من بعد ماكبل لحد السيف والوقت محسوم

[حمد الخمعلي]

السلام عليكم ورحمة الله وبركااته
بعد انقطاع طويل اهديكم هذه القصيده عسى ان تشفع لي عن الغياب
قصيده بالشيخ/متعب بن عبدالكريم بن عناد الشهاب الفقيري الذي اعفا عن قاتل ابنه
عبدالعزيز ابراهيم الخمعلي في ساحة القصاص0
تقدمة قبيلة الخماعله بحفل تكريم للشيخ متعب اللذي اعفا عن قاتل ابنه وقلت هذه القصيده بالمناسبه اللتي نقلتها قناة صدى الفضائيه0
,
,
,
,
,
,
,
,

أن كان شعري مايجمل لابتي عند اللزوم=ماعاد اقول الشعر له داعي ولا فيه ثمره
لاصار في لازم ربوعي لادعيته مايشوم=ماني مغنيبه وقافي للمواقف ماصخره
شعري يجي بالماقف الغصاب وشعار القروم=نارٍ على راس العلم ويقدر اللي قدره
الشعر ماهو سلعةٍ بالسوق معروضه لسوم=الشعر من النحت للرسام من فوق صخره
والشاعر السانه حصانه عند حزاة القدوم=سيفٍ وله حدين يقطع عند وجهه وظهره
ونا وقفت وماقفي ليه مشرف يوم اقوم=لي الفخر يوم اتقدم في محل المفخره
عن لابتي وقفت ارحب بالحضور من العموم=ترحيبةٍ بلسان شاعر باللزوم ميسره
اهلاً هلا ترحيبةٍ فيها هل الطوله تشوم=ترحيبة الضامي لياهلة مزونٍ ممطره
مستبشرٍ بالخير يوم الجو ظمته الغيوم=براقها يضرب بجنب الضلع ويهز حجره
ورعادها تهتز منه الارض يومٍ بعد يوم=وسيولها تحيي نبات الارض وعروق شجره
وكرر الترحيب في متعب وريث اهل العزوم=سلايل شهاب اللذي له الفخر يوم اذكره
شيخٍ على الطولات يقدم لاوصل لمس الخشوم=الياكسر عظمٍ صعيب ادواه محدٍ يجبره
شيخٍ ولد شيخٍ ولد شيخٍ وللعاليا سشوم=ميقاف ابوه يجمله يوم الحروب مدمره
ونته وقفت وماقفك جملك باليوم العتوم=يومٍ تحير ابه العيون اللي من اول مبصره
موقف صعيب وياعسى مايمر للمسلم بيوم=عفيت به عن مسلمٍ والعفو عند المقدره
من بعد ماكبل لحد السيف والوقت محسوم=وقف له السياف في سيفه وحدود نحره
رفعت يدك وقلت انا معفي عنه عفوٍ يدوم=لله يوم المال راع المال مرخص ونثره
تبغى من الله العفو ربٍ على الدنيا يدوم=ماهو من اعباده تبي لله ذنبٍ يغفره
انكانها بالطيب والنوماس ملك اهل السلوم=فنته ملكة الطيب في يمناك لله اشكره
مجمل وافي لياعدة هل العليا تزوم=تستاهل النوماس والنوماس منك تعطره
الاجر عند الله رب الملك غفارٍ رحوم=عفيت ويثيبك اجر والعفو عند المقدره

[حمد الضوّي]

حمد الخمعلي


ونعم السمي


صح لسانك مليون ولايكفون والف نعم بالمادح والممدوح
قصيده شامخه من شاعر شامخ لافض فوك ياسميي العزيز
والمتنازل كتب الله له الأجر وعظيم الثواب ورحم الله فقيده
ولاهو غريب الطيب من هله

وارجع وقول صح لسانك مليار





تحايا

[بنت الكحيلا]

والنعم بالمادح والممدوح

وصح لسانك اخوي حمد الخمعلي

الله يعطيك العافية على القصيدة الرائعه

ابدعت لا يستغرب الإبداع منك

لك كل الشكر

[هندي المقبل]

العفو سجية الكرام وليست غريبه على الشيخ متعب بن عبدالكريم الفقيري

جزاه الله خيرا

وانت ماقصرت بهذه القصيده ياحمد .. صح لسانك وشكرا لك

تقبل اعجابي وتقديري

[بندر السديري]

حمد الخمعلي
الله يجزاه خير ويجعلها بميزان حسناته
صح الساانك ياالشااعر
وعزالله انك كفيت ووفيت ياحمد
وانت شاعر جزل ولاهو غريب عليك هاالشي
تحيااتي

[سراب نجد]

صح السانك والله لا يهينك

والله يجزاك بالخيرعلى هذه القصيده الجزله

وفي مدح رجل جزل الله يبيض وجهه ويجمل حاله

ويعوضه عن ما فقد بالأجر والثواب

ولا يستغرب الطيب من الطيبين ومتعب من اهل الطيب ساس ٍ على ساس طيبهم وراثه أب عن جد

لك مني جزيل الشكر والتقدير

[بدرفهد الجعفري]

شاعرنا الجميل حمد الخمعلي

ان شاء الله ماتغيب الا عن الشر واخر الغياب ان شاء الله لان كل زوايه في هذا المنتدى تشتاق لك

صح لسانك على هذه الرائعه والي الامام دائما