× عـــ آلمجنون ـــالمي [] و آنا بكيفي {}

[مازن الفهد]

و الله مالقيت الا معيضوه العريفج و ابحش فيه هنا ..
.
و انا قلت لكم تهاوشت انا وياه و المسكين عطاني مخمس على وجهي و سبب لي خمس فلوق بالجهه اليمنى و ثمان فلوق بالجهه اليسرى و أربع على جبهتي .. و سبب لي مشكله لأني كذا ما أقدر ألبس عقال .. المهم بعد ما فلقني هالفلوق حط رجله و ما شفت الا غبرة كراعينه ..
و المصيبه انه نسى جواله عندي و خاف لا يرجع ..
المهم أخذت الجوال و خفت انه حاط رمز قفل ..
و فتحت الجوال ..
و اذا بالمزيونه اللي تطل علي .. أثاري قليل الحياء حاط صورة حليمه بولند على الواجهه ..
و دخلت الرسايل .. طبعاً أكثرها كولمي من فهد السلقاوي .. الله يعينك عليه يا معيضوه تلقاه يقول انت بالدكه والا برا ..
و اواصل البحث بالرسايل .. و ألقى رساله من رقم غريب .. أول 059 و الباقي ما تغير خخخخ .. و مرسل له .. يقول .. تقهو عندي فنيجيل يجوز لك ..
و ماشالله اكثرها رسايل من ناس يباركون له برمضان .. إلا واحد يبارك له بالعيد .. يا أخي تو الناس ..
يمكن رساله و المسكين ما قراها شاف فيها ( كل عام و انت بخير ) و ارسلها لمعيضوه ..
( ذكرني برسالة واحد من اخوياي .. أرسل لي رساله .. و هذا مطوّع الله يثبته .. وشفت فيها كلام حلو قبل أقرأ آخر سطر .. و من العجله أرسلتها لمطوع ثاني .. و تجيني رساله من المطوع الثاني يقول .. الله يبارك لك بالمولود بس متى تزوجت .. و الله و ارجع للرساله إلا الرجال الاول يبشرني ان جاه ولد .. )..
المهم ..
مليت و انا أقلب رسايل معيضوه .. و قلت بشوف الاستوديو .. و اشوف الصور .. إلا أول صوره صورة معيضوه مع صقر .. خخخخ و الله ان الصقر أحلى منه .. يا معيض الصقر مبتسم و انت مبرطم .. و الصوره الثانيه .. معيض لابس جنز .. يا اخي ما مداني أحس ان بدوي .. ألقاك لابس جنز .. و صوره .. على الددسن الـ 78 اللي فحطنا عليه و لا بس نظاره شمسيه و العدسه الثانيه طايحه بس ما انتبه ابو عريفج .. و صوره مصوّر مع سعد الحارثي بستاد الملك فهد .. آخر شي اكتشفت انه مسويها بالفوتوشوب .. ( الله يهديتس يا احساس علمتيه للفوتوشوب و فضحنا ) سالفة سعد الحارثي مهضومه .. لقيته بالصور اللي بعدها مصوّر مع أوباما رئيس امريكا .. قوووووويه يا معيض ..
و الصوره اللي ما تصدق و مستحيل أحد يصدقها .. مصوّر مع حليمه بولند .. لا و من زود الميانه حاط يده على كتفها .. خخخخخ
ما تخلي حركاتك يا معيض ..
المهم مليت من الصور .. بس كل ما شفت صورة حليمه بولند أواصل البحث .. يا اما انتهيت من الصور ..
و بعدها اتجهت الى الفيديو .. و أول مقطع .. مصورني أنا وخشتي .. حتى شوشتي تقول طلحه .. و ثوب النوم اللي ما غسلته ثلاث شهور و اسبوع .. و من زين الطبايع قاعد يحش فيني بالتصوير .. ما عليكم مسحته ..
و المقطع الثاني .. مصور نفسه و هو يقنص .. و اتابع و مركز على نفسه .. و انتهى التصوير و مدري وش يقنص ..
و جواله شكله جديد .. ماله يومين من شراه ...
.
و هذي بعض فضايحه و لو يسوي لي شي .. بجيب الباقي .. و انزل الصور و المقاطع بالمنتدى ..