جولة لجنة تحكيم شاعر المليون2 (بالشرقيه) !!

[ماجد الوايلي]

تغطية / ماجد الوايلي - الدمام- خلف الكواليس


[align=center]سليمان القبلان : نعلن توقف التسجيل بالشرقيه / وماندري نقدر نصورهم كلهم ولالا

فهد القثامي: عتبي على التنظيم الغير جيد . ورسالتي وصلتها للجنة وهذا اللي اقدر اسويه

مجحود بن عسكر: كرامتنا راحت وطي مع شاعر المليون وتنظيمهم السيئ ؟

مشعل نغيمش الشمري: التنظيم العام الماضي افضل بكثير

صالح عمار: كلهم ماينفعون بسبع المذاهب !!!

هادي ال مخلص: اجازوني والحمدالله !!

-----------------------------------------------

/

.

/
.

أخواني واخواتي الاعضاء الاعزاء ...

نأخذكم في جولة سريعة مع محطة لجنة التحكيم لشاعر المليون وبالتحديد في المنطقة الشرقية .

لقاءات سريعه:
كان معنا احد المتسابقين الشاعر /مجحود عسكر اليامي
وقال:اول شي الله يمسيكم بالخير ثاني شي مشكور اخوي ماجد الوايلي على اللقاء اللي سويتوه معي .. اكيد انكم تبون نتكلم عن برنامج شاعر المليون رقم 2 ... والصراحه بعد النجاح منقطع النظير اللي حققه البرنامج بنسخته السابقه . كل واحد كان حريص انه يشارك بهالبرنامج ولكن يبقى للشاعر ((كرامته)) في كل الاحول ووده يشارك وهو محفوظه كرامته محفوظه هيبته محفوظ كل شي له والشاعر يمثل ادب والادب هذا على عزه واللي صاير اليوم واللي قاعدين نشوفه باللوبي بالفندق هل النقاد هل المنظمين عندهم علم بالشي اللي حاصل من عدم تنظم للمتسابقين والدربكه الحاصله ولا لا ويبقى البرنامج من اميز البرنامج التى اقيمة بالعام الماضي .. ونتمنى انهم الاهتمام اكثر والتنظيم جدا سيئ يعني يجيك واحد يقولك رقمك بعد اشوي ويجيك الثاني يقولك الحين .. شعراء من افضل شعراء المملكه تشوفهم برى كانهم ((يشحذون)) الكلام هذا غير منطقي وهذا اللي حاصل بصراحه وانا اتوقع حتى اللي دخل وقدم واجيز طلع وهو غير راضي تماما عن عناء الوصول وتكبد اللجنة والمنظمين بمكان مغلق دون تواجد شخص يكون رابط بينهم وبين العالم اللي باللوبي . وبصراحه لو استمر على هذا بالايام القادمه سوف يسئي للبرنامج ككل

وقال المتسابق الشاعر / حسين الحارثي من الجبيل التنظيم جداً سيئ مره مره والمشاركين اللي بالرياض مدخلينهم على المشاركين اللي من الشرقيه يعني كلهم فوق 1300 وهذا كلام مو منطقي ابد . والمسابقه هذي ماهي زي المسابقه الاوله ابدن والسبب

وقال المتسابق الشاعر / مشعل نغيمش الشمري
انا اقول ان التنظيم العام افضل وبالنسبه للتوقيت كان خطا واهل الرياض المفروض مايدخلونهم على اهل الشرقيه والمشكله هم اللي قالوا لهم تعالوا للشرقيه واكيد الحين بيقولون الحقونا لأبو ظبي .. وقالها سليمان القبلان (لو تروحون ابو ظبي بطياره الي هناك اريح لكم !!!!!! )

وقال الشاعر / صالح عمار
بختصار شديد (اللجنه والمنظمين وكلهم ماينفعون بسبع المذاهب ) << صريح

الشاعر / هادي ال مخلص قال : اجازوني اللجنه ولله الحمد واالبرنامج شهادتي فيه مجروحه وهو منبر اعلامي كبير . ويستاهل البرنامج . وبالنسبة لمشاركتي الليله كانت حلوه و(حمد السعيد) خض قلبي اشوي يوم قالي ( انا ما اجيزك ألا اجيز (مندوبك) )

وقال الشاعر مسفر ال مخلص : والله اعتقد سبب المشاركة في شاعر المليون هو طموح أي شاعر للوصول والمشاركه بالبرنامج الذي اخذ زخم اعلامي كبير جدا واشكر القائمين على برنامج شاعر المليون وانا الان بدخل وانشاءالله (يجيزوني )

قال الشاعر / سالم عبيد المري من المنطقة الشرقيه شعوري و انطباعي عن شاعر المليون هو بكل تاكيد فكره عضيمه وانشاءالله في تطور وساعدة على تطوير الشعراء ومعرفة اشياء من الممكن ان تكون غير واضحه للشاعر وقد نجح بالمره الاولى ونتمنى له النجاح . واللجنه ماقصروا والله انهم يتعبون والله لا يهينهم .

لقاءات سريعة شعراء قاموا بالزيارة :

الشاعر / محمد بن عويضة : كان من ضمن الحضور واخذنا معه هذا التصريح الحصري وتحدثنا عن سبب تواجده وقال: والله ياماجد جاي اسلم على الجماعه بلجنة التحكيم ونشوف الوجيه الطيبة ولا البرنامج فازوا به اللي بالاول ولا الحين هذا حصاد الخوف (وقال مازحاً ) << حلوه مازحاً ان هذولاء كلهم كانوا خايفين يدخلون اول والحين شفهم مع الزحمه

الشاعر / فهد القثامي: كان ضمن الحضور وخصنا بهذا التصريح : اولا حضور كان بدعوه من اللجنة بخصوص موضوع غير شاعر المليون وجيت اشوف الموضوع واسلم عليهم بالمره. وبالنسبة للزحمه والربكة والعالم اللي متجمعين باللوبي هذا سوء تنظيم وانا تكلمت على اللجنه وقلت لهم اللي تسوونه غلط وهذا شي ماينسكت عنه رجال وشعراء السعودية مخلينهم عند البيبان يطرون مايصير هالكلام والرساله وصلتهم وهذا اللي اقدر اسويه وما اتمنى لهم غير التوفيق .

الشاعر : محمد بن ساقان : برنامج رائع ويستحق هذا التجمع ونتمنى لهم التوفيق وفالهم المليون

* * * * * * * * * * * * * * * * * * * * * * * * * *
وقد كان من ضمن الحضور للمسابقة فالح بن قشعم ومدغم بوشيبه ومجحود عسكر وعبيان اليامي وخالد العتيبي ومشعان البراق واسماء اخرى اعلامية ولمحة زايد بن كروز بس مدري هل هو مشارك ام لا .وسمعنا انه طلع زعلان وهناك من قدم للزياره ومنهم محمد عويضة وفهد القثامي ومحمد بن ساقان وكان من ضمن الحضور ايضا من الاعلاميين .. حماد الحربي (جريدة الرياضية) فهد الوايلي (جريدة شمس)




سليمان القبلان :
- انا غامرت ودخلت اليوم 100 شخص وراح اصورهم لو اقعد الي الصباح
- اللي جونا من الرياض (بالمئات ) ورفض تحديد الرقم
- بالنسبة لأهل الرياض اللي جونا عملنا لهم (مكس) مع اهل الشرقيه يعني واحد من الرياض وواحد من الشرقيه وهكذا
- بالنسبة للتمديد انا انتظر مكالمة من ابو ظبي وتتحدد هل سوف يكون هناك تمديد ام لا
- الله يلعن ابو الشعر ياخي انا بنفسي طفففففففففففشت << رد على واحد قال طفشناااااااااا
- انا ما اقدر اعطيكم كم اقدر اصور باليوم كممممم لانها تعتمد على امور فنيه فنيه فنيه انتم وش عرفكم فيها << هنا عصب سليمان ههههههههههه انا قاعد اتعامل مع ثماااااان مايكات وكاميرات وإضاءه وش فيكم ؟

اليوم الاخير :
- تم تصوير 124 شاعر
- بان على لجنة التحكيم التعب الشديد والارهاق وخصوصاً الدكتور غسان الحسن
- تركي المريخي يسمح لمتسابق اضاع قصيدتة التقدم للجنة بدون(تصوير)بعد ان اعلنوا التوقف ولكن هذا المتسابق (تم اجازته بالاجماع ) ومنح الشهادة (وكان اخر متسابق بالشرقيه)
- بدر صفوق كان حازماً و(مكشر) طوال الوقت
- حدثة مناوشات بسيطة بين عارف عمر واللجنة والمخرج!
- اخر اثان تم التصوير لهم (حمد الضوي – بركات الشمري)


من مصادر موثوقة :

الجميع شارك في الوساطة سوى اثنان (الدكتور غسان الحسن / سلطان العميمي)


الصور :




تجمعات امام مدخل الفندق



الشاعر فالح بن قشعم باللوبي



الشاعر عبيان اليامي



الشاعر فهد القثامي وزيارة خاطفه وردة فعل غاضبه على مايحدث


سليمان القبلان وحديث مع الاعلاميين


متسابق يملئ استمارة الاشتراك


من هذه المنطقة يتم اعداد القصائد للدخول للجنه


تااابع

[ماجد الوايلي]

هادي ال مخلص ويحمل شهادة الترشيح للمرحلة الثانية


الشاعر بركات الشمري بعد خروجه من اللجنه وهو مرشح للمرحلة الثانيه


عارف عمر يجري لقاء مع شاعر


موقع التصوير ويظهر بالصورة عضو لجنة التحكيم (تركي المريخي)وسليمان القبلان

============================================

تقبلوا تحياتي ,,,,

الاعلامي ماجد الوايلي [/align]

-----
نتأسف لعدم دقة الصور بس (الممنوع مرغوب):biggrin23: والتمس منكم العذر

[فايز البذيلي]

الله يعطيــــــكـ العافيه


اخوي

ماجد كفيــت و وفيــــت


تغطية رائعه وحضور مميز


كل الود

[عبدالله الثابت]

ماجد الوائلي


تغطية رائعه


وملاحظه عندي على الاعلامي ماجد الوائلي


ياليت لو حطيت رابط ويلان على الصور


لان اول مره اشوف اعلامي يكتب اسمه على الصوره



تقبل تحياتي وتقديري

[ماجد الوايلي]

فايز . . .


يعطيك الف عافيه ولا هنت ياقلبي


. . .

[ماجد الوايلي]

عبدالله الثابت ...


التغطية ليست لحساب شبكة ويلان العربية فقط . . . هي لجميع المنتديات المهتمه بالشعر والادب . .

وهذا التقرير والصور هو جزء بسيط وضعته للمنتديات .. وهناك كميات من الصور الحصريه لماجدالوايلي فقط . . وتصريحات حصريه ايضاً سوف تنشر قريباً في مجلة ملامح

وكما تعلم ان الوصول الي كواليس شاعر المليون صعبه جدا على اي صحفي آخر وكان هذا العمل مجهود فردي وشخصي لأسم ماجد الوايلي . ومنتديات ويلان على عيني وراسي ولكن لم يكن هناك تنسيق مسبق معي وانما هذه الكلمه تجبرني على وضع التقرير هنا .. والكلمه هي (ويلان)

ملاحظه : التقرير تم ارساله الي الكثير من المنتديات لانه حصررررري لماجد الوايلي ومجهود شخصي وثاني مره اعيدها مجهود شخصي


شكرا على ردك الجميل والمحفز ايها الاعلامي الذي اتعلم منه الكثير

تقبلوا تحياتي

الاعلامي ماجد الوايلي