حذفة شعر

[عبدالعزيز العدواني]

ياهاجسي وان بغيت اضرب ولا تستشير = وان ضاعت الاوله فالثانيه مابدت
خابرك لا تشحذ المعنى ولا تستعير = أما تجي من صميم الذات والا بردت
الجاش شال الكثير وحط عنه الكثير = وما حركه غير يوم ان القلوب فسدت
تطير والا عسى جنحانها ماتطير = احرقت معلوقها الفخار يا ما صدت
من حسرة(ن) بالضلوع وحسرة(ن) بالضمير = لبستها الثوب الاسود غصب لين هجدت
ليه المجامل وحد العلم سيف(ن) شطير = منه القلوب الضريره من هلعها جمدت
الشعر لو ما يعنى ما يجيب العسير = والفارس اللي يهاب الخيل عنه شردت
وانا اتمثل وامثل كل معنى غزير = والناس ماهي غريبه يا مدحت ونقدت
الشيخ وان مازهد باللي عطاه الوزير = يزهد بعلمه وزيره دام نفسه ردت
يا كثرهم والكبير اليا تردى صغير = والهامه ان دنقت مره تراها سجدت
عذب القراح المصفى عند جال الغدير = يوم النفوس الخبيثه عن صفاه رقدت
مشكاي لله عسى العقبى لنا بالف خير = وعسى الرجال العزيزه تفتخر يا حصدت
بيبرس يذبح قطز ويبايعونه أمير = شر المصايب يحل اليا الرجال حسدت
والمهدي المنتضر شبه عليه الغرير = وده يجي غير يوم ان الرجال قصدت
بعض الرجال التجى في خام شبه الحرير = وبعض الرجال التجى به خلق فيه نشدت
المرجله والمعزه واحترام الفقير = قدوه يعل البشر تطريه لو ما اقتدت
شاعر حفيد البلد يرقص على كل زير = بغوه يمدح ولكن العيون رمدت
ضرب بهم عرض حايطهم وصوب كسير = وخابت وجيه(ن) عليه السالفه سندت
شاعر نور يحسب ان الشعر قرض الشعير = وقناته اللي تذود استكبرت وهصدت
يا هاجسي وان بغيت الشور لا تستثير = وقف وخل المعاني تنتحر يا بدت