ـــــــــ مشرط و شاش ــــــــــ

[عبدالله عايد]

اسعد الله جميع اوقاتكم بكل خير

الا يا لله يا الوالي رفيع المنزله .. والشان = الا يا واحد ٍ ما يختلف قدره .. وتقديره
والا يا المعطي الآخذ .. ولا يارازق الإنسان = والا يا من شرعنا له بتوكيله .. وتكبيره
والا يالله لا انصكت بوجه عبادك البيبان = فزعنا نطلبك ربي جزاء الذنب .. تكفيره
وانا عبدك مقصر .. لو بذلت الجهد والايمان = بظل اصغر من اللي قد بنو .. في طاعتك سيره
اللهي رغم تقصيري فنا في رحمتك طمعان = وبمرك يا اللهي تكسر الكايد .. بتيسيره
اللهي جهزو مشرط .. وشاش .. ونادو اسم فلان = صغير ٍ ما عرف يشرح سقم حاله بتفسيره
بسبع سنين من عمره فلا زود ٍ .. ولا نقصان = ما يعرف وش تعب جسمه .. ولكن شد تفكيره
(يايمه ليه تبكيني ؟!! وانا والله مني تعبان = مغير شوي في راسي .. ولا اشكي من تعب غيره
يايمه يالله بنطلع وابي نلعب مع الجيران = وبشري لا طلعت اليوم لي كوره .. وصفيره )
وخذوه اللي عسى تجزى فعايلهم اجر .. واحسان = وخدر بعد ياربي مامرت بوقت تخديره
وابوه .. وامه .. وجده ..وعيني دمعها طوفان = تجمعنا ولا نملك سوا ياربي الخيره
يافيصل شف وانا عمك .. ترا ربك له الرحمان = اسم لايمكن يطابق ابد .. مع واحد ٍ غيره
واذا تنصاه يافيصل ما ترجع خايب .. وخسران = وتحسب طيحتك هذي .. عن الزلات تطهيره
انا ادري توك صغيـّر .. ولا تحسب ذنوب الآن = ولكن حكمه لربك .. رضينا بكل تدبيره
هو الوالي .. هو العالي .. هو الرازق .. هو المنان = هو اللي جادت العالم عطايا .. من ورى خيره
هو اللي كون الدنيا .. هو اللي نزل القرآن = هو اللي يحصي العالم .. هو اللي جاد تصويره
ترى ما نغتني دونه .. لو ربوعك ظفر شجعان = ولو تاقف بمحنتنا شباب البر .. والديره
يافيصل ارفع كفوفك وانا عمك .. لراعـ/ الشان = يعيد لوقتنا فرحه .. وورداته .. وتشجيره
تزول همومنا عنا وكوابيس ٍ غدت احزان = ويصفي جونا الثاير بعاصوفه .. وتغبيره
اللهي به توكلنا .. اللهي يمه المزبان = اللهي وضعنا المزري يساعدنا بتغييره
اللهي محنة ٍ جتنا .. ولا كانت على الحسبان = ملتنا ضعف من قوة .. وحطت فوقنا حيره
والا يالله لا انصكت بوجه عبادك .. البيبان = فزعنا نطلبك ربي .. عسى في امرنا خيره