** شمــــوخ وعين سياسية ثاقبـــه **( مانيب انظل ) - °~*¤®§(§ شبـــكة ويــلان العـربـيـه §)§®¤*~ˆ°

**شمــــــــوخ** · 24/03/07, (11:32 PM)

<<خقيت علي عقب ثاقبه

.
.
.

الله يعين اللي دخل لأن نفسيتي تافلتن العافيه
وساعتي البيولوجيه حالفتن يمين ماتهنيني بالنوم
باقي شي حفظته بعد وجايتن ارزه بس نسيت (قهر قعدت يوم كامل احفظ كلمه اكشخ بها بس نسيتها )

وقلت دام نفسيتي تافلتن العافيه وساعتي البيولوجيه طاقتها ام العبيد وبما ان اعصابي خامده اليوم
جايتن انغص عليكم لأني في كل مره افكر وابحر في عالم التفكّر يشوتني العقل ويقول لي لا عاد تفكرين
في كل مره احاول فيها ان احلل الاخبار السياسيه والخطابات الرسميه ترجع تشوتني
قلت مالي الا المنتدى بكتب فيه مالذ وطاب من الاخبار السياسيه والتحليلات الغير منطقيه
وانشر فيه افكاري وتحليلاتي بدون ماانشات ..

بداية حبيت اشوف وين المتعه في متابعة الأخبار لأن فيه ناس ادمانهم الجزيره والسي ان ان ..
يعني ماراح نستفيد او نفيد..وش بيد المواطن المسكين اللي معامله بسيطه له تقعد بالشهور
هذي وهي اموره الشخصيه يالله يقدر عليها فما بالكم بأمور اكبر واكبر
اذا كانت الفايده المنشوده هي

حرقة الاعصاب وقرمطة الاظافر وتنتيف الشعر فأنا اشد على ايدينكم
واقول هذا الهدف الصح ..

خلوكم معنا لتشاهدوا الجانب الفسفوري من الأخبار والوعي القومي
<<قسم منتيب داريه وش تقولين من حتسي كل ماشافت كلمه مافهمتها حطتها بذالموضوع

\\
//
\\

الأخبار السياسيه:

كوفي عنان الى اجتماع طارىء مغلق للبيت الابيض

^^
تسذا تنقلب علومه كل ماتذكر كواندليزا ..
كواندليزا رايس تستشور شعرها كعادتها بعد ان فتحت ستائر الغرفة المخمليه
كي يتخللها أشعة الشمس الصافيه
كصفـاء قلبـها تنتظر المعشوق بفـارغ الصبـر لا تعلم ماذا ستناقش معـه
ام ماذا سترطن او ماذا ستفعل حينها
نزلت لتقع عيناها الناعستان امام سحر عيناه القامطتين ..
نعم انه كوفي أنان قد مر وقت طويل
<<سوت مثل التكرونيه اللي قالت زوجي اسمه يبدا بحرف الالف
اسمه ابودي

^^
هماه قال يبي يستقيل مادري يتقاعد يستملح عندها يبيها تقوله
لا تكفى وش البيت الابيض بدونك يا ضياه نوره
لا تغركم البوهه الظاهر انهم متبلدين الاحساس ولا لهم في الرومنسيه لكن هم الرومانسيه بعينها

/

/

هل تتحول حركة كفاية إلى حزب هياط قومي؟

^^
خقيت عند الساعه مطقمتن بلوزتها مع لون الساين اللي شايلتها ياسفاب الشباصات الصفرا اللي كانت شاريتها من شارع ام علي سته واربعين ماطلعت بالصوره
بس خلوا عنكم بدوا يتطورن وانا شايفه البوادر من الساعه الذهب الى البلوزه الصفرا
**
ظهرت حركة كفاية على الساحة السياسية المصرية فى صيف عام 2004 ..
فى شكل تجمع لمجموعة من المثقفين وأساتذة الجامعات والمحامين الذين عارضوا مبدأ تمديد الحكم للرئيس حسني مبارك..
هم خلقه ضايقتن صدورهم وودهم يغيرون الواحد يمل
وذا مستقعد لهم من الوجه الزين ..
ووده يخلي ولده ينسدح عالحكم بعد
باقي يجي حفيده ويتبطح عالحكم وتكمل الطقه
ياخي ورى ماتذلف وتخلي العالم تعيش صدز كفايه
<<وخروا عنها بكيزه حسنين ..
وأي مواطن مصري راح يقول كلمة كفايه راح يتم القبض عليه من المخابرات ..
<<خشه تقول هم قالوه ..
مالهم داعي صراحه كفايه كلمه تلقى رواج في الشارع المصري مستحيل يلغونها ..
نلقاها عند الفوال وعند الفوال اللي جنبه والفوال اللي بالشارع اللي جنبه
مثلاً ابو رياض نزل الحاره ووده يجيب خضار نزل واللي عليه بالخير وسلم وقاله حط لي
حزمتين جرجير وحزمة بقدونس وقام يتميلح عليه راعي المحل وحطله زياده جا قال لا كفايه ..!!
يجرونه؟

أونفيسه الترفه ماشيتن في السوق وجرتها بكيزه محل وقالت (عاوزه اشتري ده وده وداك )
<<مصريه مشفوحه <<لاعاد ترطنين مصري
قالت لها نفيسه كفايه بأه ياخذونها للمباحث؟ : (
/
/

حسيت بانتماء لكلمة ليبرالي مير ودي احشرها بكل جمله بكل صغيره وكبيره ..
مره اختي قالت لي وشرايتس بهالفستان قلتلها فظيع تحسينه ليبرالي صح ..

مادري بس حسيت اني قمت اهايط : )

/

/

الأخبـــار السيــاحيـــه:

سياحه افريقيه سحر المكـان وصفاء الأنسان:

اقول ماحد يذكر أغنية ربوع بلادي بالقناه الاولى كانت أغنيه شاعريه وحالمه..
منيب ناسيتها لا اللحن والبنات اللي لابسين من الفساتين النفيشيه ولا الشباصات الورديه ..
الزبده ان عندي لكم خطه عجبتكم نفذوها ماعجبتكم اطبعوها وبلوها واشروبوا مويتها
تنزلون تسانكم بالشرقيه ولا الرياض من الشرقيه للرياض ومن الرياض عالقصيم تقعدون لكم يومين وتعينون خير
تروحون تشوفون عبله وعنتر وتمرون على عيون الجوا ومن بعدها عالمدينه تقعدون بها
يومين بعد تصلون بالمسجد وتكسبون لكم أجر ومن المدينه على مكه على الحرم تقعدون هناك يومين بعد تروحون الحرم
وتدعون لي : ) وتمشون من مكه لجده تقعدون فيها يومين بعد تشوفون جده غير ومن جده عالسودان او مصر..
بس لا تقربون لم المغرب وتونس من السودان تقعدون يومين وتحركون من السودان على اثيوبيا تقعدون
فيها ثلاث ايام وتمشون من اثيوبيا على كينيا تقعدون يوم في كينيا ويوم في غينيا..
تنزلون من غينيا على تنزانيا تقعدون بها يومين بعد تشمون هوا ومن تنزانيا على موزمبيق..
وكـذا تكونون قضيتوا اجازه من العمــر ولا تنسون توروني الصور اللي صورتوهم وتدعون لي
على هالخطه اللي وسعت صدوركم في ربوع افريقيا ..
اقول بلوها واشربوا مويتها ..

الزبـــــده:

خلاص تكفون صدز من قال ان صحافتنا يرثى لها سواء كانت فنيه اورياضيه او سياسيه
خصوصاً في الخليج انواع الكذب والتلفيق والاشاعات يقالهم بيجذبون الناس لهم..
والله شي يرفع الضغط ولا مره افتح مجله الاقيهم مركبين صورة اريام مع ياسر وانهم في شهر العسل!!
تكفون كبروا عقولكم شوي شي مايدل الا عالانحطاط اللي في المحررين والقائمين على هالمجلات الفاشله..
ولا مرتن جايبين خبر مهم صورة بريتني بدون مكياج؟ طيب؟ اكبر همنا بريتني جايتن بمكياج ولابدونه

مير لو جابوا لنا هالخليجيات بدون مكياج ابرك حبتين الوحده ماتطلع الا تقل مهرج..
هذا غير الاخبار الرياضيه كل كل كلمه فاتحين لها صفحه.. اللاعب الفلاني انتقل واللاعب الفلاني وقع
ليه يحطون اخبار موب مؤكده!!ماراح يستفيدون الا انهم يشتتون اللاعب والجمهور مير عندنا صحافه مطيوره حبتين ..
ولا المقابلات الصحفيه وش ذي النذاله؟ يحوقون ام الحتسي او يحطون في الصفحه الرئيسيه الحتسي اللي يعجبهم
ولا يجيبون التكمله مادري هم مسوين فيها بيخلونا نشتري المجله ولا نذاله للفنان ولا عدم احترام..

/

اللي بيطلع لي صورة كواندليزا وكوفي عنان معاً له هديه عجزت الاقي لهم صوره

/
.
برب (قلب منشلخ)

/

<<<<< عزالله انشااات موضوعتس

فايز ارفق علينا الله لايهينك

/

شمـــــــــــوخ

**فايز البذيلي** · 25/03/07, (12:56 AM)

اقتباس:

في كل مره احاول فيها ان احلل الاخبار السياسيه والخطابات الرسميه ترجع تشوتني
قلت مالي الا المنتدى بكتب فيه مالذ وطاب من الاخبار السياسيه والتحليلات الغير منطقيه
وانشر فيه افكاري وتحليلاتي بدون ماانشات ..

وششششششششش عندها القومية شموخ

صايره ضد التيار

الجميل في الموضوع انك عارفه وصلتي شفى الحفره

ولكن نستمع وإبنصات شديد

مع الشذب والاستنكااااار<<ورقة عمل تحميه

___________________________

القديره

شموخ

دائما تتميزين بالكتابة الهزلية الساخره

وهي من ارقى انواع الاسلوب في الكتابة

اشيد بك مرارا وتكرارا

ونصوت بصوتك لعل وعسى

دمتِ

**مصلح النشمي** · 25/03/07, (08:34 AM)

.

مشرفتنا المتألقة شمووخ

يحق للمشرف او المشرفه مالا يحق لغيرهم ======اظن هذي الليبراليه والا انا غلطان:d

على طاري الاخبار.. تذكرت ابوي اطال الله في عمره واخي الاكبر اطال الله في عمره وانتم اطال

الله في عمركم===جازت له الجمله

كل ما ادخل عليهم الا يطالعون العربيه وكل واحد منهم يسأل الثاني وش الاخبار:d

اما انا ولله الحمد فعندي حصانة ضد الاخبار ولي فترة طووووووووووويلة ماشفتها لانها هي نفسها تنعاد كل يوم

مافيه شي جديد اللهم اختلاف عدد القتلى والجرحى بس..!!

شكرا لك ولطرحك المميز

تحياتي لك

**م ب ع ث ر** · 25/03/07, (08:34 AM)

/

اقول ماحد يذكر أغنية ربوع بلادي بالقناه الاولى كانت أغنيه شاعريه وحالمه..

" ذكرتيني اضيف قناو السعوديه في الرسيفر عندي "

تحياتي لك شموخ

.. !!

/

م ب ع ث ر

**م ب ع ث ر** · 25/03/07, (08:35 AM)

/

اقول ماحد يذكر أغنية ربوع بلادي بالقناه الاولى كانت أغنيه شاعريه وحالمه..

" ذكرتيني اضيف قناة السعوديه في الرسيفر عندي "

تحياتي لك شموخ

.. !!

/

م ب ع ث ر

**ابو وليد** · 25/03/07, (10:34 PM)

مشرفتنا المتألقة شمووخ
دائما تتميزين بالكتابة المنفرده عن لغير
شكرا لك ولطرحك المميز

ودمتي بخييييييييييييييير

**فارس المطردي** · 25/03/07, (10:57 PM)

يعطيك العافيــــــه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري