****** الخفوق الظامي*********

[حمد الوايلي]

جيت اروي القلب الحزين الظامي=اللي من اشواقه مشت اقدامي
اربط خيالي بواقعي والخطوه=وارسم طريقي واضح(ن) قدامي
لعل صدري ينشرح واتريح =واقطف من افكاري جديد الهامي
وكل ماقطفت اجمعه في باقه=واهديه لاجمل ماارسمت احلامي
اللي تواصيفه بعيني عالم=ماينحصي مهما تخط اقلامي
يكفيه حبي لاانبنا له شامخ=تاريخ يكتب له مدى الايامي
ان قلت احبه مااكتفيت بقولي=فارس معاني وميزتي بإقدامي
حبه تحدى من طمع في حبي=وماهمني من عاذلي لو لامي
اسرج خيول العاطفه واتمنع=وطير الوله حلق معاي وحامي
شوقي زهابي وامتطي قيفاني= واسوقها لاهل المقام السامي
ياراحتي ياجوهرة دنيايه= يابهجتي ياضحكتي ياهيامي
مالي غنا عنك مادامك روحي=يحرمني منك من يريد اعدامي
اجيك وارجي شوفتك ياروحي=حتى اعيش وماانقبر باوهامي
من داخلي ودي اجي واضمك=واقول لك ياروح روحي نامي
ودي تكوني داخلي في جسمي=الروح روحك والعظام اعظامي
شاعرك شاعر مرهف (ن) باحساسه=يروي عطش ذاك الخفوق الظامي