيل لا صرت كايل
إليا طبخ ريحه مثل زاكي العود=واليا استوى ريحة زهور الخمايل
ثم صب فنجال ٍ مخمس ومفنود=عاشت يمينك يا كريم السلايل
بن ٍ ليا ذقته وحاجبك معقود=غديت عقب الضيق حيل امتفايل
يجلا عمس راسك ولو كنت ملهود=متنومس ٍ كنك صنعت الهوايل
يستاهل الفنجال ابو طبع محمود=راس النظيف اللي عديم الخمايل
ويستاهل الفنجال ابو ثوب مقدود=راس الذي للدين صايل وجايل
ويستاهل الفنجال ابو كف ممدود=راس الذي كنه هطول الهمايل
ويستاهل الفنجال ابو حيل وزنود=راس الذي لله يخوض النزايل
ويستاهل الفنجال راسي يا بو جود=راس الحكيم اللي يحل المسايل
يا سعود انا شفت البشر نقص ٍ وزود=ناس ٍ كبار أنفس وناس ٍ همايل
واشوف ناس ٍ صدقها ما يبي شهود=واشوف ناس ٍ عايشة بالتحايل
واشوف ناس ٍ ملكها ماله حدود=واشوف ناس ٍ زين تلقى قلايل
ياعنك باب الرزق ماهوب مسدود=مير القوي ياكل حلال الهزايل
واللي يقول الخير واجد وموجود=ذاك الذي ما ذاق جوع العوايل
واللي يخاوي كل هيس ٍ ونمرود=هذاك عن درب الرجاجيل مايل
واللي يخاوي شلة ٍ ما بها فود=هذاك عمره دون الارباح زايل
واللي تذرى عن قسا الريح بحيود=قل له تذرى ،، ما عن الموت حايل
واللي غدا حبله على الدين مشدود=هذاك يم الفوز شد الرحايل
واللي يجنب كل زلة ومنقود=هذاك من خيرة عيال الحمايل
واللي يشوف ان البشر مابها زود=شافوه كبر (حصيَّة ٍ) بالنثايل
واللي تقوده حرمته ذاك مقرود=خبل ٍ سعابيله عليها تسايل
الناس تارد عد الارباح وتعود=وهي تورد به شحيح المحايل
والنذل مهما تكرمه ،، يجحد الجود=وإليا اوجس الزله تناسى الجمايل
والرزق ما ياتيك لعيونك السود=لابد ما تسعى بشتى الوسايل
والجود يمحي سمعة اعمالك السود=والشحّ يقلب كل طيبك فشايل
باب المخازي عن فتى الجود مردود=وثوب الظفر يزهى لوافي الخصايل
خويي الطيب ليا طاح مسنود=وان طحت يسندني قوي الصمايل
واللي يقول الطيب بالناس محدود=بلاه ما سيَّر لــ عرعر وحايل

وسلامتكم

..

[حمد الخمعلي]

صح لسانك ياعبدالله

وصف رااق لي كثراً

سلمت يالغاالي

كُن بخير

[بندر السديري]

عبدالله الدهمشي
وانت سالم
صح الساااانك ياالغالي
ولاهنت ع هاالوصف الرااائع
تحيااتي

[الحوراء بنت نجد]

عبدالله المعيوف الدهمشي

ماشاء الله عليك0 ابدعت في الوصف والاستشهاد

وقد ارتبط اسم القهوه وريحة الهيل بالخيل وعبق

الفروسيه وتراث الاجداد0 ومن منا لايستمتع

برائحة القهوه وكيفها المزاجي حيث تربينا على

هذا من الصغر0

كل عام وانت بخير وصح الله لسانك شاعرنا

لسمو هذا الحضور ورقي المعاني0

تقديري لك

[سالم صالح]

الراقي / عبدالله المعيوف الدهمشي ,,

اهلاً بهذا الحضور المميز الذي يشبه لرائحة القهوة الجميل وهذة الشامخة تشفع لك غيابك ولكن تجعلنا نطمع للمزيد وانت كريم وان شاء الله اننا نستاهل الطيب من الطيبين امثالك ,,,

صح السانك وكلك ابدعت وامتعت ايها الراااااااااااقي والمبدع ,,


تقديري وودي

[هندي المقبل]

الشاعر القدير عبدالله الدهمشي

صح لسانك على هذه القصيده الجزله والرائعه التي تناولت فيها القهوه التي تطرق لها الكثير من الاجداد

فهي لاتعد لدينا مجرد شرب بل رجوله وكيف للرجال ويتفاخرون بها وبمن يسويها

لله درك وان شاء الله ماتغيب الا عن الشر

[بنت الكحيلا]

صح لسانك اخوي عبدالله المعيوف

والله يعطيك العافية على القصيدة الرائعه

وتسلم على هذا الإبداع الغير مستغرب منك

لك شكري وتقديري