يوميات رمضانيه

[ريما محمد]

السلام عليكم ورحمة الله وبركاته
بالامس كان اليوم الاول من شهر رمضان المبارك اعاده الله على الامه الاسلاميه بالعزة والنصر المبين
اليوم الاول له ميزته وحاولت ارصد تحركات اليوم الاول وخاصة وقت الذروه يعني بعد صلاة العصر مباشرة
حاولت ان اكون شوي متطفله على بيوتنا وبخاصة على مطابخنا في هذا الوقت وكذلك على اسواقنا (المطاعم والتموينات) والا الباقي محد جاب خبرها وبالمهمه الخارجيه اكيد ما في الا اخوي الي طاف بالسواقه المهم راح وما قصر وانا اول شي بديت بمطبخ بيتنا ومريت من عنده بشويش علشان ما يشوفوني و يكلفوني بشغل ما هو هروب بس انا مشغوله بالموضوع والا الشغل عادي عندي <<<<<<<< وحده تتميلح
بديت اطق البيوت (طبعا بيوت اهلي واقربائي اللي امون عليهم) والطق بالتليفون مثل ما تعرفون
اتصلت وكانت النتيجه ما يلي :
البيت الاول بعد ما سلمت وباركت لهم بالشهر الفضيل سالتهم عن احوال مطبخهم بالوقت هذا فقالت محدثتي ان الحمدلله كل شي تمام واشرفت على جميع الطبخات وقالت هالسنه غيرت شوي بالسمبوسه خليتها حاره !! سالتها ليش قالت حطيت عليها بهارات هنديه وشكلها صارت حاره قلت الله يعينك على الهوش
البيت الثاني يوم سلمت حسيت ان البنت متوهقه بشي سالت سلامات عسى ما شر قالت ياااااااااااااااااااااربي مدري وش اسوي وانا اشوي البيتزا خلص الغاز وش السواة يا ربي ما بقى وقت ووشلون بكمل الفطور والسمبوسه فطبعا انتم تعرفون اني راعية فزعات ومواقف<<<<<<<<<<< شقرديه قلت لها ولا يهمك برسل لك هالحين غاز قالت وش رايك يمديني قلت ايه يمديك وفعلا ارسلت لها المطلوب
البيت الثالث ردت المتحدثه الرسميه للبيت بان العمل بالمطبخ على قدم وساق بس عندهم مشكله وهي ان كل حبة سمبوسه تقليها ياكلونها الاطفال ( ما شاء الله بزارينهم كثييرين) وتقول ما بقى شي للصايميين وش اسوي طبعا قلت لها اقلي بطاطس <<<<<<<<<<< اقولكم راعية مواقف وفزعات
البيت الرابع هذا عاد شكل المتحدثه الرسميه ما تدري هو رمضان والا شوال شكلها نايمه وازعجتها وقلت لها الى هالحين نايمه قالت ايه انت وش فيك مزعجتني قلت لها والفطور ردت ببرود ايه امي والشغاله بالمطبخ ويسوون كل شي قلت لها حرام عليكي ساعديهم <<<<<<<<<< مسويه حنونه وسنعه قالت وانتي وش دخلك انتي هالحين ليش ما تساعدين امك جالسه تدقين على العالم وتزعجينهم هنا تلعثمت ومدري وش ارد بس ما عليه بكمل اتصالاتي
البيت الخامس يوم اتصلت على المتحدثه الرسميه واسمع اصوات سيارات سالتها خير وينكم قالت رايحين لعمي بالسويدي لزم علينا بالفطور وتصدقين كل اشاره نجلس عندها اكثر من ربع ساعه مدري متى بنوصل هي رايحه من حي المرسلات للسويدي قلت شكلكم بتصلون على السحور تمام
حاولت اتصل باهل لندن علشان الموضوع يصير متكامل بس للاسف ما ردو
وقبل المغرب بشوي جا اخوي وسالته ها وش الاخبار قال ما تصدقين يا ريما المطاعم والزحمه شي عجيب تصدقين كيلو السمبوسه ب20 ريال واللقيمات ب........................الخ
هنا تساءلت ليش كل هذا يعني حنا ما نا كل الا برمضان ؟؟ في حين من المفروض ان نرشد الاستهلاك الغذائي برمضان ونكثف العبادات من قراءة قران واستغفار واعمال صالحه
شهر رمضان شهر واحد في السنه خساره نضيعه بالمطبخ!!!!!!!!!!

[شمــــــــوخ]

صدقتي ياريما

هذا حال أغلب البيوت يضيع يومهم بالمطبخ الا من رحم ربي ..!

جزاتس الله خير..

والله يعيدهـ عليتس هالعام وكل عام

::

شمــــــــوخ

[فهد معزي]

مشكوره ريما على هذا السرد

ولاكن هذا حال الامة هذا الوقت

اصبح رمضان شهر الاكلات والمسلسلات

وابتعدنا عن مضمون هذا الشهر

وهو التقرب لله والاكثار من الاستغفار وقراءت القران

اطلب من الله ان يرحمنا برحمته

[مزيد المزيد]

فكر مميز وقصص واقعيه ..



والله يرحم حالنااااااااا ...


قرين امس في جريدة الوطن نص صفحه مخصصه لاوقات المسلسلات والبرامج


في عدة قنوااااااااات وذلك حرص ً على انه مايفوت ولا مسلسل علينا


قلت بيني وبين نفسي (( جزاهم الله خير حريصين علينا :d ))

[هندي المقبل]

اختي العزيزه ريما

اسعدك الله على هذا الموضوع المتميز

موضوع واقعي سردتي في الواقع الذي نعيشه

لا مانع من الاكل والشرب في هذا الشهر والاهتمام به قليلا لان له طابع خاص في شهر رمضان وكثير من هذه الاكلات لو اكلناها في غير رمضان لن تكون لها نفس النكهه المميزه في رمضان

التبذير الحاصل في شهر رمضان بالاكل والشرب لهو امر محزن حقا فتجدين ربة البيت متواجده في المطبخ من بعد صلاة الظهر وهي تجهز في الاكلات الشيء الكثير مع العلم انه لايتم اكل الا القليل منها.

ولكن هذا الامر اصبح عاده

اما عن الزحام فحدثي ولاحرج فوالله كان الرياض ازداد عدد سكانها الي الضعف من شدة الزحام سواء في الصباح او المساء .

لا ومع هذه الزحمه تجدين اخلاق الناس جدا سيئه وعند كل اشاره هواش وازعاجات بواري

الله المستعان!!!

اختي العزيزه اشكرك مره اخرى على موضوعك المميز

مع كل الود

[نجلاء محمد]

السلام عليكم

عزيزتي ريما محمد موضوع مميز بحق وحكاية يوميه طوال شهر رمضان

لكن نرجع ونقول انه شهر رمضان له ميزه واجواء خاصه تعودنا عليها منذ الصغر عودتنا امهاتنا على اجواء تخص رمضان فقط من ناحية تنوع الاصناف والاكلات لا نستطيع ان نخفي هذه الملامح عن هذا الشهر بالذات لانه اصبح شيء مكمل لرمضان يعطيه اجواء خاصه ننتظره جميعا لكن المبالغه في الوقت الحالي هو ما يسبب ازمه حقيقيه في رمضان وما زاد عليه طبعا المسلسلات التلفزيونيه والمسابقات التي احتلت الصداره في جميع القنوات وكأان التلفزيون يتوقف في باقي اشهر السنه

هنا يكون الانسان رادعاً لنفسه بان يشاهد ما يعرض او ان يعرض عنه ولا يعيره اهتماما ويشغل نفسه بما خصص بهذا الشهر الفضيل من الاقتراب لرب العالمين وان ياخذ فرصته فيه من المغفره والتوبه كي يخرج من هذا الشهر مزوداً بما ينفعه بيوم الدين


خيتي لك كل الحب

وتقبل الله منا ومنكم صيامه وقيامه

تحياتي

نجلاء

[ريما محمد]

اختي العزيزه نجلاء
كل الشكر لعينيك الغاليتين اللتين مرت على حروف الموضوع
لك تحياتي
اختك ريمــــــــــــــــــــا