تكفى . دمار أهل الكرم والمروات.......

[احمد العريفي]

ياقايـلٍ تكفـى ... بتكفـى شقينا=ياما لجل تكفـى لقينـا المضـــــرات
ياما لجـل تكفـى نزلنـا ورقـينا=وياما تجشمنا الدروب العســيـرات
تكفى تـرى تكفـى دمـارٍ علينـا=تكفى دمار اهل الكـرم والمـــروات
باسبابهـا صرنـا لهـم كافـليـنـا=ولاجنينـا الا الزعـل والغـرامـــــات
كـم ليلـةٍ لعيـون تكفـى سرينــا=نسري لجل تكفى على غير مشهات
وياما حملنـا ارواحنـا في يدينا=والعمـر ماياقـاه كثـر المــــــــدارات
وكم غاليٍ لعـيون تكفـى عـطـينا=نعـطي ولانحسب حساب الخسارات
وان قلت تكفى قلت ابشـر وجينا=نجــيـك لو دونـك بحـورٍ غزيـــــرات
نسـوق لجلـك كـل شـيٍ ثمـيـنا=نجـيبهـا بالمـال والا الوجـاهــــــات
على البلا نصبر إلـى مـن بلينا=نصبر على شيل الحمول الثـقــيــلات
لاتستغـل الحلم والطيـب فـيـنـا=الحـلم له حـزه وللـطـيـب حـــــــزات
كم جاهـلاٍ لعيـون تكفـى نصينا=وكبرت بعين الجاهـليـن التفاهــــــات
الجهـل أعيَـى كل طـبٍ مكـيـنـا=من عـصرادم لين عـصر الحضارات
اخشـى عليكـم ساعـةٍ تعترينا=نسرج بها خيل الجهـل للجهــــــالات
دام الدواء جهلٍ على الجاهلينا=نجهل جهل اعوام في ظرف ساعـات
نجهـل وحنا للجهل كـارهـيـنــا=مضـطر والمضطر يرقى الصعـيـبـات
ياللي تقول الحـزن خيـم عـلينا=الحزن بعض احيان للنفس مـلـهـــات

احمد بن عبدالرحمن العريفي
(نديم المجره)

[معيض بن عريفج]

الله الله
الف الف صح لسااااااااااااااااانك

قصييدة راقت لي كثيييييييييير

ولي عوده تحياتي لك

[صبيح العوض]

اخوي احمد العريفي

صح الســــــــــــــانك حتى ترضى

قصيده شامخه من راس شامخ لله درك انشهد ان جميع قصائدك تستحق الاشاده وبدون مجامل

تحياتي واحترامي للجميع

[علي السابل]

صح لسانك ملايين

قصيده شامخه من شاعر مبدع وحكيم

.. بس والله يا أحمد اني أتفق معك ان الكثير من الرجاجيل الذين هزتهم تكفى

أودعتهم سجون الندم ... ومع ذلك لا زالت تهز الكثير منا مع حتمية عواقبها ..


شكرا على هذا الحضور يا احمد

دمت بخير

[بدرفهد الجعفري]

الشاعر احمد العريفي

والله اني اول ما اشوف اسمك ضمن الشعراء في الصفحه الرئيسيه تنفتح نفسي للمتابعه والقراءه دون قصور بباقي الشعراء

ابدعت يا احمد وصح لسانك مليووووون

[سالم العنزي]

احمد العريفي

صح لسانك على هذه القصيده الجزله بمعناها ومحتواها وكلماتها

صح لسانك مليووون

[سليمان مفضي العنزي]

الشاعر احمد العريفي

الف نعم بك وابي اقول لك اول "تكفى" في هذا المنتدى




...




..


...


تكفى لاتحرمنا من ابداعك الشعري فشاعر مثلك له الكثير من المعجبين

صح لسانك