قصيدة في نصرة الرسول صلى الله عليه وسلم

[علي الحربي]

الشاعر / علي محمد الحربي

عزاه يا قلبن همومه مراديف = همن ورى هم جن يتتالنّ
هموم ترج القلب فوق التواصيف = وتشلع عروقه بسكين تسنّ
ونار بصدري كما واهج الصيف = كن السهم من بين الأضلاع يطعنّ
كني رضيع يلفعنه شواعيف = والحال مطويه كما طوية الشنّ
وشلون تطاول سفالن ملاقيف = على نبي مبعوث للإنس والجنّ
في حملة بقيادة الظلم والحيف = والحقد , اللي على الظاهر تبينّ
أكالة الخنزير , عبادة الكيف = فعالة السية , وتباعة الجنّ
لكن عزانا يالقلوب المواليف = السحب ما يضره كلابن تعاونّ
ومحمد المبعوث زين التواصيف = حاميه ربه من ماضي الأزمان ياهنّ
هو الذي حماه من راعي السيف = وأبو جهل وش حصل له لو تفطنّ
والسم خبره عندكم يالعواريف = والي لفظه القاع يوم يدفنّ
ونصرته ماهي بالحكا والسواليف = ولا هي بقول في قفى الناس يطعنّ
وحقيقة النصرة يالمناصيف = تسمع لأمر النبي ثم تذعنّ
وتطبق أمره على غير تكليف = وقول يضد قوله على الجنب تركنّ
وتميزك بالسنة ترى زود تشريف = ويرويك من حوضه , ليا من الأرياق يبسنّ
وصلوا على المرسول من السيف للسيف = عداد ما أمواج على الشاطي تلاقنّ
وعداد ما صار بوقتنا من تخاليف = وعداد دموع الثكالى يوم هلنّ