نافع عيد .. ادخل السوق

[خلف الغريب]

خلف الغريب

سلامي على نافع وابا اقول نفاع=معك ناوي احقق ببعض المواضيع
لقيناك يا ابو عيد تشري وتبتاع=ولكن تبيع برخص لام المقانيع

نافع الجديد

هلا مرحبا من قال نفاع مرتاع=تفضل يابو خالد وهات المطاليع
ترى عادتي بالسوق مااحب الاطماع=وبيعي يعم الكل مابه مطاميع

خلف الغريب

اذا انك تتيه الدرب باقول لك راع=وهذي نتيجة تاجر يخلف البيع
شهود الشريعة تازن المد والصاع=وانا لو حكوا لي قبل ما اشوف ما اطيع

نافع الجديد

دروب كثيره وامشي بدرب الاسناع =ولوغيرنا يرمع ببعض المراميع
شهود الشريعه بعضهم يضرب القاع= خذينا عليهم بالمزايد مشاريع

خلف الغريب

انا اقول هذا شرع لا تظنه شراع=ولكن عسى الله يغفر الذنب لجديع
ترا ما حدانا عنه طقك بالاصباع=وحنا نطوع عاصي الدرب تطويع

نافع الجديد

ترى الشرع ماحطوه للحق مضياع=ولاهي على كيفك تبي حقي يضيع
يخوفي تصير نهايتك سبة افزاع=وبعض العرب ماتوا من اسباب تشجيع

خلف الغريب

اذا لك حقوق ابشر ترا الحق ما ضاع=ولكن عليك حقوق شفهن مفاريع
ولا مات بالفزعة سوى طايل الباع=وبعض العرب ماتوا بصوت الطراطيع

نافع الجديد

انا وين ادور حق من شخص طماع=تبلى عليه لجل بعض المنافيع
لاياصارت الفزعه لجل ظلم واسماع= تبين تنتهي والخصم ماصابه الريع

خلف الغريب

اشوفك تدير الوجه عن بعض الاوضاع=ورجلك تلفلف عن دروب التسانيع
انا اقول هذا الذنب ثابت بالاجماع=ولكن تتوب احسن من الذنب وتريع

نافع الجديد

طبوع البشر ماتتفق عدة انواع=وانا اعامل العالم بحسب التطابيع
ابا اعطيك راي تخاوي الذود مرباع=وتترك لكاعه ركبوها الملا كيع