إلى متى وأنا اهين الوقت وأرجع واحشمه..!!

[عبدالعزيز السعود]

هذا ثمر قلبي تــدلى قبل .. يأتـــي موسمه=مدي يدينك واجمعي فرقاك من عذق العتب

أنا ثملت من الفراق اللي خذا وجهي سـمه=شوفـي ملامح غيبتـــك تقرا قبل لاتنــكتب

في وجهي الشاحب وفي آهات صدري وانسمه=في ناظر عيون ٍ .. هميل الوجد منها ينسكب

يا نور لحظات ٍ غدت من دون وجهك معتمه=وينك؟!!بدا هذا الحنين بـ جوف صدري يحتطب

ياحــب ٍ إجــــتاح الضلوع وفــج قلبي واقســمه=نصفين..وأزريت اجمع النصفين وغيابك سبب!

حــب ٍ بقى لو واقـــعه مـــره بحالـــيه.. اصدمــــه=عشق ٍحيا رغم العطش في روض روحي معتشب

ليــت الغــلا ذنب ٍ تجـــناه الخــفوق ويندمـــه=وليــت الصبر جرم ٍ اليا طــاولت همي يرتكب!

إلى متــى وأنا اهـــين الوقت وأرجع واحشـــمه=وأنا على رجم الوصال اشرف.. وأنادي.. وأرتقب

ياأم العيــــون الـفاتـــنات النـــاجلات المــغرمه=يا من رموش عيونها تشكي سبب عكش الهدب

يامبــــسم ٍ له ضـحـكة ٍ تنطـق بشي ٍ تبـــهمه=يانبــرة ٍ لامـن حكت كـــل المـــعاني تنــــقلب

ياللي خـذيتي خافقــي قبل اعـــرفك واقــدمه=ياللي غيــــابك لحـــن ٍ تغنــيبه أعواد القصب

عودي على قلب ٍ طـواه الهـم والشوق هزمه=قلب ٍ معك غنايمه ضاعت ولاادري وش كسب؟

أنا انتــهيت وشـوقي بصــدري بدت له همهمه=جمــر انتظاري سَـمّدت ناره وانا صـرت الحطب

حتـى ثمــر قلــبي تدلى.. قبـــل ياتــي موسمــه=هزي طـرف جذعه تساقـط لك من عذوقه عتب!