عيديتي كانت ذات طابع إشتراكي

[ابو ريناااااد]

عيديتي كانت ذات طابع إشتراكي

راح العيد اللى ما اقدر انساه عندما كنت فى الابتدائيه يمكن او الاول المتوسط
كان المصروف المدرسى ثلاث ريال وهو مبلغ له احترام وتقدير اما مصروف المساء كتكات وعصير سانكست

اتذكر طقوس قبل العيد ثوب جديد وملابس داخليه ونعال اعزكم الله حاطهم جنب المخده ونايم بدرى وكل شوى قاعد اشيك على الاغراض اذا فى شي ناقص منهم او فى احد من اخوانى سرقهم الى ان تصل الساعه الرابعه فجرا اخذ شور العيد شور العيد له طعم ثانى تشعر وكأنك اول مره تتسبح وتلبس ملابس العيد جديد فى جديد وتحس انك ولد نعمه ابيض فى ابيض جنك دعاية تايد مع مبيض

نروح المسجد مع الوالد ونردد مثل مايقولون الكبار

الله اكبر الله واكبر الله واكبر ولله الحمد الحمدالله كثيرا وسبحان الله بكرتا واصيلا
الله واكبر الله واكبر

كان لها اثر فى نفسي وشيء جميل واحساس رائع وعيال الشارع كلهم ابيض فى ابيض الى درجة انا مانعرف بعض ماشالله من كثر البياض الساطع والالوان الخلابه اكيد الشامبو عامل عمايل فى تسريحات الشعر اللى بس هى حركه وحده التمشيط على جنب مافى غير التسريحه بس كان الاختيار اما على الجنب الايمن او الايسر

نصلي ونسمع الخطبه وبعدين ندور نعولنا الله يعزكم اللى حظه معفن انسرقت انعاله واللى حظه زين يلقاهم يحمد ربه ستين مره واحيانا تشوف عليه دموع الفرح لانها ماركات عالميه مثل تميمه وتيربو ونجديه تطرييز بعد الخروج من المسجد ندور الشياب وننتظرهم اما فى الساحه الترابيه او نفتر على البيوت بوسه وعيدك امبارك عمي ونعطيهم نظرت البراءه بس ماكو فايده

اتذكر جارنا الله يرحمه عطانى عيديه خمسة ريالات ونص
الله يرحمك يابوصالح لو معطينى الخمس ريال ابرك النص وشهوله اما ابوى لايعرف الا لغة الثلاث ريالات عيد الاضحى او رمضان الله يخليه لنا يارب

اجتمعنا نحن اطفال الشارع كله ريالات وانصاف ريالات نسأل بعض كم جمعت هذا ثلاثين وهذا عشرين بس كله انصاف بإستثناء الخرده حقت ابو صالح الله يرحمه نبى العشرة والا الخمسين اى شي نبى نشوف شكلها بس

نسمع خبر ان ابو فلان المشهور بالضابط انه يعطى عشرة والا هالخمسين اللي يذكرون ولا شفناها ليش لانه رجل معروف وضابط فى الدوله له مكانته ويحترم رجال المستقبل رحنا ركظ على بيتهم وطحنا عليه بوس خشمه وراسه واذنه

يقولنا الضابط راح اعطيك عشر ريالات بس على شرط عطنى الصرف اللي معك واخذ نص العشرة يعنى قص علينا وعطانا خمس ريالات بس احنا مافهمنا الحركه كنا كتاكيت والبراءه تشع من ملابسنا البيضاء الله يسامحه على الحركه طلع ضابط ايقاع

نرجع البيت الساعه تسعه تعبانين بس لازال الامل قائم فى تجميع اكثر عدد من الريالات او رؤية غيرها نطلع مع ابوى وامى والعايله كلها نروح بيت عمى اسلم واقعد بجانب ابى يعنى مؤدب وحياوى وعيونى فى الارض انطر احد يعطينى عيديه اذا عطونى اقول لا مابى واطالع ابوى الين يقولى اخذ العيديه اليوم عيد

بس عندما ناداني عمى وعطانى عيديه خمسين ريال خضراء كانت الصدمه وبغى يغمى علي وما نطرت الاذن من ابوى على طول حطيتها في مخباتى وكان ودى اقول حق ابوى بسرعه نرجع البيت اخاف عمى يرجع فى كلامه

بعد ماوصلت البيت اخوى اللى اصغر منى قال حق اخوى الكبير وخواتى وإشتغلت الفتنه تجمعوا على يبون ياخذون الخمسين ريال منى وبعض خواتى كانو يبون يشوفون شكلها بس فضول وانا ماسك الخمسين ونايم على بطنى وابكي واخوى يقول عطنيها لا اكسر وجهك

وصل الوالد وعطانا حركه بهلونيه بالعقال كلنا واخذ الخمسين منى وبدأ بالمحاكمه بأن توزع الخمسين على الكل على ما اعتقد الوالد كان فى توزيع المصروف والطق والعقال يتبع المدرسه الاشتراكيه

.وهذي اول وآخر عيديه بخمسين ريال ورجعنا الى عالم الثلاث ريال والعصير السانكست والكت كات
.
.(:
-------------------------------------------------------------------------------------------
اتمنى ما تنسون الاطفال من العيديه ولاتنسون الخدامه والسايق خلوا الكل يستانس حتى الخدم وياليت بنات هالوقت ياساعدونهم وخصوصا بالعيد الشغل كثير والكلمه الطيبه بركه والابتسامه حسنه وهذى ابتسامه لكم
(:

.
.
.
عيدكم مبارك وكل عام وانتم جميعا بألف خير وصحه

آمييييييييين.