شــلـــفــا جــديــع وســيــف عــقــــاب

[الخاطر]

المشاركة الأصلية كتبت بواسطة خلف الغريب

قبل الشعر .. كل عام وانتم بخير وتقبلوها بصدوركم الرحبة

ليت في درب الهوى قلبي عصاني=تجربة مرت عسى بالامر خيـره
وش بلاني بالمحبـة وش بلانـي =ليش نام الناس وعيوني سهيـره
ليش نار الحب شبـت بالمحانـي=من شرارة ولعت قلبـي سعيـره
حط مشهابه على القلب وكوانـي=وانثنى عني وانا يديني قصيـره
مارحمني . ماتركني . ماعطانـي=استميحه . واستجيره . واستثيره
صب حبه داخل عـروقً تعانـي=من هموم الوقت شداتً عسيـره
هزنـي هـز الـزلازل للمبانـي=ولفني لف البحـور المستديـره

مالـك قلبـي وحاكـم فـي جنانـي=حكم ( أبو تركي ) على شبه الجزيره
وكن عينك لا ارسلت سهم ورمانـي=مثل شلفا ( جديع ) في وسط الكسيره
وكن صـدك يـوم سليتـه وجانـي=مثل سيف ( عقاب ) ينزع من جفيره
وكن رمشك يـوم سلهـم وابتلانـي=رفة ( ابن مهيد ) عن حر الظهيـره
وكن هجـرك للحبايـب لـو تعانـي=ردة ( الشعلان ) لصفـوف المغيـره
مصدر همومـي ومنظومـة جنانـي=مثل ( برجس ) منقع الموت وغديره
والوفا مطلوب فـي نطـق اللسانـي=مثل ( ساجر ) راع الافعال الشهيـرة
والدخيـل النـاس تعطيـه الامانـي=واذكر ( ابن سمير ) زبن المستجيّره

ومنك أنا داخل عليك ..الموت جاني=مايصير انخاك وانت بدون غيره
فكني هالحيـن ماجانـي كفانـي=الهوى اولها .. وتاليها جريـره
شلت من حمل المحبة حمل ثانـي=وعادتي حمل المثاقيـل الكبيـره
ما تلفت ارتجـي منـه الحنانـي=شلت حملي واحتملته دون حيـره
في بحر حبك غدت كل الموانـي=بين موجه ضعت وازعجني هديره
ياعقود اللول .. ياحب الجمانـي=ياعذاب القلب .. ياراحة ضميره
ياسعادة خافقي لو كنـت جانـي=ياسفيره .. ياوزيره .. ياأميـره
ياقريب أبعيد .. ياقاصي ودانـي=حرت فيك من اليسيره للعسيـره
رد لي قلبي وانا ماعـود ثانـي=أوعدك وعد انهـا مـره أخيـره
ليت قلبي قبل ماحبـك عصانـي=صح كانت تجربه .. لكن مريـره

اخي وصديقي وعزيزي.
الشاعر خلف الغريب.
كل عام وانت بالف مليون خير.
لي شرف الحضور هنا والوقوف ثم الوقوف ثم الوقوف عند هذه الرائعه.
ليس غريبا عندما يحضر الابداع في هذه الرائعه لاننا دائما تعودنا على الابداع من المبدع ابو خالد.
وليس غريبا هذا الجمال لاننا تعودنا ايضا هذا الجمال عندما يحضر ابو خالد.
وليس غريبا هذه الجزاله لانها من خلف الغريب والذي اعتقد بل اجزم ان للجزاله من ابو خالد نصيب وهي من تبحث عنه وتحتاجه.
وليس غريبا هذا الشعر لانه هو الشعر بذاته.

ابو خالد صح لسانك ملايين وكل عام وانت بالف خير تقبل مروري.
اخوك محمد العنزي