ديوان الشاعر ::: مشعل الضوي :::

[مشعل الضوي]

نــــوره

الليـل أرخـى سـدوله و ابـتـدا دوره=والشمـس غابـت ونـوره جات ما غـابـت
جـيتـي على الموعـد اللـي طـول حضوره=وجيـتك وانـا هقـوتي في جيتـك صابـت
جـيتـي مع الليـل مـختالـه ومغـروره=ونسايـم الليـل مع صمـت المـسا جابـت
جابـت دفا همـسك اللـي فاحـت عطـوره=و اللهفـة اللي بـوصول إطلالتـك ذابـت
أهليـن يا بهجـة الخفـاق وسـروره=أهليـن يـا اعظـم غـلا في داخلـي ثابـت
مشتاق لك شوق ما اقدر أوصف شعـوره= ومشاعـري من حنيـن غيابـك إنسابـت
عـجـزت لا أستـسيـغ فـراقـك وجـوره= و نفسـي عـن اسـم الرحيـل وغيبتي تابـت
روحي...اقطفـي مـن قصيدي أجمل زهـوره=من شاعـر مـا يقـول القـافـيـة شـابـت
أنتـي قصيـدة غـزل بالحـب مغمـوره=آسـف..أنا أخطيـت... نفسـي بهـذي ارتابـت
أنتي لو انك قصيدة شعـر يا نـوره=إن كان شاورت بـك عبـدالله الثـابـت
لكنـك أغلـى من الشعـر ومن سطـوره=وأهـم من روحـي اللـي فيـك ما هابـت
وأقرب من الشاعـر الضــوي لجمهـوره=وأصـدق من الهقـوة اللـي فيـه مـاخابـت
مدري وش اقول .....لكن أنتي اسطـوره=مشاعـري فـي إجـادة وصفـها عابـت
تدرين؟من جيتـي الى الحيـن يا نـوره=الشمـس و الله مـا احسـب انهـا غـابت!!!!

================================================== ====================

قصيده قلتها بمناسبة زيارة ملك الانسانيه خادم الحرمين الشرفين الملك / عبدالله بن عبدالعزيز آل سعود لمنطقة تبوك .

طولت ياموعد ٍ لنا زمن نحتريك = ومن بعد ماجيت قاف الشعر جاك محبوك
وياهاجس ابتعد عن كل قاف ٍ ركيك = موقفك ماهو سهل من بعد ماقدموك
الفرحه الغامره بقلوبنا تحتويك = زيدي فرح يا "تبوك" ويامناطق " تبوك "
يامرحبا ياابو متعب جيت وأهلين فيك = ترحيب يشبه ولانا معك مابه شكوك
شفقين نسمع كلماتك ونصغي إليك = كلامك وسام فخر لكل من سمعوك
آمر وحنا جميعا ً رهن اشارة يديك = وعن كل كلمه تجينا منك لا فض فوك !
يامطور ٍ نهضة أغلى دار في ساعديك = والله يطّول عمر من بالعمل ساعدوك
ياشايل هموم هالأمه على منكبيك = يارادع ٍ من زرع في" خطة الامن"..شوك
يامأدب العالم اللي بالخفا تقتفيك = اللي حسدونا بعدلك وبولانا حسدوك
يامنقذ "الشرق الاوسط" من هلاك ٍ وشيك = لك خطة ٍ كل خلق الله عليها اشكروك
ياماسح ٍ دمعة الايتام في راحتيك = ياملبي ٍ حاجة اللي من عناهم نصوك
متواضع ان جاك "عود" تعامله مثل أخيك = وان جاك واحد بعمري قلت له وأنا ابوك
مليك إلا قليله فيك كلمة " مليك" = لان منت بمليك إلا " مليك الملوك "
من حكمتك ماهو بس الشعب هذا يليك = بالعكس كل الشعوب العالميه ..تلوك
الله على قمة ملوك العرب مصطفيك = اللي ليا ضاقت سنين الزمان زبنوك
والله لو هو بكيفي غير اسلم عليك = واكسب وقارك مثل من جوا لك وصافحوك
وأحني على متنك الشامخ واقبل يديك = وانقل تحيات من غابوا ولا قابلوك
عساك راضي علينا الله يرضى عليك = هذي مشاعر " تبوك " وكل "اهالي تبوك"!!

================================================== ===========

هذه قصيدة ردا ً على الشاعر سلمان الردسا وهي على الرابط التالي


http://www.weelan.com/vb/showthread.php?t=4327

البارحة ليلة من احلى الليالي = جتني مناديب القلوب النقيه
جتني رسالة من كريم السبالي = من راعي الوقفات راع / الحميه
ورحب بها فكري وقلبي وبالي = ترحيبة بالعود والشاذليه
ونظمت من فكري بيوت ٍ جزالي = وغنيتها بلحونها السامريه
نظمت قافي لجل قرم العيالي = اللي يحوز الطيب والشاعريه
شاعر ولا ينطق بيوت ٍ هزالي = ما يبتكر غير البيوت القويه
لا جا لشعّار القصايد مجالي = عدوه من ضمن اهل الافضليه
عرفه رصيد وخوته راس مالي = خوة وريث المرجله فخر ليه
سلمان نسل المجد ذرب الافعالي = من نسل قوم ٍ ما تحوش الرديه
عيال وايل محتمين التوالي = اهل الفعول النادرات النديه
مكانهم من ماض / الازمان عالي = كرمهم الله فوق كل البريه
ياهاجسي من بعد نظم الجزالي = وصل بيوتي يم نجد العذيه