اطياب نجد

[حاسب الرويلي]

يا وجودي كل ما هب الهبوب=حامل ٍ من نجد ريح اطيابها
ويا وجودي كل ماحان الغروب=ودمعت عيني لفقد احبابها
والله الفرقا من كبار الذنوب =هشمت كبدي بطعن حرابها
حرموني منك يا الترف اللعوب=والمواجع شرّعت لي بابها
حالف ٍ ما انساك او عنّك اتوب=لين ماروحي يجي طلاّبها
كيف اتوبك وانت في دمي تذوب=ذوبة التربه بنو ٍ صابها
ما الد العين في شام وجنوب=وانت فيها تحضنك اهدابها
صوّرك من هو يقلّب فالقلوب=فتنة ٍ فالارض يمي جابها
انت نهر من البها ما به نضوب=سال فعروقي وعم شعابها
جيتني من كل حدب وكل صوب=صورتك فيني تطير اسرابها
تدري وش عيبك وحاشاك العيوب=لا طلعت الشمس ترخي حجابها
وتدري اني ماني بحبك كذوب=والنوايا ربنا ادرى بها
فدوتك كل العذارى فالشعوب=ونفس ٍ لوصلك تعن ركابها
في محلك ما احد ٍ غيرك ينوب=حتى لو غيبتك طال غيابها
شاعرك ما مسّه فقافه لغوب=جاته الفكره بزاهي ثيابها
وشاعر ٍ ماهو بحاسب ومحسوب=يترك الطرقه ولا يشقى بها
وانا الي اشقتني طويلات الدروب=لين ما عديت روس هضابها
واتوجد كل ماهب الهبوب=لا حمل من نجد ريح اطيابها
وانثر دموعي ليا حان الغروب=من وسط عين ٍ تمنى احبابها