بيوت وازوال وربيع ومضارب

[عبدالعزيز العدواني]

ابدا وانا ماني لشكـواي طـارب = والصمت حكمه مير للهرج نقـوه
الكبد عيت عن لذيـذ المشـارب = والعين شافت باسود الشال فجوه
والنفس قالو في غثاهـا مـآرب = يوم ان منوتها على الناس منـوه
عمر الحفى ما عالجته الجـوارب = وان زادت الخطوه تعثر بخطـوه
لجت عجم من بين ترك ومغـارب = في داخلي والضول شيبن ونسوه
ان قلت شدو حبلكم جت مكـارب = شدو الين الحبـل قطـع بعنـوه
وانا بشر لي شوفتن ما تـزارب = ارضي وازعل كل من جاب دلـوه
افكار تشرق بالزمـان وتغـارب = والصيف متعب يتعب الناس صلوه
يصلى بحره فندقن وسـط تـارب = خمسة نجوم ويبهر الناس علـوه
نسل العرب مستعرب وفيه عارب = والعلم صارم مير للعلـم حشـوه
سلسل سلى سلسالها فوق غارب = من سل مسلوله شجاعه ونخـوه
ما فاد مع ذيك التجارب تجـارب = ولا عاش من يظهر ثناياه سطوه
قارب غرق من دون سبعين قارب = من شان خيالن غدت فيـه فلـوه
موجود عشره بس عشرين هارب = والعشره الباقيـن صفـو لحلـوه
فيها حلى لكن بها فيوز ضـارب = وان شالت الغطوه تغشت بغطـوه
حلت محلـن للحـى والشـوارب = وراع التمر بدل خلاصه بعجـوه
بيوت وازوال وربيع ومضـارب = وعلوم تبقى للعشاشيـق سلـوه
الداب يجرع من سموم العقـارب = والذيب نومه يا اظلم الليل غفـوه
ماهي براحه واستراحة محـارب = إلا على ما قيل يـا نـاس جلـوه
يا عاد ما وجهة بعضهم تقـارب = يا زينها تسوى الملاييـن خلـوه