يالوايلي فزعتك ماهي غريبه

[ماجد الغانم]

بسم الله الرحمن الرحيم

أهني نفسي وجميع قبيلة عنزه بهذا الموقف المشرف الذي تحقق
بتكاتف أبناء هذه القبيله الغير مستغرب منهم أبداً فهذا ما أعتادت عليه
هذه القبيله على مر العصور
وتمثل هذا التكاتف بهبتهم هبة رجل واحد لعتق رقبة أبنهم عبد المجيد
السبيعي العنزي

ابيات متواضعه كتبتها بهذه المناسبه

أتمنى أن تنال القبول منكم

يالوايلي فزعتك ماهي غريبه = في كل جيل وجيل لك فزعةٍدوم
والفزعة اللي دايماً تعتزيبه = يشهدلها التاريخ أول وهاليوم
بك فزعةٍ بك حكمةٍ فيك طيبه = جعلتها في خصلتك نهج وسلوم
بينت فعلك بالأمور الصعيبه = والصعب في وجهك ترى دوم مهزوم
اتقدم الفزعه بليا ضريبه = واللي نخاك اليوم ماهو بمضيوم
منهونخاك اليوم يلقى مجيبه = اتمد يدك ويصبح الأمر محسوم
في داخلك للطيب ارضٍ خصيبه = ماتبخل بجهدك ولا ترخي اعزوم
تروى ضمامن جاك بأية طليبه = مثل البحار الواسعه تروى غيوم
يانسل وايل والجدود العريبه = يامنبع العزه وبالعز ملزوم
أنت عنزي مافيه شيٍ يعيبه = أنت عنزي معروف اسمك مع القوم
اسمك رفيع ودايماً فيه هيبه = ومحشوم عن فعل الردى دوم محشوم
هذي الحقيقه دون شكٍ وريبه = يقولها ماجد ولا يلحقه لوم
حنابني وايل صدورٍٍ رحيبه = ولاثارة الهيجاء لنا فعل وعلوم
مثل الرياح العاتيه والمصيبه = نقلب كيان الكون ويصير مهدوم
واليا ببغينا المجد دايم نصيبه = ويصبح ترى من حقنا شيء مقسوم
نرقى الطوال ونعتبرها قريبه = مثل البحار الهايجه دايم انزوم
هذي بني وايل بوصفه عجيبه=دايم في بحر الطيب تسبح او اتعوم
وماهو قصورٍ بالقبايل وطيبه= كل القبايل تستحق حبة خشوم
تمت وصلوا عد مطر السحيبه = على النبي اللي عن الزل معصوم