(( والله ماصـديـت عنـكـم قطـاعـة ))

[عبدالله الدغيثر]

السلام عليكم ورحمة الله وبركاته
وبعد اعتذر عن انقطاعي عنكم في الفترة الماضية
واهدي لكم هذه الابيات البسيطة التي اتمنى ان تحوز على رضاكم...

يا اللي غلاكم في ضميـري وداعـة=وحفظ الوداعة سنّها ديـن الاسـلام
قدر وغـلا عنـدي يزيـد إرتفاعـه=في خافقي شيّد لـه بيـوت وخيـام
والله ماصديـت عنـكـم قطـاعـة=الوصل حالت دونـه ظـروف الايـام
علـى العهـد ولا طوينـا شراعـه=عهـد المـودة ماتزعزعـه الاوهـام
من لا يطيعه جايـر الوقـت طاعـه=وانا عصاني وقتـي وطعتـه الـزام
الوقـت كـم مشّـى علينـا خداعـه=واصبر واكن الحزن مع ضيقة العـام
ويزيدنـي ضيـم الليالـي شجاعـة=وازداد وصل(ن) للقرايـب والارحـام
وإلا القطاعـة مـا وراهـا طماعـة=والوصل تجديد العهـد بيـن الانـام
يحيي عروق الـود بيـن الجماعـة=ويغسل قلوب اهل التباغض والاخصام
يقودنـي لأهـل الوفـاء والسناعـة=سلك(ن) دقاق ادق من غزل الانعـام
ولوالـزمـن تناهشتـنـا سبـاعـه=وظعنا مع الامال واضغـاث الاحـلام
ولو صار مالي في حياتـي شفاعـة=واقفت بي الدنيا ذليـل(ن) ومنضـام
يبقى معـي منهـا كنـوز القناعـة=وتبقى معرفتكم لنـا تـاج و وسـام
يا اللي غلاكم في ضميـري وداعـة=الوصل حالت دونـه ظـروف الايـام

اخوكم /عبدالله الدغيثر