تساؤلات للقمر .... ليه ؟؟؟؟

[عبدالعزيز العدواني]

في فجرية يوم قريب رأيت القمر وبداخله سواد وهذا السواد أوجد لدي تساؤلات كثيره خرجت

كما هي لتعانق صفاء هذا القمر الذي إستغربت وجود هذا السواد الذي لم يعكس الضوء كعادة

القمر


وإليكم نبضي كما هو :

اليوم اشوفك ياقمر فـي داخلـك كتلـة سـواد = إلا كتل متراكمـه وشفيـك قـل لـي يـا قمـر
اقول لك ما فيه داعـي للجـواب ومـا استفـاد = إلا تراتيل السـؤال اللـي مـع الخافـق تمـر
ايقنت بالواقع وهـذا حـال مـن حـال العبـاد = ظلمه وبيـن نورهـا تعكـس مفاهيـم العمـر
( اهااااااا ) توي أكتشف سود النوايـا والمـراد = اني أجاوب لحظة التفكيـر فـي وقـت السمـر
ليه الحباري تنتشر يـا صـار وقـت(ن) للهداد = ليـه العساكـر ماتـروح ولا تجـي إلا بامـر
ليه المزارع ما اكتفى بالحرق عن نثـر السمـاد = ليه البخور اللي يفـوح بداخلـه عطـر وجمـر
ليه الفرح يلبس بياض وليه الاسـود بالحـداد = ليه الكرز ليه الكرز ليـه الكـرز لونـه حمـر
ليه الأسامي تختلـف يـا قلـت ود او يـا وداد = ليه البشر تقرا و تنكـر سيـرة الوالـي عمـر
ليه اليهود استوحشو من طاري(ن) فيه الجهـاد = ليه الشجر طلعه من اشواك وورق وايضا ثمـر
ليه نتعجب من سموم الريح فـي وقـت البـراد = ليه نتقاعس عن عنا التفسيـر بايـات الزمـر
ليه العيون اليا بكت صاحـت معاليـق الفـؤاد = ليه السيـوف الطايلـه دون الكراسـي تنشمـر
ليه الحطب يصلى بنار وينتهـي عمـره رمـاد = ليه النخـل بالشكـل واحـد واختلافـه بالتمـر
ليه وبعد ليه وبعـد واجـد سـؤالات(ن) جـداد = من يوم شفتك ياقمر تحمل سـواد(ن) مستمـر
وانا بعد يوم(ن) شلع بي خافقي فـوق ارتـداد = من فوق صرخه من قهر من دون دمع(ن) منهمر
ابكتب اللي خالج الوجدان واسـرج لـي جـواد = يا شاف سور المعرفه يطمر طمر يطمـر طمـر
شفت النصايح في قوالب مـن تشفـي وانتقـاد = واللي نصح ماهـو خلـي إلا هزيـل ومندمـر
وشفت الجهل يمشي مع العالم مثل ممشى الجراد = كل(ن) يحسب انه فهيـم ويـا نشدتـه منغمـر
في مدح من حوله ويحسب كل ما قالـه وكـاد = ومن حج حج ومن بغى زوده مع الحـج اعتمـر
شفت العقول الخاليه تنقـص ولا فيهـا ازديـاد = تشرب فناجيل الهوى تسكـر ولا تسكـر خمـر
واليوم اشوفك ياقمر في داخلـك كتلـة سـواد = إلا كتـل متراكمـه والعلـم عنـدك يـا قمـر