شي يهول ... وينك يا مس تربيه

[فيصل الرسلاني]

السلام عليكم ورحمة الله وبركاته

زرت بلدي الغالي السعوديه بلد أبو متعب أمده الله بالصحه والعافيه وأصلح له صحبه ورعيته..زرتها في زة رأس السنه.. كانت إيجازتي 27 يوم فقط ..قضيتها متقمصا شخصية إبن بطوطه في السعودية ..من الرياض للإحساء ، الإيمارات ، الخبر آه يالخبر، الدمام ، الجبيل ثم إلى الرياض ... المهم يا أعزائي .. أني وقفت على عشرة حوادث أحدها كان مؤلما جدا رأيت شابين على كامري طافوني وكأني أمشي بالريوس على طريق خريص القديم..يكبسون ويلعبون بالإيشارات وكأنهم يقولون لي يا سلحفاه يا اللي ما تعرف تسوق ولا تتقن فن السواقه أبعد عن الطريق . مثلك المفروض يركب مع سواق وإلا على النقل الجماعي...طافوني وثواني وأنا أوقف عندهم يحترقون تحت تريله ..كانت التريله حاضنهم حضن بدون مبالغه ...الدنيا ضلما ولا عندي أحد ...والسيارات بدت توقف يمين الخط وشماله ...جاء الدفاع المدني والسيارة إستوت ... بدأو برشاشات الماء ...انا ما قدرت أتحمل الموقف خصوصا عندما شف شابين آخرين يمرغون وجوههم بالتراب ويقولون ...ضاع ضاع ..فلان ضاع ...
الله يرحمهم ويجبر مصاب أميمتهم ...
27 يوم ووقفت على 10 حوادث ...إيش اللي صاير فيكم يالسعودية ..قلنا يمكن ساهر زرفكم وبزرفه تمكن من حل المشكله ...الله المستعان..
ليست هذي هي المصيبه فقط ...
كثر السطو و السلب المسلح وغير المسلح من شباب بعضهم لم يصل إلى سن العشرين من العمر ...أخبرني باكستاني في البقاله الي في الحي أنه إنسطى عليه بسواطير من شباب صغار بالعمر ...يقول والله أنا يقدر يضرب كسر راس ...بس مشكله هذا صغير ومجنون أنا معلوم يسوي ويضرب انا يمكن يموت هذا ما يفهم ..مافي صاحي
إيوالله ماهم صاحين ...فقر وإلا جوع ...إيش السالفه ...سولفت هالسالفه في مجلس وقام كل واحد يسردلي نفسها في حيهم أو عايش موقف مماثل .....لا حول ولاقوة إلا بالله ...والله أنا كنت أحسب نفسي مجرم في سن المراهقه والسنين المضلمه...يوه أنا طلعت بالنسبه لعمايلهم مو بس مطوع إلا عابد في صومعتي ...

يا أعزائي ...
أي إنسان يستطيع أن يتنبأ بمستقبل أي أمه وأي بلد ...فقط من متابعة ومشاهدة أخلاق شبابها وجيلها الناشئ....
ولذلك إستخدم هذا الأسلوب في كل الحروب سواءا كان فكري أم ثقافي أو حضاري ...وهذا الذي جعل القوى المخفيه خلف الإعلام أن تهتم بكل جزء من أجزاء الأرض بشئ خاص به ويناسب توجههم وأهدافهم مهما كانت ...

من عادتي أن أكون متفائل ...ولا أدير الفكر السلبي ولا النظره المتشائمه في رأسي أبدا ...من قول المصطفى صلى الله عليه وسلم " من قال هلك الناس فهو أهلكهم.

لكني سأختم بما قاله أحمد شوقي
صلاح أمرك للأخلاق مرجعه.......فقوم النفس بالأخلاق تستقم

وينك يا مستر أخلاق ومس تربيه ...تبدأ من المدرسه ولكن للأسف أن كل جيل يرمي لومه على جيله السابق..

اللهم أصلحنا وحفظنا وكل من هو قريب لقلوبنا ولا تفجعنا بهم يا أرحم الراحمين...اللهم كن مع أخواننا في جده عونا ومسليا وجابرا لقلوبهم ..اللهم آمين

أحببت مشاركتكم ماجال في بالي وتقبلو أطيب أمنياتي
كتبه / فيصل الرسلاني