تباشير الفرح - °~*¤®§(§ شبـــكة ويــلان العـربـيـه §)§®¤*~ˆ°

**فــرج الدهمشي** · 01/09/11, (06:20 AM)

هلت تباشير الفرح ليلة العيد = وسقت التهاني بالبيوت الجزيله
اسمى التهاني سقتها لباشة الغيد = اصدق مشاعر من خليل لخليله
للّي غلاها داخل القلب تحديد = سبة عناي وعلتي كل ليله
ياما انتظرته بين حسره وتنهيد=عيني اسليها ونفسي عليله
الغاده اللّي وصفها غير يازيد = ام العيون الناعسات الضليله
اللّي غيابه يشعل النار ويزيد = وسط الحنايا مثل جمر المليله
من لوعة الفرقا وكثر التناهيد = هز الكيان وخافقي عزتي له
ليا اقبلت مثل المزون المراجيد = تسقى خفوقي والضلوع النحيله
لعيونها نبض القصايد اناشيد = تروي حكايات الليال الجميله
اكتب لها شوقي وصدقي بتأكيد = بالغايه اللّي كل بارق تخيله
للشامخه بنت الرجال الصناديد = اللّي غلاها ما ادور بديله
واجمل هديه تحتوي فرحة العيد = فيها التهاني والمعاني النبيله