مرثيه

[فهد بن جطلي العبدلي]

هذه مرثيه بالوالد رحمه الله عليه واسكنه فسيح جناته =
البارحه كثرت عليه الهواجيس = واصبحت لذكرى مقيد وخايف
والحزن فيه مثل قدح المقابيس = وغديت انا والهم مثل الولايف
من شان رجل ماخذ الطيب تاسيس= ابوي جعله بالجنان النضايف
مرحوم ياللي بالكرم له نواميس= جطلي لا قيل جطلي تعجز الوصايف
ومرحوم ياللي لحضر بالمجاليس= له كلمة مثل السيوف الرهايف
ومرحوم ياللي مرهي المال والكيس= لاقصى ربوعه ماحسب للخلايف
ومرحوم ياللي مابقلبه حواسيس= للقاصي والداني لجوله لهايف
من عقبكم مالي بالدنيا توانيس = والقلب يؤنس مثل قصف القذايف
ويابوي انا اشبهك وابت واقيس = ياللي ملكت كل الوصوف اللطايف
تشبه بوسط الربًع ضو الفوانيس= ومن بعدك غدينا العيون الكفايف
وتشبه بعزتك الحرار القرانيس= مسكنها دايم فوق روس النوايف
وتشبه شجاعتك الرجال الاشاويس = في وقت كسب الخيل والكل عايف
ويالله ياعالم خفي الكواليس= تودعه من اللي لوجهك أشايف
وترحمه في يوم النواضر معابيس= وتدخله بالجنات وقت الزحايف
ويابوي لوانعاك واملا الكراريس = ماوفيك حقك ولا حتى النصايف
يابوي انا قدمت صدق الاحاسيس = وجعل الخلف باول الاولاد نايف
وسلامتكم=