عسى الغيث يسقي بالنوازي طويلها

[فواز الغسلان]

عسى الـغيث يسـقـي بالنـوازي طويلـهـا=وياطاه مـن وبـل السحايـب شليلهـا
مع الوسم ورعود السحايب يـا كنهـا=ذياب(ن)بوسط الليـل يطنـب عويلهـا
علـى مرقب(ن)يامـا تـعـلـيـت نـايـفـه=وعيني على مزن الشمـال استخيلهـا
اخايل مزون(ن)بارقه يوضـي الدجـى=على ديـرة الـمحبـوب يـقـدح فتيلهـا
تسيل الـشـغـايـا مـن مـهابـط فـيـاضهـا=وتسـقـي بساتـيـن الغـلا مـع نـخـيلهـا
وتـخـضـر جوانـبـها مـن الشيـح والنفـل=ومع الصبح تطرب للحمـام وهديلهـا
ديار(ن)بها من صاب روحـي وسلنـي=تشادي من خشوف الجوازي كحيلها
فـلا شافت عيوني مـن الزيـن والـحـلا=مثل زين من غـطـى ظهرهـا جديلهـا
يهيض الحشى بالقاف من جرح خافقي=وينقى من اشعـار الضمـايـر جزيلهـا
رمـتـنـي بـرمـح(ن)مـن نـواظــر عيونهـا=ورمح(ن)كوانـي والسبايـب رحيلهـا
فلا هي حـمـتـني عن مطاعـن رماحـهـا=لاجـل تـهـتـنـي عينـي بلـذة مقـيـلهـا
ولا هي سقت روحـي غرام(ن)يـبـلهـا=ويـطـفـي عن الـروح الرهينـه غليلهـا
فدع ذا وياساري على دار مـن سكـن=جبال(ن)تعز اللي بضيمـه يجـي لهـا
جبال(ن)يـنـابـيـع الـصـخـى فـي ركـونهـا=وعـجــزت دواليـب الـذواري تزيلهـا
تـجـي بـيـت ابن عـمـي ودمـي ومنبعـي=لو انـه تـبـع قـول الحواسـد وقـيلهـا
وتلقى قبالـك نـقـوة الـطيـب والصخـى=زمول(ن)تشيل مـن الشدايـد ثقيلهـا
وقل له ترى طبعي على ماهـقـيـت بـي=وتراني مـن اللـي ماتسلـم دخيلهـا
وانا لك صميل الـقـيظ في منهك السفـر=اذا بـار بربـوع الردايـا صـميلـهـا
وعليل العرب لاطاح بالــقـاع وانتـخـى=من الطيـب نفسـي ماتـخلـي عليلهـا
واذا شح غيري فـي جـميلـه وباقنـي=لـك الله طـبــوعـي ماتـخـلـي جميلهـا
ولا ارضى هميل الدمع بعيون صاحبـي=ولا ضاق جـاري بالعيـون وهميلهـا
والاصحاب لو يخطون نصبر على الخطا=ولا اجـزى رفيقـي بالخطيـه مثيلهـا
فلا المـال يطغينـي ويقلـب طبايعـي=والاموال حطت مـن عشقهـا ذليلهـا
ولا الفقر مانـعـنـي علـى بـذل قدرتـي=وشـر الخــلايـق بالـطـبايـع بخيلـهـا
ومن رافقن يشهد على طيـب معدنـي=والاقـوال تلقـى بالفعـايـل دليلـهـا
على درب شايـبـنـا مع الليـن والـقـسـى=لأن المسايـل دربهـا مـع مسيلـهـا
واشوفك سمعت هروج من خاب شاربه=من اللي نشر ربـي لخلقـه غسيلهـا
ولا تعتقـد صـمـتـي دليل(ن)لصدقهـم=وبالكـون تسمـع للاصايـل صهيلهـا
وترى الناس مثل القاع بالطيب والردى=ولا احد(ن)قدر يحصي عدالـه وميلهـا
وحذراك سـرك لاتـبـيحـه علـى المـلا=ترى الناس تمشي في جنـازة قتيلهـا
واذا ذقـت ميـلات الليالـي وجورهـا=كثير العرب حـذراك لا تشتكـي لهـا
سوى صاحب(ن)جربت طيبه ونخوتـه=من اللي ثقيلات العـرب يرتكـي لهـا
مثل طبع ابن عيسى التـمـيـمـي اذا زمـى=كما الطير يرمـي بالحبـاري جليلهـا
فيا حي رجل(ن)قـومـتـه تـبـهـج الـحشـى=ويـا حـي والله لابة(ن)ينتمـي لهـا
فلا احد(ن)قبل كفه غلبني على الصخى=مع اني خذيت من الخصايـل اصيلهـا
ولكن شعـاع الـفـجـر لابـان شارقـه=يبدد مـن الظلمـاء حناديـس ليلهـا
مشى سيل طيبه ليـن غطـى ثـمـايـلـي=وشال الحمول اللـي عجزنـا نشيلهـا
واذا ماحصل مثله فيـا طيـب وحدتـك=دع الناس تمضي في معابـر سبيلهـا
ولنا في عيوب النفس شاغل عن المـلا=واجنـب جزيـل النـاس والا هزيلهـا

[سعود المسعودي]

	هلا ومرحبا با الأستاذ الكبير الشاعر والراوي فواز الغسلان يشرفني ويسعدني أن أكون أول من صافح هذه الجواهر الغاليه صح الله لسانك مليون

[رابح الغضيان]

شاعرناالاعلامي المعروف / فوازالغسلان

صـــــــــــح السانك ورفع الله قدرك وشانك

قصيده جزله ومن العيار الثقيل الذي لايأتي به إلافواز كما عودنا

استاذي الكريم تقبل مروري امام هذه الشامخه من شوامخ الغسلان المعروفه

تحيااااتي واحترامي لك

[نافع عيد الجديد]

جزاله غير مستغربه من شاعر كبير

صح السانك

تقبل احترامي وتقديري

[الصقار]

الاخ العزيز ..
فواز الغسلان

سلمت يديك وصح لسانك ..

تقبل فائق تقديري

[ماجد الغانم]

الشاعر القدير

فواز الغسلان

صح لساااانك ...ولاهنت

قصيدة احتوت الجماااال والجزالة .....

وعانقة الأبداااع بكل مقوماااته

كم نحن فخورون بهذا النزف الجميل والبوح الصادق الذي احفتنا به

استاذنا القدير ...

ونطمع منك بالمزيد من هذا الأبدااع فلا تحرمنا من احاسيسك الراقيه

دمت بكل خير ..وداام هذا التميز

تقبل جل تقديري واحترااامي

[هندي المقبل]

فعلا هي شامخه من شوامخ الغسلان ..

الشاعر والرواي فواز الغسلان لن امجد في هذه القصيده ولا في شعرك لانك لست بحاجه لمثل ذلك

فقط اشكرك على امتاعنا بما كتبت واسجل اعجابي

شكرا لك